ភ្នំពេញៈ គណបក្សប្រជាជនកម្ពុជានៅល្ងាចថ្ងៃទី៤ ខែមិថុនា ឆ្នាំ២០២៤ បានចេញសេចក្តីថ្លែងការណ៍ប្រកាស ទទួលយកនូវលទ្ធផលផ្លូវការនៃការបោះឆ្នោតជ្រើសរើសក្រុមប្រឹក្សារាជធានី ខេត្ត ក្រុមប្រឹក្សាក្រុង ស្រុក ខណ្ឌ អាណត្តិទី៤នេះ។

សេចក្តីថ្លែងការណ៍បានបញ្ជាក់ថា ការបោះឆ្នោតជ្រើសរើសក្រុមប្រឹក្សារាជធានី ខេត្ត ក្រុមប្រឹក្សាក្រុង ស្រុក ខណ្ឌ អាណត្តិទី ៤ កាលពី ថ្ងៃទី ២៦ ខែឧសភា ឆ្នាំ ២០២៤ បានប្រព្រឹត្តទៅយ៉ាងល្អប្រសើរ នៅក្នុងបរិយាកាសស្ងប់ស្ងាត់ សន្តិសុខ សុវត្ថិភាព និងមានសណ្តាប់ធ្នាប់ល្អ ។

គណៈកម្មាធិការជាតិរៀបចំការបោះឆ្នោត និងគណៈកម្មការរៀបចំការ បោះឆ្នោតគ្រប់ថ្នាក់បានអនុវត្តភារកិច្ចរបស់ខ្លួនយ៉ាងសកម្មប្រកបដោយឯករាជ្យ និងអព្យាក្រឹតស្របតាម រដ្ឋធម្មនុញ្ញ និងច្បាប់នៃព្រះរាជាណាចក្រកម្ពុជា។ គ្រប់គណបក្សនយោបាយដែលបានចុះឈ្មោះបោះឆ្នោត បានធ្វើសកម្មភាពដោយសេរី ប្រកបដោយភាពចាស់ទុំនយោបាយ។ សមាជិកក្រុមប្រឹក្សាឃុំ សង្កាត់ក្នុង តំណែងនៅទូទាំងប្រទេសបានចេញទៅបោះឆ្នោតដោយភាពរីករាយ ជឿជាក់ និងអាស្រ័យលើឆន្ទៈរបស់ខ្លួន។ លើមូលដ្ឋាននេះបានបង្ហាញច្បាស់ថា ការបោះឆ្នោតនេះមានលក្ខណៈសេរី ត្រឹមត្រូវ និងយុត្តិធម៌ទាំងស្រុង។ ព្រឹត្តិការណ៍ដ៏មានអត្ថន័យជ្រាលជ្រៅនេះ បានឆ្លុះបញ្ចាំងច្បាស់អំពីការប្តេជ្ញាចិត្តឥតរាថយរបស់កម្ពុជា ក្នុង ការអនុវត្តលទ្ធិប្រជាធិបតេយ្យ និងនីតិរដ្ឋ នៅលើមាគ៌ាសន្តិភាព និងអភិវឌ្ឍន៍។

គណបក្សប្រជាជនកម្ពុជា សូមប្រកាសជាឱឡារិកនូវការគោរព និងទទួលយកលទ្ធផលផ្លូវការនៃការ បោះឆ្នោតជ្រើសរើសក្រុមប្រឹក្សារាជធានី ខេត្ត ក្រុមប្រឹក្សាក្រុង ស្រុក ខណ្ឌ អាណត្តិទី៤ ដែលគណៈកម្មាធិ- ការជាតិរៀបចំការបោះឆ្នោតបានប្រកាសនៅថ្ងៃទី៤ ខែមិថុនា ឆ្នាំ ២០២៤ នេះ។ លទ្ធផលនៃការបោះឆ្នោតនេះ ពិតជាបានឆ្លុះបញ្ចាំងទាំងស្រុងនូវឆន្ទៈដ៏ថ្លៃថ្លារបស់ប្រជាជនកម្ពុជា តាមរយៈសមាជិក សមាជិកានៃក្រុម ប្រឹក្សាឃុំ សង្កាត់ ដែលជាតំណាងរបស់ខ្លួននៅគ្រប់មូលដ្ឋាន ក្នុងការបន្តជំរុញឱ្យបានកាន់តែខ្លាំងក្លាឡើងនូវ ការអភិវឌ្ឍសង្គម សេដ្ឋកិច្ច និងលើកកម្ពស់ជីវភាពរស់នៅរបស់ខ្លួន។

គណបក្សប្រជាជនកម្ពុជា សូមសម្តែងការគោរព និងដឹងគុណយ៉ាងជ្រាលជ្រៅបំផុតចំពោះ សមាជិក សមាជិកានៃក្រុមប្រឹក្សាឃុំ សង្កាត់ក្នុងតំណែងនៅទូទាំងប្រទេស ដែលបានអញ្ជើញទៅបោះឆ្នោតគាំទ្រ គណបក្សប្រជាជនកម្ពុជាយ៉ាងច្រើនលើសលប់បំផុត ធ្វើឱ្យគណបក្សកាន់តែមានឧត្តមភាពក្នុងការអនុវត្តនូវ កម្មវិធីនយោបាយ សម្រាប់ការកសាង និងការពារមាតុភូមិ ឆ្នាំ ២០២៣-២០២៨ ឱ្យសម្រេចជោគជ័យ ជា ពិសេសការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិ ឆ្លើយតបទៅនឹងសំណូមពរ សេចក្តីត្រូវការ និងការរំពឹងទុករបស់ប្រជាជន។

