(ភ្នំពេញ)៖ អាកាសយានដ្ឋានអន្តរជាតិសៀមរាបអង្គរ បាននិងកំពុងព្យាយាមធ្វើការទំនាក់ទំនងទៅកាន់ក្រុមហ៊ុនអាកាសចរណ៍ក្នុងស្រុក និងក្រៅស្រុក ដើម្បីភ្ជាប់ការហោះហើរដោយត្រង់ បន្ទាប់ពីព្រលានយន្តហោះថ្មីនេះ ត្រូវបានសាងសង់នៅកន្លែងថ្មី លំដាប់ថ្នាក់4E ដែលអាចឱ្យយន្តហោះដឹកអ្នកដំណើរធុនមធ្យមប្រភេទប៊ូអ៊ីង ៧៣៧ និងអ៊ែរប៊ឺស A ៣២០ ចុះចតបាន ជាមួយក្តីរំពឹងទទួលអ្នកដំណើរឆ្លងកាត់ពី៧ ទៅ ១០លាននាក់ ក្នុង ១ឆ្នាំ ។

ក្នុងដំណើរទស្សនកិច្ចរបស់អ្នកសារព័ត៌មាន ដែលចូលរួមក្នុងដំណើរទស្សនកិច្ចនៅខេត្តសៀមរាប ចំនួន ៣២ ស្ថាប័ន និងមានអ្នកសារព័ត៌មានចូលរួម ៤២ នាក់ ដែលរៀបចំឡើងដោយក្លឹបអ្នកកាសែតកម្ពុជា ដើម្បីផ្សព្វផ្សាយពីសក្តានុពលទេសចរណ៍ ក្នុងខេត្តសៀមរាប កាលពីចុងសប្តាហ៍នេះ លោក ពេជ្រ សុប៉ុនតារា អ្នកទទួលបន្ទុកផ្នែករកក្រុមហ៊ុនយន្តហោះ នៃព្រលានយន្តហោះអន្តរជាតិសៀមរាបអង្គរ បានឱ្យដឹងថា«យើងកំពុងព្យាយាមធ្វើទំនាក់ទំនងបន្ថែមទៀត ជាមួយក្រុមហ៊ុនទេសចរណ៍ ដើម្បីធ្វើយ៉ាងណាឱ្យតម្លៃនៃជើងហោហើរនីមួយៗ អាចទទួលយកបានពីអ្នកដំណើរ ព្រោះថា តម្លៃនៃជើងហោះហើរ គឺក្រុមហ៊ុនទេសចរណ៍ ជាអ្នកកំណត់តម្លៃ ។

ព្រលានយន្តហោះអន្តរជាតិមួយនេះ បាននិងកំពុងទាក់ទងទៅកាន់ក្រុមហ៊ុនអាកាសចរណ៍ថ្មីៗ ដើម្បីពង្រីកការហោះហើយ ប្រកបដោយការប្រកួតប្រជែងទាំងច្រវាក់តម្លៃ។

លោក ពេជ្រ សុប៉ុនតារា បានបញ្ជាក់ថា បច្ចុប្បន្ន មានជើងហោះហើរទាំងទៅទាំងមកចំនួន៥០ជើង ទៅកាន់ប្រទេសក្នុងតំបន់អាស៊ាន លើកលែងតែប្រទេសព្រុយណេ ភូមា ឥណ្ឌូនេស៊ី និងហ្វីលីពីន ហើយក្រៅពីប្រទេសអាស៊ាន ក៏មានប្រទេសចិន និងកូរ៉េខាងត្បូងផងដែរ។ ក្នុងមួយថ្ងៃមានអ្នកដំណើរ(ទាំងភ្ញៀវជាតិ និងអន្តជាតិ) ឆ្លងកាត់ប្រមាណ៥ពាន់នាក់។ ចំនួននេះ មានការកើនឡើង៥ភាគរយ បើធៀបនឹងព្រលានយន្តហោះចាស់។

គួរបញ្ជាក់ថា អាកាសយានដ្ឋានអន្តរជាតិសៀមរាបអង្គរ ត្រូវបានសាងសង់រួចរាល់ ក្នុងជំហានទី១ ក្រោមទុនវិនិយោគជាង១ពាន់លានដុល្លារអាមេរិក ដោយអាចឱ្យយន្តហោះដឹកអ្នកដំណើរធុនមធ្យមប្រភេទប៊ូអ៊ីង៧៣៧ និងអ៊ែរប៊ឺសA៣២០ចុះចតបាន ជាមួយក្តីរំពឹងទទួលអ្នកដំណើរឆ្លងកាត់ពី៧ទៅ១០លាននាក់ ក្នុង១ឆ្នាំ ហើយត្រូវរាជរដ្ឋាភិបាល រំពឹងថា នឹងចូលរួមចំណែកក្នុងការទាក់ទាញភ្ញៀវទេសចរមកទស្សនាខេត្តសៀមរាប ព្រមទាំងជំរុញកំណើនសេដ្ឋកិច្ចជាតិ ការបង្កើនការងារ និងប្រាក់ចំណូលជូនប្រជាពលរដ្ឋ និងរួមចំណែកដល់ការអភិវឌ្ឍសង្គមប្រកបដោយចីរភាព។ ការសាងសាង់មានចំណតសម្រាប់ចតអាកាសយានចំនួន៣៨ចំណត។

អាកាសយានដ្ឋានអន្តរជាតិនេះ មានទីតាំងស្ថិតនៅភូមិក្រៀលពង ឃុំពពេល និងភូមិប្រវ៉ាល ឃុំតាយ៉ែក ស្រុកសូទ្រនិគម ខេត្តសៀមរាប ក្រោមការវិនិយោគលក្ខណៈសាងសង់ ដំណើរការ និងផ្ទេរមកវិញ(BOT) ក្នុងរយៈពេល៥៥ឆ្នាំ។ អាកាសយានដ្ឋានថ្មីនេះ មានចម្ងាយពីប្រាសាទអង្គរវត្ត៤០គីទ្បូម៉ែត្រ និង៥១គីទ្បូម៉ែត្រពីក្រុងសៀមរាប៕

អត្ថបទ ង៉ាន់ ទិត្យ
រូបភាព សួង ពិសិដ្ឋ