ព្រះសីហនុ៖ ឯកឧត្តម ម៉ាង ស៊ីណែត អភិបាលខេត្តព្រះ​សីហនុ​​បាន​អញ្ជើញជួបសំណេះសំណាលជា​មួយ​មន្ត្រី​រាជការសាលាខេត្ត​ជាលើក​ដំបូងបន្ទាប់ពីត្រូវប្រកាសតែងតាំង​ជាអភិបាលខេត្តព្រះសីហនុកាលពីថ្ងៃទី៣ ខែកក្កដា ឆ្នាំ២០២៤។

ក្នុងជំនួបកាលពីថ្ងៃទី៨ ខែកក្កដា ឯកឧត្ដម ម៉ាង ស៊ីណេត បានថ្លែងថា រាជរដ្ឋាភិបាលកម្ពុជា បានកំណត់ចក្ខុវិស័យ​អភិវឌ្ឍន៍​ខេត្តព្រះសីហនុឱ្យក្លាយជាតំបន់សេដ្ឋកិច្ចពិសេស​គំរូពហុបំណងនិងជាខេត្តនៃកំណើនសេដ្ឋកិច្ចរបស់កម្ពុជា។ឯកឧត្តមស្នើឱ្យ​យក​ចិត្តទុកដាក់លើការ​កម្ពស់គុណភាពនៃ​ការផ្តល់សេវាសាធារណៈ តាមរយៈការពង្រឹង និងការកែលម្អ​ស្ថាប័ននៅថ្នាក់ក្រុង ស្រុក ឃុំ សង្កាត់ឱ្យក្លាយជារដ្ឋបាលទំនើប ស្អាតស្អំ និងមានសមត្ថភាព ស័ក្តិសមជារដ្ឋបាលបម្រើផល​ប្រយោជន៍ពិតប្រាកដ​របស់ប្រជាជន។

ឯកឧត្តមបញ្ជាក់ថា ត្រូវអនុវត្តវិធានការច្បាប់ ចំពោះមន្ត្រី​សាធារណៈរូបណាដែលបំពានក្រមសីលធម៌វិជ្ជាជីវៈ ឬរំលោភ បំពាន​អំណាចក្នុងការអនុវត្តតួនាទី ភារកិច្ចរបស់ខ្លួន ក្នុងនាមជាអ្នកបម្រើសេវាសាធារណៈជូនប្រជាពលរដ្ឋតាម អភិក្រម “ឆ្លុះកញ្ចក់ ងូតទឹក ដុះក្អែល ព្យាបាល និងវះកាត់ ” ៕
ដោយ៖ខៀវ សាវុន