រដ្ឋបាលខេត្តកំពង់ចាមប្រារព្ធពិធីប្រណាំងទូក បណ្តែតប្រទីប អុចកាំជ្រួច និងតាំងពិព័រណ៍
កំពង់ចាម៖នៅព្រឹកថ្ងៃទី១៧ ខែតុលា ឆ្នាំ២០២៤ ឯកឧត្តម អ៊ុន ចាន់ដា អភិបាលខេត្តកំពង់ចាម និងឯកឧត្តម ខ្លូត ផន ប្រធានក្រុមប្រឹក្សាខេត្ត បានអញ្ជើញប្រារព្ធពិធីបើកការប្រណាំងទូក បណ្តែតប្រទីប អុចកាំជ្រួច នាវេទិកាអុំទូក នៅដងទន្លេមេគង្គ នៃភូមិជ្រោយថ្ម សង្កាត់បឹងកុក ក្រុងកំពង់ចាម។ក្នុងពិធីនេះក៏មានការតាំងពិព័រណ៍សមិទ្ធផលនានារបស់រដ្ឋបាលខេត្ត, រដ្ឋបាលក្រុង-ស្រុក ។
ព្រឹត្តិការណ៍ប្រណាំងទូកនៅខេត្តកំពង់ចាម ដូចគ្នាទៅនឹងខេត្តមួយ ចំនួនកំពុងប្រារព្ធដែរ ដូចជា ខេត្តកណ្ដាល ខេត្តបាត់ដំបង ជាដើម។
សូមជម្រាបថា ខេត្តកំពង់ចាមឆ្នាំនេះទូកដែលបានដាក់ពាក្យសុំចូលប្រកួតចំនួន ៥៩ទូក មកពីក្រុង ស្រុកទាំង១០ ។ក្នុងនោះទូកអុំបុរសខ្នាតវែង ២១ទូក ស្មើនឹង ១០គូ និងទូកខ្នាតអន្តរជាតិចំនួន ៣៨ទូក ស្មើនឹង ១៩គូ ។កីឡាករទូក មានចំនួន ២ ៣៩៦នាក់ និងកម្លាំងត្រៀម ៥៥៧នាក់ សរុបចំនួន ២ ៩៥៣នាក់ ។ចំពោះលក្ខខណ្ឌនៃការប្រណាំងទូក ង និងទូកខ្នាតអន្តរជាតិមានចម្ងាយ ១ ៧០០ម៉ែត្រ ដែលចាប់ផ្តើមអុំរយៈពេល១ថ្ងៃពេញ គឺនៅថ្ងៃទី១៧ ខែតុលា។ទូកជ័យលាភីលេខ១, លេខ២ និងលេខ៣ នឹងទទួលបានពានរង្វាន់ ។ក៏មានស្តង់តាំងពិព័រណ៍ជាង ១០០ស្តង់ និងការប្រគំតន្ត្រីនៅតាមសួន ច្បារមាត់ទន្លេ ក្នុងក្រុងកំពង់ចាមផងដែរ។ ការប្រគំតន្រ្តីនឹងមាន ផ្សាយ ផ្ទាល់លើកញ្ចក់ទូរទស្សន៍អប្សរា រៀងរាល់យប់ ចាប៉ពីម៉ោង០៧:៣០ នាទី ថ្ងៃទី១៧ ដល់ថ្ងៃ១៨ ខែតុលា ។
ឯកឧត្តមអភិបាលខេត្តកំពង់ចាម បញ្ជាក់ថា ការរៀបចំពិធីនេះ ដើម្បីថែ រក្សាប្រពៃណី លើកស្ទួយវិស័យកីឡាអុំទូក និងបង្កបរិយាកាស សប្បាយរីករាយ ជូនបងប្អូនប្រជាពលរដ្ឋក្រោមម្លប់សុខសន្តិភាព ៕
ដោយ៖លី ពៅ
