មេធាវីថៃម្នាក់ ដែលអំពាវនាវឱ្យមានកំណែទម្រង់របបរាជានិយម រងការកាត់ទោសឱ្យជាប់គុក៤ឆ្នាំពីបទប្រមាថក្សត្រ
ថៃ៖ ចៅក្រមថៃនិយាយថា សកម្មជន និងមេធាវីដ៏ល្បីឈ្មោះជុំវិញការអំពាវនាវដោយបើកចំហរឱ្យមានការកែទម្រង់របបរាជានិយមរបស់ប្រទេសថៃ រងការកាត់ទោសឱ្យជាប់ពន្ធនាគាររយៈពេលបួនឆ្នាំពីបទប្រមាថព្រះមហាក្សត្រ។ នេះបើតាមការចុះផ្សាយរបស់ទីភ្នាក់ងារសារព័ត៌មានរ៉យទ័រ។
សកម្មជន និងមេធាវីផ្នែកសិទ្ធិមនុស្សរូបនោះឈ្មោះ លោក អាណុន ណាំប៉ា(Arnon Nampa) អាយុ ៣៩ ឆ្នាំ។ លោកត្រូវបានគេស្គាល់ទូទៅចំពោះការនិយាយជម្នះនឹងបញ្ហារសើបក្នុងអំឡុងបាតុកម្មគាំទ្រលទ្ធិប្រជាធិបតេយ្យក្នុងឆ្នាំ ២០២០ ពេលដែលលោកបានអំពាវនាវឱ្យមានការជជែកដេញដោលជាសាធារណៈ អំពីតួនាទីរបស់ស្តេចថៃ។ លោក Arnon បានបដិសេធការធ្វើខុស។
លោក Arnon គឺជាមេដឹកនាំនៃចលនាប្រជាធិបតេយ្យដឹកនាំដោយយុវជន ដែលបានធ្វើការតវ៉ានៅទីក្រុងបាងកកក្នុងឆ្នាំ ២០២០ ដែលបានទាក់ទាញមនុស្សរាប់សែននាក់ឱ្យចូលរួម ហើយថែមទាំងទាមទារឱ្យមានការដកតំណែងនាយករដ្ឋមន្រ្តីចាស់ លោក ប្រាយុទ្ធ ចាន់អូចា។
លោក Arnon ត្រូវបានតុលាការថៃរកឃើញថា មានពិរុទ្ធ ចំពោះការលើកឡើងអំពីរាជាធិបតេយ្យក្នុងសុន្ទរកថាមួយអំឡុងបាតុកម្មឆ្នាំ ២០២០ ក្នុងករណីដំបូងចំណោម១៤ករណី ដែលប្រឆាំងនឹងលោកសម្រាប់ការរំលោភលើមាត្រា ១១២ នៃក្រមព្រហ្មទណ្ឌ ឬដែលគេស្គាល់ថា ជាច្បាប់ស្ដីពីការប្រមាថព្រះមហាក្សត្រ។
បើតាមរ៉យទ័រ មេធាវីរបស់លោកបានឱ្យដឹងថា ក្រុមការងារច្បាប់របស់លោក Arnon កំពុងព្យាយាមដើម្បីឱ្យលោកបាននៅក្រៅឃុំ ដោយនឹងដាក់បណ្តឹងឧទ្ធរណ៍ផងដែរ។ប្រសិនបើចាំបាច់ នឹងនាំយកសំណុំរឿងនេះ ទៅតុលាការកំពូល។
គួរបញ្ជាក់ថា លោក Arnon ដែលនៅក្រៅឃុំតាំងពីដើមឆ្នាំមុនបន្ទាប់ពីការឃុំខ្លួនជាច្រើនដង មិនត្រូវបាននាំទៅពន្ធនាគារភ្លាមៗទេកាលពីថ្ងៃអង្គារ ហើយនៅតែនៅតុលាការ ដើម្បីរង់ចាំការស្នើសុំនៅក្រៅឃុំ។
ច្បាប់ស្ដីពីការប្រមាថអង្គព្រះមហាក្សត្ររបស់ប្រទេសថៃ ការពាររាជវង្សពីការរិះគន់ ហើយផ្តន្ទាទោសអ្នកបំពានដាក់ពន្ធនាគារអតិបរមា ១៥ ឆ្នាំ សម្រាប់រាល់ការប្រមាថព្រះមហាក្សត្រ ទោះបីជារងការថ្កោលទោស ក៏ដូចជាការរិះគន់ពីក្រុមសិទ្ធិមនុស្សក៏ដោយ។
មនុស្សរាប់រយនាក់រងការចោទប្រកាន់ក្រោមច្បាប់នេះ។យោងតាមក្រុមមេធាវីថៃដើម្បីសិទ្ធិមនុស្ស មនុស្សយ៉ាងហោចណាស់ ២៥៧ នាក់ រងការចោទប្រកាន់ក្រោមមាត្រ១១២ ក្នុងរយៈពេលបីឆ្នាំកន្លងមកនេះ។
ភាគច្រើននៃករណីទាំងនោះ គឺទាក់ទងនឹងចលនាគាំទ្រប្រជាធិបតេយ្យដែលដឹកនាំដោយក្រុមយុវជន។ ទោះជាយ៉ាងណាក៏ដោយ លោក Arnon ថ្លែងក្នុងសុន្ទរកថានៅពេលមកដល់តុលាការថា លោកអាចនឹងបាត់បងសេរីភាព ប៉ុន្តែមិនសោកស្តាយចំពោះការលះបង់របស់លោកទេ។
លោកថ្លែងថា៖ «ការតវ៉ារបស់យុវជន បានបង្កើតបាតុភូតមួយដែលបានផ្លាស់ប្តូរប្រទេសថៃរហូតដល់ចំណុចឆ្ពោះទៅមុខរៀងរហូត។ ខ្ញុំជឿថា ប្រជាជនកាន់តែមានទំនុកចិត្តលើសេរីភាព និងសមភាពរបស់ពួកគេ ហើយត្រៀមខ្លួនរួចជាស្រេចក្នុងការផ្លាស់ប្តូរប្រទេស ឱ្យកាន់តែរីកចម្រើន»៕
ប្រែសម្រួល៖ហួន ឌីណា
ប្រភព៖ Lawyer who called for Thai monarchy reforms sentenced to 4 years for royal insults
