បាត់ដំបង៖ឯកឧត្តម សុខ លូ អភិបាលខេត្តបាត់ដំបងបានបញ្ជាក់ថា ដោយអនុវត្តតាមបទបញ្ជាដ៏ខ្ពង់ខ្ពស់របស់សម្តេចមហាបវរ ធិបតី ហ៊ុន ម៉ាណែត នាយករដ្ឋមន្តីនៃព្រះរាជាណាចក្រកម្ពុជាកាលពីថ្ងៃទី១៤​ខែ​កុម្ភៈឆ្នាំ២០២៤ និងស្របតាមសេចក្តី​ជូន​ដំណឹង​ចុះថ្ងៃទី២៣ខែឧសភា ឆ្នាំ២០២៤ របស់ក្រសួងមហាផ្ទៃ ស្តីពីការធ្វើបច្ចុប្បន្នភាពអំពីអាជីវកម្ម​ល្បែង​ឆ្នោត​ផ្សងសំណាង និងល្បែង​ស៊ីសងខុសច្បាប់គ្រប់ប្រភេទ , រដ្ឋបាលខេត្តបានចុះស្រង់ទិន្នន័យនិងធ្វើបច្ចុប្បន្នភាព ដោយបានរក​ឃើញ អាជីវកម្មល្បែងស៊ីសង​អនឡាញខុសច្បាប់ចំនួន ៣២៤ ទីតាំង​ហើយត្រូវបានបិទទាំងស្រុង។ឯកឧត្តមបញ្ជាក់​យ៉ាង​ដូច្នេះ​ក្នុងឱកាស​ប្រជុំការងារជាមួយ​ប្រធានក្រុមការងារពិសេសតាម​ដានការអនុវត្ត​គោលការណ៍​របស់នាយករដ្ឋមន្រ្តីពាក់ព័ន្ធការងារ​សន្តិសុខ​សណ្ដាប់​ធ្នាប់​សង្គម ដឹក​នាំ​ដោយឯកឧត្តមនាយឧត្តមសេនីយ៍ ជួន សុវណ្ណ រដ្ឋមន្រ្តី​ប្រតិភូអ​មនាយករដ្ឋមន្រ្តី​នៅសាលាខេត្តបាត់ដំបងកាល​ពីព្រឹក​ថ្ងៃទី២៨ ខែសីហា ឆ្នាំ២០២៤។

ពាក់ព័ន្ធនឹងករណីល្បែងស៊ីសង​តាមអនឡាញដដែលនេះ ឯកឧត្តម សុខ លូ បន្តថា អនុវត្តអនុសាសន៍និងការណែនាំ រដ្ឋបាលខេត្ត​បាត់ដំបងបានចុះស្រង់ទិន្នន័យនិងធ្វើបច្ចុប្បន្នភាព រួចបានរក​ឃើញមានចំនួន៩ក្រុមហ៊ុន និងមាន ៣២៦ទីតាំង ដែលបានបើក​អាជីវកម្មល្បែងស៊ីសងអនឡាញ។​ក្នុងនោះមានតែ២ទីតាំងប៉ុណ្ណោះ ដែលមានអាជ្ញាបណ្ណសាខា។ប៉ុន្តែអាជីវកម្មល្បែង​ស៊ីសងអន​ឡាញ ខុសច្បាប់ទាំងអស់នេះត្រូវបានបិទទាំងស្រុង ចំនួន ៣២៤​ទីតាំង។បច្ចុប្បន្នមានតែ​អាជីវកម្ម​ល្បែងស៊ីសងអន​ឡាញ ដែល មានអាជ្ញាបណ្ណ​សាខា ចំនួន​មួយទីតាំងតែប៉ុណ្ណោះ ដែលនៅបន្តដំណើរការអាជីវកម្ម គឺក្រុមហ៊ុន ឌីម វីន ខបភើរេសិន ដែលមាន​ទីតាំងស្ថិតនៅផ្លូវលេខ​១០១ ភូមិព្រែកមហាទេព សង្កាត់ស្វាយប៉ោ ក្រុងបាត់ដំបង និងមួយទីតាំង​ផ្សេងទៀត​បានបិទ​មិនដំណើរការទៀតទេ។

ក្នុងកិច្ចប្រជុំនេះដែរ ឯកឧត្តម​នាយ​ឧត្តមសេនីយ៍ ជួន សុវណ្ណ បាន​ក្រើនរំលឹកដល់រដ្ឋបាលខេត្តបាត់ដំបងនិងគ្រប់គណៈបញ្ជាការ​ឯកភាពរដ្ឋបាលក្រុង-ស្រុកទាំង១៤ គ្រប់កងកម្លាំងអាជ្ញាធរនិង​សមត្ថកិច្ចមូលដ្ឋានពាក់ព័ន្ធត្រូវធ្វើយ៉ាងណាទប់ស្កាត់កុំឱ្យកើត​មាន​នូវអាជីវកម្មល្បែងស៊ីសងអនឡាញខុសច្បាប់ ដែលអាចបើកដំណើរ​ការឡើងវិញបានក្នុងមូលដ្ឋានរបស់ខ្លួនឱ្យសោះ ខណៈនៅក្នុង​ខែកក្កដា​កន្លងទៅនេះ ក្រុមការងារ​ពិសេសបានរកឃើញ មានការរីករាលដាល​ឡើងវិញនូវទីតាំងអាជីវកម្ម​ល្បែងស៊ីសងអនឡាញ​ខុសច្បាប់៕

អត្ថបទ-រូបភាព៖ អ៊ុក សំអាន ប.ប