ប៉េកាំង៖កាលពីថ្ងៃទី១៥ ខែវិច្ឆិកា ឆ្នាំ២០២៣ អំឡុងពេលពិធីទទួលទានអាហារពេលល្ងាចជាមួយក្រុមថ្នាក់ដឹកនាំក្រុមហ៊ុនសារជីវកម្មធំៗអាមេរិកនៅទីក្រុងសាន់ហ្វ្រាន់ស៊ីស្កូ (San Francisco) ប្រធានាធិបតីចិន លោក ស៊ី ជីនពីង (Xi Jinping) បានធានាអះអាងទៅកាន់ពួកគេថា ប្រទេសចិនបានត្រៀមខ្លួនរួចជាស្រេចដើម្បីក្លាយជាដៃគូមិត្តភាពជាមួយសហរដ្ឋអាមេរិក ដោយសង្កត់ធ្ងន់លើឱកាសដ៏ច្រើនសម្រាប់កិច្ចសហប្រតិបត្តិការរវាងប្រទេសទាំងពីរ ។ការអះអាងរបស់លោក ស៊ី បែបនេះគឺដើម្បីស្ដារនូវទំនុកចិត្តរបស់ម្ចាស់អាជីវកម្មទាំងអស់ និងដើម្បីទាក់ទាញការវិនិយោគពីបរទេសផងដែរ។

នៅក្នុង​វេទិកា​កិច្ចសហប្រតិបត្តិការ​សេដ្ឋកិច្ច​អាស៊ី​ប៉ាស៊ីហ្វិក (APEC) ថ្នាក់ដឹកនាំក្រុមហ៊ុន​​អាមេរិកធំៗជាច្រើន​បាន​ជួប​ពិភាក្សា​ជាមួយ​លោក ស៊ី។ ជំនួបនេះបានធ្វើឡើងបន្ទាប់ពីមានការជជែកពិភាក្សាជាបន្តបន្ទាប់រវាងមេដឹកនាំចិន និងប្រធានាធិបតីសហរដ្ឋអាមេរិក លោក ចូ បៃដិន (Joe Biden) ដែលបានផ្តោតលើស្ថិរភាពទំនាក់ទំនងរវាងប្រទេសទាំងពីរដែលជាមហាអំណាចសេដ្ឋកិច្ចពិភពលោក។

គួរកត់សម្គាល់ថា លោក ស៊ី បាន​ទទួលការងើបឈរស្វាគមន៍ពីសំណាក់ថ្នាក់ដឹកនាំក្រុមហ៊ុនសហគ្រាសអាមេរិកចំនួន ៣ ដង ពោលគឺនៅ​ពេល​គាត់ដើរ​ចូល​ទៅ​ក្នុង​សាលទទួលទានអាហារម្ដង មុនពេលគាត់ឡើងថ្លែងសន្ទរកថាម្ដង និងពេលថ្លែងសន្ទរកថាចប់ម្ដង។ អំឡុងពេលថ្លែងសន្ទរកថា លោកបានសង្កត់ធ្ងន់លើសារៈសំខាន់នៃកិច្ចសហប្រតិបត្តិការរវាងប្រទេសចិន និងសហរដ្ឋអាមេរិក ដោយបានច្រានចោលគំនិតនៃការមើលឃើញប្រទេសចិនថាជាការគំរាមកំហែង។

លោក ស៊ី បានមានប្រសាសន៍ថា «បើទោះបីជាដំណាក់កាលនៃការអភិវឌ្ឍន៍ដែលខ្លួនអាចឈានដល់កម្រិតណាក៏ដោយ ប្រទេសចិននឹងមិនអនុវត្តគោលនយោបាយអនុត្តរភាព ឬការពង្រីកឥទ្ធិពលរបស់ខ្លួនឡើយ ជាពិសេសគឺចិនគ្មានឆន្ទៈក្នុងការដាក់សម្ពាធទៅលើប្រទេសណាមួយឡើយ»។

លោក ស៊ី បានបង្ហាញពីទំនុកចិត្តទៅលើអនាគតនៃទំនាក់ទំនងចិន និងអាមេរិក បើទោះបីជាមានភាពតានតឹងកាន់តែខ្លាំងឡើងរវាងប្រទេសទាំងពីរក៏ដោយ។ លោកបានធានាចំពោះមេដឹកនាំធុរកិច្ចអាមេរិកទាំងអស់ថា ប្រទេសចិននៅតែបើកចំហចំពោះកិច្ចសហប្រតិបត្តិការ ហើយថាចិនបានទទួលស្គាល់បញ្ហាប្រឈមដែលបណ្តាលមកពីការធ្លាក់ចុះសេដ្ឋកិច្ច និងកង្វល់ពាក់ព័ន្ធនឹងបញ្ហាសន្តិសុខរបស់ប្រទេស។

គួរដឹងដែរថា ក្នុងកម្មវិធីអាហារពេលល្ងាចនេះ ថ្នាក់ដឹកនាំធុរកិច្ចមកពីសាជីវកម្មធំៗរបស់សហរដ្ឋអាមេរិកជាច្រើនបានចូលរួម ក្នុងនោះរួមមាន ក្រុមហ៊ុនApple ក្រុមហ៊ុនBlackRock ក្រុមហ៊ុនBroadcom ក្រុមហ៊ុនBridgewater Associates និងក្រុមហ៊ុនPfizer ជាដើម។ លោក ស៊ី ក៏បានជួបជាមួយនាយកប្រតិបត្តិក្រុមហ៊ុន តេស្លា (Tesla) លោក អេឡុន ម៉ាសក៍ (Elon Musk) និងបានសម្តែងការគាំទ្រចំពោះការរីកចម្រើនរបស់ក្រុមហ៊ុននៅក្នុងប្រទេសចិនផងដែរ។

នៅក្នុងសេចក្ដីថ្លែងការណ៍នោះលោក ស៊ី ​មិនបាន​ផ្តោត​ច្រើន​លើ​ទំនាក់ទំនង​ពាណិជ្ជកម្ម​ជាមួយ​សហរដ្ឋអាមេរិក​នោះទេ។ ​លោក​បាន​សម្តែង​ការអាណិតអាសូរ​របស់​ចិន​សម្រាប់​ប្រជាជន​អាមេរិក ជាពិសេស​យុវជន​ដែលបាន​ប៉ះពាល់​ដោយ​ផលវិបាក​នៃ​សារធាតុហ្វិនតានីល (Fentanyl) ដែលជាថ្នាំប្រើដើម្បីកាត់បន្ថយការឈឺចាប់ធ្ងន់ធ្ងរ។ នៅមុនពេលពិធីអាហារពេលល្ងាចនេះ លោក ស៊ី និងលោក បៃដិន ក៏បានយល់ព្រមសហការគ្នាក្នុងការកាត់បន្ថយការផលិតសារធាតុហ្វិនតានីលនេះផងដែរ។

គួរដឹងដែរថា ក្រៅពីខ្លឹមសាររបស់លោក ស៊ី ដែលបានលើកឡើងខាងលើ នៅមានបញ្ហាចម្រូងចម្រាសមួយចំនួនដែលបានកើតឡើងផងដែរ។ ជាក់ស្ដែង កម្មវិធីជួបជុំអាហារពេលល្ងាចដែលរៀបចំឡើងដោយក្រុមប្រឹក្សាធុរកិច្ចអាមេរិក-ចិន និងគណៈកម្មាធិការជាតិស្តីពីទំនាក់ទំនងអាមេរិក-ចិននេះ ត្រូវបានគេរិះគន់ចំពោះតម្លៃសំបុត្រខ្ពស់ពេក និងថាជាកម្មវិធីដែលធ្វើឡើងដើម្បីទទួលស្គាល់រដ្ឋាភិបាលចិនថាស្របច្បាប់ចំពោះការរំលោភសិទ្ធិមនុស្សកន្លងមក។

ម៉្យាងវិញទៀត សុន្ទរកថា​របស់​លោក ស៊ី ទំនង​ជា​មិន​អាច​កែលម្អ​ទំនុកចិត្តរបស់ម្ចាស់ក្រុមហ៊ុនសហគ្រាស​សាជីវកម្មអាមេរិក​ចំពោះ​ប្រទេស​ចិន​បាន​ច្រើននោះ​ទេ។ ការប្រជែងគ្នាកាន់តែខ្លាំងឡើងរវាងសហរដ្ឋអាមេរិក និងចិនបានធ្វើឱ្យក្រុមហ៊ុនមកពីប្រទេសទាំងពីរស្ថិតក្រោមការប្រុងប្រយ័ត្នខ្លាំង ហើយការសង្ស័យរបស់ចិនចំពោះក្រុមហ៊ុនលោកខាងលិចថាបានធ្វើចារកម្ម ក៏កំពុងបំផ្លាញទំនុកចិត្តវិនិយោគិនផងដែរ៕

ប្រែសម្រួល៖ ធា សុណា

ប្រភពព័ត៌មាន៖​ Reuters

Dining with US firms at APEC, Xi says China is ready to be a partner

https://www.reuters.com/world/xi-tells-us-firms-china-ready-be-partner-friend-2023-11-16/