ល្បែងសី
ជាល្បែងមួយយ៉ាង សម្រាប់មនុស្សប្រុសកម្លោះៗ ឬចំណាស់ៗគេលេងនៅទីវាលនាពេលថ្ងៃត្រជាក់ នៅរដូវរំហើយនៅពេលបុណ្យទានឬពេលជួបជុំកម្សាន្តសប្បាយផ្សេងៗជាដើម។ ល្បែងនេះជាកីឡាហាត់ប្រាណមួយយ៉ាង ខាងកាយសម្បទាប្រហែលនឹងកីឡាបាល់ទាត់ដែរ។
សី មាន ៣ ប្រភេទគឺ៖
-សីមីលោង៖ វត្ថុដែលគេយកមក ធ្វើសីនេះគឺគេយកបន្ទោះផ្តៅឬស្សី ឬរពាត់មកចាក់ជាក្រឡាភ្នែកគ្រួច ឲ្យមានសណ្ឋានមូល ប្រមាណប៉ុនត្រឡោកដូងធុនតូច ហើយគេនាំគ្នាទាត់លេង ។
-សីដក់៖ គេធ្វើដោះបន្ទោះផ្តៅ ឬរពាក់ឲ្យមានសណ្ឋានដូចសីមីលោងដែរប្លែកតែសីដក់គេធ្វើឲ្យមានទំហំ និងមានក្រឡាធំជាងសីមីលោងបន្តិច ។ សីដក់ មានរបៀបលេងស្រដៀង និងសីមីលោងដែរ ប្លែកតែសីមីលោងគេទាត់ដោយខ្នងជើងឯសីដក់គេគះដោយកែងដៃ កែងជើង ក្បាលជង្គង់ ដោយស្មា ។
-សីពែន៖ គេធ្វើដោយស្លាបសត្វ និងស្បែកឬស្រកាត្រីគឺគេដាក់ស្បែក ឬស្រកាត្រីត្រួតគ្នា ៣.៤ ជាន់ចៀរជាសណ្ឋានមូលចោះចំកណ្តាល ជាប្រហោងហើយយកស្លាបសត្វ ៣.៥ ដែលខ្លីៗល្មមមកជ្រំឲ្យស្មើរួចស៊កគល់ស្លាបនោះក្នុងរន្ធស្បែកឬស្រកាត្រី នោះឲ្យចេញមកបន្តិចហើយបត់ទៅខាងៗចងដោយខ្សែលួសឆ្មារៗ ភ្ជាប់ទៅនិងស្បែកឬស្រកាត្រីនោះការពារមិនឲ្យរបូតរួចគេយកទៅទាត់លេងកម្សាន្ត។
#សច្ចធម៌ប្រវត្ដិសាស្រ្ដ #ព្រះរាជាណាចក្រកម្ពុជា #ល្បែងប្រជាប្រិយខ្មែរ #ល្បែងសី #សីមាន៣ប្រភេទ
