(ភ្នំពេញ)៖បញ្ញាសិប្បនិម្មិតឬអេអាយ(AI) ជាបច្ចេកវិទ្យាមួយដែលជួយសម្រួលដល់​ការងាររបស់យើងបានច្រើនណាស់ និងវាបានផ្តល់នូវប្រយោជន៍ដ៏ធំធេង ក្នុងនេះដូច​ជាជួយកាត់បន្ថយតម្លៃ និងពេលវេលាជាដើម។

ឯកឧត្តមបណ្ឌិត សំសិទ្ធ សេរី អគ្គនាយកនៃអគ្គនាយកដ្ឋានបច្ចេកវិទ្យាគមនាគមន៍ និង​ព័ត៌មាននៃក្រសួងប្រៃសណីយ និង ទូរគមនាគមន៍បានថ្លែងនាចុងសប្តាហ៍កន្លង​មកនេះ​នៅក្នុងពេលបើកសិក្ខាសាលាពិគ្រោះយោបល់លើ​សេចក្តីព្រាង​”មគ្គុទេស​ក៍បន្ថែម​របស់អាស៊ានស្តីពីអភិបាលកិច្ច និងសីលធម៌បញ្ញាសិប្បនិម្មិតសម្រាប់​បញ្ញា​សិប្បនិម្មិតបង្កើតមាតិកា”ឱ្យដឹងថា៖សម្រាប់បច្ចុប្បន្នការអភិវឌ្ឍន៍ អេអាយ នៅ​កម្រិត​ទាប តែវាជិតដល់កម្រិតដូចមនុស្សហើយ (វាមិនទាន់អាចដូចមនុស្សទេ) ដែលវា​អាចត្រូវការដល់ឆ្នាំ២០៣០ឬ ២០៥០ទើបវាអាចវិវឌ្ឍន៍ដល់កម្រិតនេះបាន។ជាទូទៅនៅលើពិភពលោកគេចង់ឱ្យមានការប្រើប្រាស់ អេអាយឱ្យបានច្រើន។កាលណារឹតបន្តឹងពេកវាអត់បានធ្វើឱ្យមានការរីកចម្រើនខ្លាំងទេ។

ឯកឧត្តមបានលើកឡើងថា៖តាមពិតអេអាយមាន៣កម្រិតផ្សេងគ្នា ក្នុងនេះទី១ អេអាយ កម្រិតទាប ទី២កម្រិតដូចមនុស្ស។ សម្រាប់ អេអាយទាប គឺយើងជាអ្នក​បង្រៀនវា ឱ្យចេះ ឱ្យវាឆ្លាត ហើយវាមិនអាចគិតផ្សេងពីអ្វីដែលយើងបង្រៀនវាទេ។ដោយឡែកសម្រាប់ អេអាយ កម្រិតដូចមនុស្ស គឺវាមានសមត្ថភាពឆ្លាតដូចមនុស្ស​យើង​អញ្ចឹង ពោលគឺវាអាចសិក្សាពីបរិស្ថានជុំវិញ ហើយវាក៏អាចបង្កើតចំណេះ​ដឹង​ថ្មីៗ​ខ្លួនឯង។ បែបនេះហើយទើបវាអាចជួបហានិភ័យដោយសារការឆ្លាត​វាងវៃ​របស់វា។សម្រាប់ អេអាយ កម្រិតខ្ពស់គឺសមត្ថភាពរបស់វាលើសមនុស្ស ឆ្លាតលើសមនុស្ស។

ឯកឧត្តមបានបញ្ជាក់បន្ថែមថា ”បើយើងនិយាយ អេអាយ កម្រិតទាប គឺវាមិនសូវមាន​ហានិភ័យប៉ុន្មានទេ ពីព្រោះថា អេអាយ វាកើតឡើង ដោយសារ ការបង្ហាត់បង្រៀន របស់​មនុស្ស។គ្រឿងម៉ាស៊ីន បញ្ចូលទិន្នន័យដោយមនុស្សយើង ជាអ្នករៀបចំ។ អេអាយ បែបនេះការឆ្លាតរបស់វានៅមានកម្រិត មិនឆ្លាតខ្លាំងពេកទេ វាមិនអាចចេះ​ស្វ័យសិក្សា ខ្លួនឯង ។យល់ដឹងខ្លួនឯងបង្កើតជាចំណេះដឹងថ្មីអាចធ្វើអ្វីមួយខ្លួនឯង ពោលគឺវាចេះតែអ្វីដែលយើងបង្រៀនវាទេ ទាំងនេះគេហៅថា AIកម្រិតទាប”។

