(កំពង់ឆ្នាំង)៖ ការចងសម្ព័ន្ធមេត្រីភាពរវាងស្ថាប័ន អង្គភាពស៊ីវិល និងកងទ័ព មានអត្ថន័យធំធេងណាស់ គឺបង្ហាញឱ្យឃើញកាន់តែច្បាស់ពីស្មារតីសាមគ្គីភាព មនោសញ្ចេតនា និងការជួយគ្នាទៅវិញទៅមក ហើយការជួបគ្នានេះ នឹងក្លាយជាប្រពៃណីដែលនឹងបន្តគាំទ្រដល់សមរភូមិមុខជាដរាប ។ នេះជាការថ្លែងរបស់ឯកឧត្តម យឹម លាត ទេសាភិបាលរងធនាគារជាតិនៃកម្ពុជា នារសៀលថ្ងៃទី៥មេសា ក្នុងឱកាសដឹកនាំគណប្រតិភូធនាគារនៃកម្ពុជាតិ ចុះសួរសុខទុក្ខ និងនាំយកអំណោយជូនកងពលធំអន្តរាគមន៍លេខ១ ឈរ
ជើងក្នុងស្រុកសាមគ្គីមានជ័យ ខេត្តកំពង់ឆ្នាំង។

ឯកឧត្តម យឹម លាត បានថ្លែងថា៖ នេះមិនមែនជាលើកទី១ នោះទេ ដែលថ្នាក់ដឹកនាំមន្ត្រីបុគ្គលិកធនាគារជាតិនៃកម្ពុជា បានមកជួបជាមួយកងពលតូចអន្តរាគមន៍លេខ១ ហើយកិច្ចការនេះ ក្នុងឋានះជាអង្គភាពសម្ពន្ធ័មេត្រីភាព គឺបានចុះមកជួបជាបន្តបន្ទាប់ចាប់តាំងពីឆ្នាំ២០០៦ មក ទាំងនៅទីបញ្ជការរបស់កងពលនៅលង្វែក និងទាំងនៅទីបញ្ជាការជួរមុខទិសអូរតាថាវ តំបន់ប្រាសាទព្រះវិហារ គឺតែងតែបានផ្សាភ្ជាប់ មនោសញ្ចេតនា ឧបត្ថម្ភគាំទ្រ និងចុះជួបសាកសួរសុខទុក្ខ ជាហូរហែរពិសេស ក្នុងអំឡុងពេលបុណ្យទានដូចបុណ្យភ្ជុំបិណ្ឌ និងបុណ្យចូលឆ្នាំប្រពៃណីខ្មែរ ជាដើម។

ក្នុងឱកាសនោះឯកឧត្ដមក៏បាននាំការផ្តាំផ្ញើសួរសុខទុក្ខពីសំណាក់ថ្នាក់ដឹកនាំធនាគារជាតិនៃកម្ពុជា និងកោតសរសើរដល់ ឯកឧត្តមមេបញ្ជាការ មេបញ្ញាការរង នាយទាហាន នាយទាហានរង និងពលទាហាន អង្គភាពកងពលតូចអន្តរាគមន៍លេខ១ទាំងអស់ ដែលកន្លងមកបានធ្វើពលីកម្មគ្រប់បែបយ៉ាង ដើម្បីការពារបូរណភាពទឹកដី និងប្រជាជាតិយើងទាំងមូល ឱ្យរស់នៅដោយភាពសុខសាន្តរបស់ប្រទេសនិងប្រជាជន ។

ឯកឧត្តម យឹម លាត បានបន្តថា÷ រាជរដ្ឋាភិបាលក្រោមការដឹកនាំប្រកបដោយគតិបណ្ឌិតរបស់ សម្តេចមហា បវរ ធិបតី នាយករដ្ឋមន្ត្រី នៅតែបន្តណែនាំស្ថាប័ន អង្គភាពស៊ីវិល ផ្សាភ្ជាប់ជាមួយកងទ័ពដែលសកម្មនេះបានបញ្ជាក់ឲ្យឃើញច្បាស់ថា ជីវភាពកងទ័ព នៅតែជាការគិតគូរជានិច្ច បើទោះបីជាសម្តេចមមាញឹកក្នុងការងារក៏ដោយ ហើយសកម្មភាពរបស់យើងទាំងអស់គ្នា បានបង្ហាញពីការសាមគ្គីគ្នា ការស្រឡាញ់គ្នា ចេះជួយយកអាសាគ្នា ជាពិសេស ត្រូវមានការប្រុងប្រយ័ត្នខ្ពស់ក្នុងការងារ ដើម្បីត្រៀមទប់ទល់ជាមួយសត្រូវដែលមានបំណងអាក្រក់មកលើយើង ព្រមទាំងរក្សាឱ្យបាននូវសុខសន្តិភាពទូទាំងប្រទេស។

អំណោយរបស់ធនាគារជាតិនៃកម្ពុជា ដែលនាំយកទៅប្រគល់ជូនកងពលតូចអន្តរាគមន៍លេខ១នាពេលនោះ រួមមាន÷ ថវិកាចំនួន ១២លានរៀល, ទឹកសុទ្ធ ១០០កេស ,ទឹកផ្លែឈើ និងទឹកក្រូច ១០០កេស ស្រាបៀ ១០០កេស រួមនឹងនំធុង និងស្ករគ្រាប់មួយចំនួនទៀត ៕

អត្ថបទ ៖ វណ្ណលុក
រូបភាព ៖ វ៉េង លីមហួត