កំពង់ស្ពឺ៖ឯកឧត្តម ឌិត ឌីណា រដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទ បានលើកទឹកចិត្តផង និងជំរុញផង​ដល់​កសិករ​នៅខេត្តកំពង់ស្ពឺ​ឱ្យបង្កើន​ការផលិតពូជស្រូវសែន​ក្រអូប​ និងពូជស្រូវផ្កាម្លិះ​ដើម្បីឆ្លើយតបទៅនិងតម្រូវការទីផ្សារ​ក្នុងស្រុក​និងក្រៅ​ប្រទេស ខណៈបច្ចុប្បន្នពូជស្រូវនេះ កំពុងទទួលបានការចាប់អារម្មណ៍និងមានតម្លៃខ្ពស់។

ការលើកឡើងនេះក្នុងដំណើរពិនិត្យទិដ្ឋភាពជាក់ស្តែងនូវសមត្ថភាព គុណភាព បច្ចេកវិទ្យា​និងទំនើបកម្មរបស់រោងម៉ាស៊ីនកិន​ស្រូវនៅកម្ពុជា ក្នុងនោះនៅរោងម៉ាស៊ីនកិនស្រូវអប្សារារ៉ាយស៍(ខេមបូឌា ឯ.ក)និងរោងម៉ាស៊ីនកិនស្រូវព្រីម្លិះ ខបភើរេសិន ដែល​ជាសមាជិកសហព័ន្ធស្រូវអង្ករកម្ពុជា ស្ថិតក្នុងក្រុងឧដុង្គម៉ែជ័យ ខេត្តកំពង់ស្ពឺ កាលពីថ្ងៃទី២៣ ខែសីហា ឆ្នាំ២០២៤ ។ដំណើរ​ទស្សនកិច្ចនោះក៏បានការចូលរួមពីឯកឧត្តម ហែម វណ្ណឌី រដ្ឋមន្ត្រីក្រសួងឧស្សាហកម្ម វិទ្យាសាស្រ្ត បច្ចេកវិទ្យា និងនវានុវត្តន៍ និងលោកជំទាវ ចម និម្មល រដ្ឋមន្ត្រីក្រសួង​ពាណិជ្ជ​កម្មផងដែរ។

ឯកឧត្តម ឌិត ឌីណា បានលើកឡើងថា អង្ករផ្កាម្លិះរបស់កម្ពុជាបានជាប់ជ័យលាភីលំដាប់ថ្នាក់ពិភព​លោកក្នុងការ​ប្រកួតប្រជែង​វេទិកាស្រូវ-អង្ករពិភពលោក៥លើកមកហើយ។ជ័យលាភីនេះគឺដោយសារតែអង្ករកម្ពុជាមានរូបសម្បត្តិប្រវែង​គ្រាប់អង្ករ​ល្អស្មើគ្នា​ពណ៌​សភ្លឺរលោងស្អាត ការតុបតែងវេចខ្ចប់អង្ករមានលក្ខណៈទាក់ទាញ ។ក្រោយចម្អិន បាយមានភាពទន់ល្អក្លិនក្រអូបប្រហើរ​និងមានឱជារសឆ្ងាញ់។

ឯកឧត្តមរដ្ឋមន្ត្រីក្រសួងកសិកម្មក៏បានគូសបញ្ជាក់បន្ថែមថា ចំណែក​ពូជស្រូវសែនក្រអូបក៏ជាពូជស្រូវមួយប្រភេទរបស់កម្ពុជាដែល​កំពុងទទួល​បាន​ការចាប់អារម្មខ្លាំងផងដែរ ប៉ុន្តែកសិករហាក់មិនសូវ​ធ្វើការ​ដាំដុះនោះទេ ដោយសារតែចំណាយពេលវែង​និង​ហុចផល​មិនស័ក្តិសម ។បច្ចុប្បន្នកសិករនិយមដាំដុះស្រូវចម្រុះដែលចំណាយ​ពេលខ្លី ហើយទទួលបានទិន្នផលល្អ ។

ឯកឧត្តម ឌិត ឌីណា ក៏បានជំរុញដល់ម្ចាស់ច្រវាក់ផលិតកម្មឱ្យ​បង្កើនតម្លៃ​ទីផ្សារស្រូវសែនក្រអូបឱ្យបានខ្ពស់បន្ថែមទៀត ដើម្បីឱ្យ​កសិករ​មានទឹកចិត្តក្នុងការពង្រីកការផលិតឱ្យបានច្រើនសម្រាប់​ផ្គត់ផ្គង់ដល់ទីផ្សារស្រូវអង្ករ ពិសេសសម្រាប់ការផលិតនាំចេញ​ទៅលក់លើទីផ្សារពិភព៕

ដោយ៖ម៉ុន សំអាត