តេហ្គូស៊ីហ្គាល់ប៉ា៖ ប្រមុខការទូតហុងឌូរ៉ាសថ្លែងថា ប្រធានាធិបតីហុងឌូរ៉ាស លោកស្រី Xiomara Castro កាលពីថ្ងៃអង្គារ បានជួបជាមួយអនុរដ្ឋមន្ត្រីការបរទេសចិន លោក Hua Chunying ពិភាក្សាពីការពង្រឹងទំនាក់ទំនងទ្វេភាគី និងចរចាកិច្ចព្រមព្រៀងពាណិជ្ជកម្មថ្មីមួយ។

រដ្ឋមន្ត្រីការបរទេសហុងឌូរ៉ាស លោក Enrique Reina បានប្រាប់អ្នកយកព័ត៌មានថា អនុរដ្ឋមន្ត្រីការបរទេសចិន លោក Hua Chunying បានមកបំពេញទស្សនកិច្ចក្នុងប្រទេសហុងឌូរ៉ាស ដើម្បីជំរុញកិច្ចការជាច្រើន។ លោក Reina បាននិយាយថា កិច្ចព្រមព្រៀងពាណិជ្ជកម្មដំបូងនឹងចូលជាធរមាននៅថ្ងៃទី១ ខែកញ្ញា ដែលតាមរយៈនោះ ប្រទេសចិននឹងអនុញ្ញាតឱ្យបង្គា កាហ្វេ ផ្លែឪឡឹក និងផលិតផលរបស់ហុងឌូរ៉ាសដទៃទៀត អាចនាំចូលទីផ្សារប្រទេសចិនដោយមិនគិតពន្ធ។

លោក Reina បន្ថែមថា នៅពេលបញ្ចប់កិច្ចព្រមព្រៀងពាណិជ្ជកម្មថ្មី នឹងបង្កើនទំហំពាណិជ្ជកម្មទ្វេភាគីចំនួន៨ដង បើធៀបនឹងអត្រាមុនពេលហុងឌូរ៉ាសបានបង្កើតទំនាក់ទំនងការទូតជាមួយចិនក្នុងឆ្នាំ ២០២៣។
កាលពីនៅខែមីនា ឆ្នាំ២០២៣ ហុងឌូរ៉ាសបានប្រកាសថា ខ្លួនកំពុងកាត់ផ្តាច់ទំនាក់ទំនងការទូតជាមួយកោះតៃវ៉ាន់ ដោយបញ្ចប់តួនាទីដែលខ្លួនកាន់កាប់អស់រយៈពេលជាង ៧០ឆ្នាំមកហើយ។

ក្រោយមក ហុងឌូរ៉ាសបានបង្កើតទំនាក់ទំនងជាមួយចិនភ្លាមៗ។ ប្រធានាធិបតីហុងឌូរ៉ាស លោកស្រី Xiomara Castro បានទៅបំពេញទស្សនកិច្ចនៅទីក្រុងប៉េកាំងកាលពីខែមិថុនា ដើម្បីជួបជាមួយសមភាគីចិន លោក ស៊ី ជីនពីង ដើម្បីបង្កើនទំនាក់ទំនងការទូតថ្មី។ ទោះបីជាយ៉ាងណា ប្រទេសចំនួន១២ នៅតែបន្តរក្សាទំនាក់ទំនងការទូតផ្លូវការជាមួយកោះតៃវ៉ាន់ ដោយក្នុងចំណោមនោះ មានប្រទេសចំនួន៧ ស្ថិតនៅទ្វីបអាមេរិកឡាទីន ឬតំបន់ការ៉ាប៊ីន៕ ប្រភព៖ AFP ប្រែសម្រួលដោយ៖ ឈឹម ទីណា