មនុស្សជាង ១0០ នាក់ស្លាប់ក្នុងហេតុការណ៍ភ្លើងឆេះក្នុងពិធីមង្គលការនៅអ៊ីរ៉ាក់
បាកដាក៖ មនុស្សជាង ១០០ នាក់បានស្លាប់ និងជាង ១៥០ នាក់ផ្សេងទៀតបានរងរបួសក្នុងហេតុការណ៍ភ្លើងឆាបឆេះក្នុងពិធីមង្គលការមួយក្នុងស្រុក Hamdaniya ក្នុងខេត្ត Nineveh នៃប្រទេសអ៊ីរ៉ាក់ កាលពីរំលងអធ្រាត្រឈានចូលថ្ងៃពុធទី ២៧ ខែកញ្ញា ។ នេះបើតាមការរាយការណ៍របស់ទីភ្នាក់ងារសារព័ត៌មានរ៉យទ័រ។
អភិបាលរងខេត្ត Nineveh លោក Hasan al-Allaq បានប្រាប់រ៉យទ័រថា មនុស្សចំនួន ១១៣ នាក់ត្រូវបានរាយការណ៍ថា បានស្លាប់ ។ប៉ុន្តែប្រព័ន្ធផ្សព្វផ្សាយរដ្ឋអ៊ីរ៉ាក់ បានដាក់ចំនួនអ្នកស្លាប់យ៉ាងតិចណាស់ ១០០ នាក់ និង១៥០ នាក់ផ្សេងទៀតរងរបួស។
គេមិនទាន់ដឹងពីមូលហេតុដែលធ្វើឱ្យមានការឆាបឆេះនោះទេ ប៉ុន្តែប្រព័ន្ធផ្សព្វផ្សាយរដ្ឋបានរាយការណ៍ថា សាលពិធីមង្គលការបានឆាបឆេះ ក្រោយពេលគេដុតកាំជ្រួចក្នុងអំឡុងពេលប្រារព្ធពិធី។ បើតាមខ្សែវិដេអូដែលថតដោយអ្នករាយការណ៍ព័ត៌មានរ៉យទ័រ គេឃើញមានក្រុមអ្នកពន្លត់អគ្គិភ័យដុតដៃដុតជើងធ្វើប្រតិបត្តិការរបស់ខ្លួន ហើយក្រុមអ្នកជួយសង្រ្គោះស្វែងរកអ្នកដែលនៅរស់រានមានជីវិត។
ជាមួយគ្នានេះផងដែរ ប្រព័ន្ធផ្សព្វផ្សាយរដ្ឋអ៊ីរ៉ាក់ផ្សាយថា ព័ត៌មានបឋមបានបង្ហាញថា អគារនៃសាលមង្គលការធ្វើពីសម្ភារៈសំណង់ដែលងាយឆេះខ្លាំង ហើយធ្វើឱ្យអគារឆាប់បាក់ស្រុតចុះពេលឆេះ។
បើតាមបណ្ដាញព័ត៌មាន BBC មន្រ្តីសុខាភិបាលម្នាក់បានអះអាងថា កូនកំលោះ និងកូនក្រមុំក្នុងពិធីមង្គលការបានស្លាប់ទាំង២នាក់។ ចំណែកឯសាក្សីនៅកន្លែងកើតហេតុវិញ បាននិយាយថា អគារនេះបានឆាបឆេះនៅម៉ោងប្រហែល ១០ នាទីយប់ (ម៉ោងក្នុងស្រុក) ហើយមានមនុស្សរាប់រយនាក់ បានចូលរួមនៅម៉ោងកើតហេតុ៕
ប្រែសម្រួល៖ហួន ឌីណា ប្រភព៖ Iraq wedding fire live news: At least 100 people killed in Nineveh province
