ស្ទឹងត្រែង៖មេខ្លោងចំនួនបួននាក់ត្រូវបានឃាត់ខ្លួន ព្រោះ​ពាក់ព័ន្ធ​នឹងការបំផុសឱ្យប្រជាពលរដ្ឋឱ្យចូលទៅកាប់ទន្ទ្រាន​ដីព្រៃរបស់រដ្ឋ​នៅចំណុចភូមិសាស្រ្តក្រឡាពុះ នៃស្រុកសេសាន ។ការឃាត់ខ្លួនបានធ្វើឡើងក្នុងប្រតិបត្តិការពិសេស​ដែលដឹកនាំ​ដោយឯកឧត្តម ប៉ាន់ខែម ប៊ុនថន នាយករងខុទ្ទកាល័យ​សម្តេច​​នាយករដ្ឋមន្ត្រី ​ក្រុមការងារអន្តរាគមន៍ពិសេសរបស់​ខុទ្ទកាល័យសម្ដេចធិបតី​​និងកម្លាំងចម្រុះនៃរដ្ឋបាល​ខេត្ត​ស្ទឹងត្រែង។

ក្នុងសន្និសីទសារព័ត៌មានកាលពីរសៀលថ្ងៃទី២២ ខែ​ឧសភានៅឯសាលាខេត្តស្ទឹងត្រែងឯកឧត្តម ប៉ាន់ខែម ប៊ុនថន បានបញ្ជាក់​យ៉ាងម៉ឹងម៉ាត់​ថា គ្មានការលើកលែងនោះទេ​សម្រាប់​ជនណាដែលជាមេខ្លោងក្នុង​ការបំផុសបំផុលឱ្យមាន​ការ​ចូលទៅទន្ទ្រាន​ដី​ព្រៃរបស់រដ្ឋ និងមិនអនុញ្ញាតឱ្យមាន​វប្បធម៌អន្តរាគមន៍ដែរ។

បើតាមការបង្ហាញនៅក្នុងសន្និសីទកាសែតជនដែលត្រូវ​បានឃាត់ខ្លួនបន្ថែមទៀត ក្នុងនោះមានឈ្មោះ លេះ សារី មកពីខេត្ត​កំពង់ចាម ជាមេខ្លោងក្នុងការរៀបចំកៀរគរ និង​ប្រមូលថវិកាពីប្រជាពលរដ្ឋផងដែរ ដើម្បីឱ្យចូល​ទៅទន្ទ្រាន​ព្រៃនិង​ចាប់ដីរបស់​រដ្ឋធ្វើជាកម្មសិទ្ធិ។ក្នុងសេចក្តីប្រកាសព័ត៌មានរបស់រដ្ឋបាលកាលពីថ្ងៃទី២ ខែឧសភា កន្លងទៅបានបញ្ជាក់ថា ក្នុងប្រតិបត្តិការពី
ថ្ងៃទី៦ ដល់ថ្ងៃទី២៩ ខែមេសា មេខ្លោងនិងបក្ខពួកពាក់ព័ន្ធ​នឹងការកាប់ទន្រ្ទានដីព្រៃរបស់រដ្ឋដោយខុសច្បាប់ចំនួន១០នាក់ត្រូវបានចាប់ខ្លួនកសាងសំណុំរឿងបញ្ជូនទៅ​តុលាការ។

ឯកឧត្តម ប៉ាន់ខែម ប៊ុនថន ក៏បានអំពាវនាវដល់ប្រជា​ពលរដ្ឋ​ទាំងអស់ សូមកុំមានការជឿជាក់លើជនណា ដែលអះ​អាង​ថា​មាន​ការចែកដីធ្លីនៅក្នុងភូមិសាស្រ្តខេត្តស្ទឹងត្រែង ដែលពុំមាន​នៅក្នុងគោលនយោបាយរបស់រាជរដ្ឋាភិបាល ឬក៏ពុំមានការ​ទទួល​​ស្គាល់​ពីអាជ្ញាធរមូលដ្ឋាន ជាពិសេសមេភូមិ មេឃុំ និងអភិបាលស្រុក ។បើមានបងប្អូនណា ដែលមានការពាក់ព័ន្ធ នឹងមេខ្លោងខាងលើនេះ សុំឱ្យបញ្ឈប់ជាបន្ទាន់ និងអនុញ្ញាតឱ្យ​ដាក់ពាក្យបណ្តឹងមកក្រុមការងាររបស់ឯកឧត្តមបាន ដើម្បី​ទាមទារ​នូវការខាតបង់ ដោយ​ក្រុមការងារនៅ​រង់ចាំទទួល​ដោះស្រាយជូនគ្រប់ពេលវេលា ៕
ដោយ៖ដេង ម៉ាវិន