ពិធីប្រណាំងទូកនៅខេត្តកំពង់ធំបានបញ្ចប់ក្រោមស្នាមញញឹមនិងក្តីសប្បាយរីករាយ
កំពង់ធំ៖ពិធីប្រណាំងទូកនៅខេត្តកំពង់ធំបានប្រារព្ធបិទកាលពីរសៀលថ្ងៃទី១៧ ខែតុលា ឆ្នាំ២០២៤ ក្រោមអធិបតីភាពឯកឧត្ដម វង្សី វិស្សុត ឧបនាយករដ្ឋមន្ត្រីប្រចាំការ រដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រី និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តកំពង់ធំ និងលោកជំទាវ ឯកឧត្ដម ដៀប ពីរី ប្រធានក្រុមប្រឹក្សាខេត្ត ឯកឧត្ដម នួន ផារ័ត្ន អភិបាលខេត្តកំពង់ធំ ព្រមទាំងមន្ត្រីរាជការ មន្ត្រីមូលដ្ឋាន និងប្រជាពលរដ្ឋយ៉ាងច្រើនកុះករ ដែលមកចូលរួមទស្សនា និងអបអរសាទរ។
ពិធីប្រណាំងទូកខេត្តកំពង់ធំឆ្នាំនេះបានប្រព្រឹត្តទៅរយៈពេល ២ ថ្ងៃ ចាប់ពីថ្ងៃទី ១៦ ដល់ថ្ងៃទី ១៧ ខែតុលានៅលើដងស្ទឹងសែន ក្រុងស្ទឹងសែន ។ ក្រៅពីការប្រណាំងទូក ក៏មានកម្មវិធីបណ្តែតប្រទីប ការបាញ់កាំជ្រួច ការប្រគំតន្រ្តី និងការដាក់លក់ផលិតផលនានាជូនប្រជាពលរដ្ឋ អ្នកទេសចរជាតិ អន្តរជាតិទស្សនាកម្សាន្តផងដែរ។
ក្នុងពិធីបិទព្រឹត្តិការណ៍ប្រណាំង ឯកឧត្ដម នួន ផារ័ត្ន បានរាយការណ៍អំពីលទ្ធផលនៃការប្រកួតជូនគណៈអធិបតីថា ក្នុងឆ្នាំនេះមានទូកចូលរួមចំនួន ៦៥ ទូក រួមមានៈ ទូកវែង៩ទូក ទូកខ្នាតអន្តរជាតិ ៤១ ទូក និងទូកផ្កាចារ ១៥ ទូក ដែលមានកីឡាករ កីឡាការិនីសរុបចំនួន ២,០៦១ នាក់ ក្នុងនោះ មានកីឡាករបម្រុងចំនួន ៣៧០ នាក់។ ការរៀបចំពិធីនេះគឺដើម្បីបន្តថែរក្សាទំនៀមទំលាប់ ប្រពៃណីល្អៗ និងរំលឹកពីសមត្ថភាពរបស់កងទ័ពជើងទឹកជាថ្មី។
នៅក្នុងឱកាសនោះឯកឧត្តម វង្សី វិស្សុត និងលោកជំទាវ បានប្រគល់ពាន និងថវិកាជូនដល់ក្រុមទូកដែលបានជ័យជម្នះក្នុងនោះ
ទូកវែងបុរស៖ផែនលេខ១ ទទួលបាន ៤លានរៀល, ផែនលេខ២ ទទួលបាន ៣លានរៀលនិងផែនលេខ៣ទទួលបាន ២លាន រៀល។ចំណែកទូកវែងនារី៖ផែនលេខ១ ទទួលបាន ៤លានរៀល។
ចំពោះទូកខ្នាតអន្តរជាតិបុរស៖ផែនលេខ១ ទទួលបាន ១លាន៨សែនរៀល,ផែនលេខ២ ទទួលបាន ១លាន២សែនរៀលនិង ផែនលេខ៣ទទួលបាន ៨សែនរៀល។ទូកខ្នាតអន្តរជាតិនារី៖ផែនលេខ១ ទទួលបាន ១លាន៨សែនរៀល។
ចំណែកទូកផ្កាចារបុរស៖ផែនលេខ១ ទទួលបាន ១លាន២សែនរៀល,ផែនលេខ២ ទទួលបាន ៨សែនរៀលនិងផែនលេខ៣ ទទួលបាន ៦សែនរៀល។ទូកផ្កាចារនារី៖ផែនលេខ១ ទទួលបាន ១លាន២សែនរៀល,ផែនលេខ២ ទទួលបាន ៨សែនរៀល។
នៅក្នុងពិធីនេះ ឯកឧត្តម វង្សី វិស្សុត ក៏បានប្រកាសឧបត្ថម្ភថវិកាជូនរដ្ឋបាលខេត្តកំពង់ធំ សម្រាប់ការរៀបចំការប្រណាំងទូកនាពេលអនាគត៕
ដោយ៖ប៊ុនរដ្ឋា