កៀវ៖ អ៊ុយក្រែន គ្រោងនឹងប្តឹងប្រទេសប៉ូឡូញ ហុងគ្រី និងស្លូវ៉ាគី ទៅកាន់អង្គការពាណិជ្ជកម្មពិភពលោក ជុំវិញកា​រហាមឃាត់ផលិតផលកសិកម្មរបស់អ៊ុយក្រែន។ នេះបើតាមការឱ្យដឹងពីមន្ត្រីរបស់អ៊ុយក្រែន តាមរយៈសារព័ត៌មានរ៉យទ័រ​។​

មន្ត្រីជាន់ខ្ពស់របស់អ៊ុយក្រែនបាននិយាយថា ពាក្យបណ្ដឹងអាចនឹងបញ្ជូនទៅកាន់អង្គការ​ពាណិជ្ជកម្មពិភព​លោ​កក្នុងរយៈពេលដ៏ខ្លីខាងមុខនេះ ដើម្បីជាការឆ្លើយតបទៅនឹងការសម្រេចចិត្ត​របស់​ប្រទេស​ជាប់ព្រំដែនអ៊ុ​យក្រែនទាំងបី ក្នុងការបន្តហាមឃាត់ការនាំចូលទំនិញនាំចេញសំខាន់ៗ​របស់ខ្លួន។​

 ទីភ្នាក់ងារសារព័ត៌មាន PAP បានដកស្រង់សម្តីលោក Radoslaw Fogiel ដែលជា​ប្រធាន​គណៈកម្មការ​កិច្ចការបរទេសរបស់សភាប៉ូឡូញដោយនិយាយថា ការសម្រេចចិត្ត​របស់​អ៊ុយក្រែន​ក្នុងការប្តឹ ងនេះនឹងផ្ទុះការតវ៉ានៅក្នុងប្រទេសប៉ូឡូញ ហើយថាអ៊ុយក្រែនក៏គួរតែ​ដឹង​រឿងនេះផងដែរ។​

លោកបាននិយាយថា ៖ «ការសម្រេចចិត្តរបស់យើងមិនមែនសំដៅវាយប្រហារទៅលើអ៊ុយក្រែនទេ ប៉ុន្តែគឺយើងធ្វើ​ដើម្បីការពារកសិករប៉ូឡូញ ក៏ដូចជាការពារផលប្រយោជន៍របស់ប្រទេស​ប៉ូឡូញទាំងមូល»។​

ភាគីអ៊ុយក្រែនឯណោះវិញបាននិយាយថា ៖ «ទីក្រុងកៀវ​បានត្រៀមខ្លួនជាស្រេចដើម្បី​ទទួល​ខុសត្រូវ​​ និងធា​នាថាការនាំចេញពីអ៊ុយក្រែនមិនបង្កើតឱ្យមានភាពចលាចលណាមួយ​នៅក្នុងសេដ្ឋកិច្ច​ប្រទេស​ជិតខាង ហើយយើងក៏នឹងដាក់ចេញនូវប្រព័ន្ធអាជ្ញាប័ណ្ណនាំចេញដើម្បីធានា​ភាពច្បាស់លាស់​សម្រាប់​ការនាំចេញផ​លិតផលធញ្ញជាតិផងដែរ»។​

គួរបញ្ជាក់ថា សហភាពអឺរ៉ុបកាលពីខែឧសភាបានអនុញ្ញាតឱ្យបណ្ដាប្រទេសអឺ​រ៉ុបខាងកើតចំនួន៥ ប្រទេ​ស អាចដាក់ការហាមឃាត់នូវការនាំចូលទំនិញកសិកម្មមួយចំនួនពីប្រទេសអ៊ុយក្រែន។ យ៉ាងណាមិញ កា​រហាមឃាត់នេះត្រូវបានដកចេញវិញកាលពីថ្ងៃសុក្រកន្លងទៅ ប៉ុន្តែបើទោះជា​យ៉ាងនេះក្ដីប្រទេសចំនួនបីគឺ ប៉ូឡូញ ស្លូវាគី និងហុងគ្រី បានសម្រេចបន្តការហាមឃាត់​ជាលក្ខណៈ​ឯកត្តោភាគីដោយបំពានការប្រកាសរបស់សហភាពអឺរ៉ុប។​

តាមរយៈការសម្រេចចិត្តជាឯកតោភាគីនេះ សហភាពអឺរ៉ុបបានចេញមុខអំពាវនាវទៅកាន់ប្រទេស ទាំងបីថា​ ទង្វើនេះគឺមិនអាចទទួលយកបាននោះទេ។ តែយ៉ាងណា សហភាពអឺ​រ៉ុបក៏នៅតែមិនទាន់ មានវិធានកា​រ​ច្បាស់លាស់ណាមួយ ដើម្បីឆ្លើយតបទៅនឹងរឿងនេះដែរ។

គួររំលឹកថា អ៊ុយក្រែនជាប្រទេសដែលនាំចេញទំនិញកសិកម្មធំបំផុតមួយរបស់ពិភពលោក ប៉ុន្តែការនាំចេ​ញទំនិញរបស់ប្រទេសនេះត្រូវបានរារាំងដោយសង្រ្គាមរាំរ៉ៃជាមួយរុស្សី។ ការដឹកជញ្ជូន តាមផ្លូវទឹករបស់អ៊ុ​យក្រែនក៏ត្រូវបានបំផ្លិចបំផ្លាញដោយកងទ័ពរុស្សី ដែលធ្វើឱ្យអ៊ុយក្រែនត្រូវបង្ខំចិត្ត ប្រើប្រាស់ផ្លូវគោកដើ​ម្បីដឹកជញ្ជូន។​

ដោយភាពរអាក់រអួលនៅតាមខ្សែបន្ទាត់ព្រំដែន ផលិតផលកសិកម្មរបស់អ៊ុយក្រែនត្រូវកកស្ទះជាបន្ត បន្ទា​ប់ ហើយដែលជំរុញឱ្យអ៊ុយក្រែនត្រូវសម្រេចចិត្តលក់ផលិតផលទាំងនោះក្នុងតម្លៃទាប។​ ការទម្លាក់តម្លៃលើ​ទំនិញកសិកម្មនេះហើយ ដែលបានប៉ះពាល់ទៅដល់ផលិតផលក្នុងស្រុករបស់ បណ្ដាប្រទេសជាប់ព្រំដែនអ៊ុយក្រែន៕​srn

ដោយ៖កែវ បុស្បា

ប្រភព៖ Ukraine says it will sue Poland, Hungary and Slovakia over food import bans