គណបក្សប្រជាជនកម្ពុជា សូមវាយតម្លៃខ្ពស់ចំពោះការយកចិត្តទុកដាក់របស់រាជរដ្ឋាភិបាល គណៈ បញ្ជាការសន្តិសុខអចិន្ត្រៃយ៍សម្រាប់ការបោះឆ្នោត និងអាជ្ញាធរមានសមត្ថកិច្ចគ្រប់លំដាប់ថ្នាក់ ដែលបានជួយគាំទ្រយ៉ាងសកម្មដល់ដំណើរការរៀបចំការបោះឆ្នោតឱ្យប្រព្រឹត្តទៅយ៉ាងរលូនប្រកបដោយជោគជ័យ។ ជាមួយនោះ ព្រម សូមថ្លែងអំណរគុណចំពោះអ្នកសង្កេតការណ៍ជាតិ និងអន្តរជាតិ អ្នកសារព័ត៌មានជាតិ និង អន្តរជាតិ ដែលបានសហការចូលរួមក្នុងដំណើរការនេះប្រកបដោយការទទួលខុសត្រូវ និងសូមថ្លែងអំណរគុណ ដ៏ជ្រាលជ្រៅចំពោះបងប្អូនជនរួមជាតិនៅគ្រប់ទិសទី ដែលបានយល់ច្បាស់អំពីសារៈសំខាន់នៃការបោះឆ្នោត នេះ ហើយបានចូលរួមថែរក្សាបរិយាកាសនយោបាយល្អទាំងមុនពេលបោះឆ្នោត ពេលបោះឆ្នោត និងក្រោយ ពេលបោះឆ្នោត។

គណបក្សប្រជាជនកម្ពុជា ប្តេជ្ញាជាឱឡារិកថា ក្រុមប្រឹក្សារាជធានី ខេត្ត ក្រុមប្រឹក្សាក្រុង ស្រុក ខណ្ឌ ដឹកនាំដោយគណបក្សប្រជាជនកម្ពុជា នឹងបម្រើយ៉ាងខ្ជាប់ខ្ជួននូវឆន្ទៈ និងផលប្រយោជន៍ដ៏ថ្លៃថ្លារបស់ប្រជាជន នៅគ្រប់មូលដ្ឋាន ដោយខិតខំអនុវត្តប្រកបដោយប្រសិទ្ធភាពនូវតួនាទី និងភារកិច្ចរបស់ខ្លួន ដើម្បីចូលរួម សកម្មក្នុងការសម្រេចគោលបំណងក្នុងការបង្កើត ការជំរុញ និងការធ្វើឱ្យមានចីរភាពដល់ការអភិវឌ្ឍតាម បែបប្រជាធិបតេយ្យ។

គណបក្សប្រជាជនកម្ពុជា សូមបញ្ជាក់ជាថ្មីជូនបងប្អូនជនរួមជាតិថា គណបក្សនឹងបន្តធ្វើអ្វីៗគ្រប់យ៉ាង ក្នុងលទ្ធភាពទាំងអស់របស់ខ្លួន ដើម្បីពង្រឹងធ្លុងសាមគ្គីភាព ឯកភាពជាតិ, ថែរក្សាសន្តិភាព ស្ថិរភាព នយោបាយ សន្តិសុខ សុវត្ថិភាពសង្គម និងសណ្តាប់ធ្នាប់សាធារណៈ, ការពារឯករាជ្យ អធិបតេយ្យ និង បូរណភាពទឹកដី, ការពាររបបរាជានិយមអាស្រ័យធម្មនុញ្ញ, លើកស្ទួយលទ្ធិប្រជាធិបតេយ្យ និងនីតិរដ្ឋ និង បន្តជំរុញការអភិវឌ្ឍប្រទេសជាតិឱ្យកាន់តែរីកចម្រើនឡើង ធ្វើឱ្យប្រជាជនមានជីវភាពកាន់តែសម្បូរសប្បាយ រស់នៅយ៉ាងសុខដុមរមនាក្នុងសង្គមប្រកបដោយការគោរពតម្លៃមនុស្ស សេរីភាព និងយុត្តិធម៌។

គណៈកម្មាធិការជាតិរៀបចំការបោះឆ្នោត (គ.ជ.

ប)នៅរសៀលថ្ងៃទី៤ ខែមិថុនា នេះបានប្រកាសជាផ្លូវការនូវ លទ្ធផល នៃ ការបោះឆ្នោតជ្រើសរើសក្រុមប្រឹក្សារាជធានី ក្រុមប្រឹក្សាខេត្ត ក្រុមប្រឹក្សាក្រុង ក្រុមប្រឹក្សាស្រុក ក្រុមប្រឹក្សា ខណ្ឌ ហៅកាត់ថា “ក្រុមប្រឹក្សា” អាណត្តិទី៤ ឆ្នាំ២០២៤ ។តាមរយៈលទ្ធផលបង្ហាញថា គណបក្សប្រជាជនកម្ពុជា ទទួលបានអាសនៈច្រើនលើស លប់លើគណបក្សនយោបាយចំនួន ៤ផ្សេង ទៀត។ក្នុងនោះ គណបក្សប្រជាជនកម្ពុជា ទទួលបានអាសនៈក្រុមប្រឹក្សារាជធានី ខេត្ត ចំនួន ៥០៤អាសនៈ និងអាសនៈ ក្រុម ប្រឹក្សាក្រុង ស្រុក ខណ្ឌ ទទួលបាន៣២៥៧អាសនៈ៕

ដោយ: វណ្ណលុក