ធនាគារជាតិបើកប្រជុំពិភាក្សាលើការសម្របសម្រួលការចរាចរណ៍ក្រដាសប្រាក់ដុល្លារចាស់នៅខេត្តសៀមរាប
សៀមរាប៖នាខេត្តសៀមរាប ធនាគារជាតិនៃកម្ពុជានៅថ្ងៃទី២៤ ខែកក្កដា ឆ្នាំ២០២៤ដោយមានវត្តមានចូលរួមពីឯកឧត្តម អ៊ូ ចាន់តារា អគ្គបេឡាធនាគារជាតិនៃកម្ពុជា លោក ឈឹម ច័ន្ទកុសល អគ្គបេឡារងបានបើកកិច្ចប្រជុំពិភាក្សាជាមួយបណ្តាគ្រឹះស្ថានធនាគារនិងហិរញ្ញវត្ថុ ស្ថាប័ន អង្គភាពពាក់ព័ន្ធ អាជីវករ តំណាងសេវាកម្មទេសចរណ៍ក្នុងខេត្តប្រមាណ១០០នាក់។
កិច្ចប្រជុំនេះដើម្បីសម្រួលចរាចរណ៍ក្រដាសប្រាក់ដុល្លារអាមេរិកចាស់ និងដាក់ចេញនូវវិធានការជាយន្តការបន្ទាន់សម្រាប់អនុវត្តនៅក្នុងខេត្តសៀមរាប។ឯកឧត្តម អ៊ូ ចាន់តារា អគ្គបេឡាធនាគារជាតិនៃកម្ពុជា បានប្រាប់កិច្ចប្រជុំថាថ្មីៗនេះធនាគារជាតិនៃកម្ពុជាបានដាក់ចេញនូវយន្តការចំនួនបួនចំណុចដើម្បីសម្រួលដល់ការចាយវាយក្រដាសប្រាក់ដុល្លារដែលមានសភាពចាស់ ទក់ ឬរហែកនៅក្នុងខេត្តសៀមរាប។
ធនាគារជាតិបានតម្រូវឱ្យធនាគារពាណិជ្ជនៅទូទាំងខេត្តសៀមរាបមិនត្រូវគិតថ្លៃកម្រៃសេវាបន្ថែមលើក្រដាសប្រាក់ដុល្លារដែលរហែក ទក់ ឬចាស់នោះទេ។ ឯកឧត្តមអគ្គបេឡាបន្ថែមថាការសម្រេចរបស់ធនាគារជាតិនេះ ធ្វើឡើង បន្ទាប់ពីសម្តេចធិបតី ហ៊ុន ម៉ាណែតនាយករដ្ឋមន្ត្រីកម្ពុជា សង្កេតឃើញពីការលំបាកក្នុងការលក់ដូររបស់ប្រជាពលរដ្ឋនៅក្នុងខេត្ត ពិសេសបានធ្វើឱ្យប៉ះពាល់ដល់ភ្ញៀវទេសចរបរទេស។
លោក ឈឹម ច័ន្ទកុសល អគ្គបេឡារងបានលើកឡើងថា ចាប់ពីពេលនេះទៅ ធនាគារជាតិនៃកម្ពុជា ស្នើឱ្យសាខាគ្រឹះស្ថានធនាគារនិងហិរញ្ញវត្ថុក្នុងខេត្តសៀមរាបទាំងអស់ទទួលយកប្រាក់ដុល្លារអាមេរិកចាស់ ខូចគុណភាព ដោយមិនគិតកម្រៃសេវាពីអតិថិជន។ ចំពោះក្រដាសប្រាក់ដុល្លារអាមេរិកដែលមានសភាពពុកផុយ កណ្តៀរកាត់ ភ្លើងឆេះ ប្រឡាក់ទឹកថ្នាំ ធនាគារជាតិនៃកម្ពុជាកំពុងពិភាក្សាជាមួយដៃគូក្រៅប្រទេសក្នុងការនាំយកក្រដាសប្រាក់ដុល្លារអាមេរិកទាំងនេះទៅការធ្វើកោសល្យវិច័យ ដើម្បីបន្ថយថ្លៃបង់សេវាឱ្យមានកម្រិតទាបជាងមុន។ លោកបានសំណូមពដល់ បងប្អូនអាជីវករ និងអ្នកបម្រើសេវាកម្មទេសចរណ៍ទាំងអស់ក្នុងខេត្តសៀមរាបប្រើប្រាស់ កម្មវិធីបាគង អេប (Bakong App) ដើម្បីងាយស្រួលទូទាត់ប្រាក់រៀលនិងប្រាក់ដុល្លារអាមេរិក។
សូមរំលឹកថា កាលពីថ្ងៃទី២១ ខែកក្កដាឆ្នាំ២០២៤ ធនាគារជាតិនៃកម្ពុជា បានដាក់ចេញនូវវិធានការមួយចំនួនដើម្បីអនុវត្តនៅក្នុងខេត្តសៀមរាបដែលរួមមានយន្តការបន្ទាន់និងយន្តការបន្តទៀត ។ក្នុងនោះយន្តការបន្ទាន់តម្រូវឱ្យសាខាធនាគារពាណិជ្ជខេត្តសៀមរាប ទទួលយកប្រាក់ដុល្លារអាមេរិកចាស់ឬប្រឡាក់ ដោយមិនទាមទារកម្រៃសេវាពីអតិថិជនលើកលែងតែប្រាក់នោះក្លែងក្លាយករណីក្រដាសប្រាក់នោះចាស់ខ្លំាងហើយគិតថាមិនអាចបន្តចរាចរលើទីផ្សារបានធនាគារពាណិជ្ជក្នុងខេត្តត្រូវបញ្ជូននិងប្តូរយកក្រដាសប្រាក់ថ្មីពីសាខាធនាគារជាតិខេត្តដោយពុំគិតកម្រៃសេវា។ដោយឡែកបណ្តាទូដក-ដាក់ប្រាក់(ATM)របស់គ្រឺះស្ថានធនាគារហិរញ្ញវត្ថុទាំងអស់ក្នុងខេត្តសៀមរាបតម្រូវឱ្យដាក់តែប្រភេទក្រដាស២០និង៥០ដុល្លាអាមេរិកជំនួសក្រដាស១០០ ដុល្លារអាមេរិក ដើម្បីសម្រួលការចាយវាយរបស់ភ្ញៀវទេសចរអន្តរជាតិ។សម្រាប់យន្តការបន្តគឺជំរុញការប្រើប្រាស់កម្មវិធីBakong Tourist Appដើម្បីគាំទ្រដល់វិស័យទេសចរណ៍និងសម្រួលដល់ការទូទាត់របស់ភ្ញៀវទេសចរអន្តរជាតិ។សហការជាមួយក្រុមហ៊ុនលក់ម៉ាស៊ីនរាប់ស្រាល់ជ្រើស ដើម្បីកំណត់លក្ខ័ណ្ឌស្តង់ដារមួយដែលមានសង្គតិភាពរវាងម៉ាស៊ីនរាប់ស្រាល់ជ្រើស របស់ធនាគារជាតិនៃកម្ពុជានិងធនាគារពាណិជ្ជ ក៏ដូចជារវាងម៉ាស៊ីនរបស់ធនាគារពាណិជ្ជនិងធនាគារពាណិជ្ជ។
សូមជម្រាបថែរថា យន្តការទាំងនេះ អនុវត្តក្នុងខេត្តសៀមរាបតែប៉ុណ្ណោះ។ ក្នុងករណីមានចម្ងល់ឬចង់ដឹងអំពីព័ត៌មានបន្ថែម សូមទំនាក់ទំនងតាមប្រព័ន្ធរយៈលេខទូរសព្ទ ហតឡាញ(Hotline) របស់សាខាធនាគារជាតិនៃកម្ពុជា ខេត្តសៀមរាប មានលេខ ០១៦ ៥៦៨ ១៧៥៕
ដោយ៖ ប៊ុន រដ្ឋា