គូឡាឡាំពួ៖ប៉ូលីសប្រទេសម៉ាឡេស៊ីកំពុងបើកការស៊ើបអង្កេតលើករណីលួចបង្កប់កាមេរ៉ានៅក្នុងបន្ទប់សណ្ឋា​គារ Airbnb​ នៅក្នុងតំបន់ Kota Kinabalu ក្រោយវីដេអូរបស់គូស្នេហ៍ជនជាតិចិនមួយគូត្រូវបាន បង្ហោះចែកចា​យពាសពេញបណ្ដាញសង្គម។ ​

ដោយឡែកភ្ញៀវទេសចរចិនប្ដីប្រពន្ធគូនេះបានអះអាងថា ពួកគេបានប្រទះឃើញវីដេអូរបស់ខ្លួននៅ​លើបណ្ដាញ សង្គមចិនដែលមានឈ្មោះថា Xiaohongshu នៅថ្ងៃទី ១៤ ខែកញ្ញា ក្រោយពួកគេ​បានស្នាក់នៅ សណ្ឋាគារ Airbnb​ កាលពីដើមខែកញ្ញា។ បន្ទាប់ពីការបង្ហោះ វីដេអូនោះត្រូវបានអ្នក​លេង​បណ្ដាញ​សង្គមចែកចាយ និងក្លាយជាវីដេអូដែលមានភាពល្បីល្បាញតែម្ដង។​

ក្រោយហេតុការណ៍នេះ ប៉ូលីសនៃតំបន់ Kota Kinabalu បានអះអាងពីការទទួលបានពាក្យ​បណ្ដឹងពីគូស្នេហ៍មួយគូនោះ និងថាខ្លួនកំពុងតែរកភ័ស្តុតាង ក៏ដូចជាជនដែលបានប្រព្រឹត្តរឿងនេះ ដើម្បីផ្ដន្ទាទោសតាមច្បាប់។​

 ប៉ូលីសបានរកឃើញកាំមេរ៉ាដែលបានបង្កប់នៅក្នុងរន្ធជញ្ជាំង ដែលត្រូវបានដាក់ឱ្យ​បែរទៅរកគ្រែគេងតែម្ដង។ ដោយការខកចិត្ត ប្ដីប្រពន្ធមួយគូនេះបានបង្ហោះតបត​នៅលើបណ្ដាញ​សង្គម ដោយបានសួរថា «តើការទៅទស្សនាប្រទេសម៉ាឡេស៊ីមានសុវត្ថិភាពកម្រិតណា?»​

ការបង្ហោះដោយភ្ជាប់សំណួររបស់គូស្នេហ៍​ជនជាតិចិនបែប​នេះ ត្រូវបានអ្នកលេងបណ្ដាញសង្គមចូល បញ្ចេញមតិព្រោងព្រាត ​ប៉ុន្តែពួកគេក៏​ត្រូវ​បាន​ប៉ូលីសម៉ាឡេស៊ី​ណែនាំ​ឱ្យ​លុប​ការ​បង្ហោះ​នោះវិញ ដោយមិនចង់ឱ្យប៉ះពាល់កាន់តែខ្លាំងដល់កិត្តិនាមវិស័យទេសចរណ៍របស់ប្រទេសខ្លួន។​

រដ្ឋមន្ត្រីក្រសួងទេសចរណ៍ សិល្បៈ និងវប្បធម៌ម៉ាឡេស៊ី លោក Tiong King Sing បាននិយាយថា នឹងមានចំណាត់ការយ៉ាងម៉ឺងម៉ាត់ចំពោះជនល្មើសឬប្រតិបត្តិករសណ្ឋាគារដែលមានការពាក់ព័ន្ធក្នុងរឿងនេះ។​

លោក Tiong បាននិយាយនៅលើហ្វេសប៊ុកកាលពីថ្ងៃអាទិត្យថា៖ «ការដាក់ទណ្ឌកម្មយ៉ាងតឹងរ៉ឹង និងស​មស្របគួរតែត្រូវបានដាក់លើភាគីណាមួយដែលរកឃើញថាមានពិរុទ្ធ ពីព្រោះទង្វើ​នេះ មិនត្រឹមតែបំពា​នច្បាប់ប៉ុណ្ណោះទេ ប៉ុន្តែថែមទាំងប៉ះពាល់ដល់​មុខមាត់ឧស្សាហកម្ម​ទេសចរណ៍​របស់ប្រទេសផងដែរ»។​

លោក​បាន​បន្ថែម​ថា លោកនឹង​ចាត់​វិធានការ​តឹងរ៉ឹង​ចំពោះ​ប្រតិបត្តិករ ឬ​ម្ចាស់​សណ្ឋាគារទាំង​អស់​ដែល​បាន​ចុះ​បញ្ជី​ក្រោម​ក្រសួង ប្រសិន​បើ​រក​ឃើញ​ថា​បាន​ប្រព្រឹត្ត​ល្មើស​នឹង​ច្បាប់ នឹងត្រូវប្រឈម​នឹង​ការ​បិទទ្វាអាជីវកម្មតែម្ដង៕​

ប្រែសម្រួល៖កែវ បុស្បា

ប្រភព៖ Chinese tourists find hidden camera in power socket of Airbnb room; Sabah police investigating