ឯកឧត្តមបណ្ឌិត សំសិទ្ធ សេរី បាននិយាយថា នៅក្នុងប្រទេសកម្ពុជា អេអាយបាន​ទទួលផលប្រយោជន៍ច្រើនគឺនៅពេលដែលយើងអាចចេះប្រើប្រាស់វា ប៉ុន្តែនៅពេល​ដែល​យើងមិនអាចប្រើប្រាស់វាបានច្រើននោះទេវានឹងជះផលអាក្រក់មកយើងវិញ។ចំណេះដឹងមូលដ្ឋានទៅលើបច្ចេកវិទ្យាឌីជីថលនេះសំខាន់ណាស់ ក្នុងការចាប់​យក​បច្ចេកវិទ្យា អេអាយដើម្បីប្រើជាប្រយោជន៍។

ឯកឧត្តមបណ្ឌិត សំសិទ្ធ សេរី បញ្ជាក់ប្រាប់ថា ”ក្នុងនេះដូចជាយើងធ្លាប់តែធ្វើការងារ ១០មក​តែវានឹងជួយសម្រួលឱ្យយើងធ្វើការត្រឹមតែ ១០នាទីទេ។បច្ចេកវិទ្យានេះ​វា​ជួយ​ដល់ពេលវេលាធ្វើការងារខ្លាំងណាស់។វាអាចជំនួយទៅលើបច្ចេកទេស និង​ជំនួយកិច្ចការផ្សេងៗទៀត”។

ទាក់ទិនទៅនឹងធនធានមនុស្សនៅកម្ពុជាពីបញ្ហា អេអាយ វិញត្រូវបាន ឯកឧត្តមគូស​បញ្ជាក់ថានៅមានកម្រិតទាបនៅឡើយ។ហេតុនេះក្រសួងប្រៃសណីយ៍​បានយក​ចិត្ត​ទុកដាក់យ៉ាងខ្លាំង ក្នុងការអភិវឌ្ឍន៍ធនធានមនុស្សទៅលើ អេអាយ និងវិទ្យាសាស្រ្ត​ទិន្នន័យ​ក្នុងនេះក្រសួងប្រៃសណីយ៍បានផ្តល់អាហាររូបករណ៍ដល់និស្សិតឆ្នើម ដើម្បី​អាចរៀនទាក់ទងទៅនឹងបច្ចេកវិទ្យាឌីជីថលជាពិសេស អេអាយ តែម្តង។ដូចជាក្នុងឆ្នាំ២០២៤នេះក្រសួងនឹងផ្តល់អាហាររូបករណ៍៥០០កន្លែងដែលជាអាហារូបករណ៍ទេពកោសល្យឌីជីថលតេជោ ដើម្បីឱ្យនិស្សិតឆ្នើមនិន្ទេស A B C អាចដាក់​ពាក្យចូលរួមប្រឡងយកអាហាររូបករណ៍នេះ។អាហាររូបករណ៍នេះនិស្សិត មិនត្រឹមទទួលបានរៀន ៤ឆ្នាំពេញ នៅសាកលវិទ្យាល័យធំៗនៅកម្ពុជាទេ ថែមទាំងអាចបាន កុំព្យូទ័រ យួរដៃ មួយគ្រឿងថែមទៀតដើម្បីធ្វើការសិក្សា។

ឯកឧត្តមបានថ្លែងឱ្យដឹងផងថា”កាលណាគ្រាប់ពូជល្អ និស្សិតឆ្នើម គាត់រៀនផ្នែក​ហ្នឹង​ទៅ​យើង​នឹង​ទទួលបានអ្នកជំនាញល្អ ។ជាងនេះទៀតយើងមានកម្ចីសិក្សា ។កម្ចីសិក្សានៅឆ្នាំនេះក្រសួងប្រៃសណីយ៍អាចមានប្រាក់កម្ចីរហូតដល់៣ពាន់កន្លែង ។មានន័យថាសិស្សានុសិស្សអាចខ្ចីក្រសួងទៅរៀននៅសាកលវិទ្យាល័យណាក៏បានហើ​យអត់ការប្រាក់ទេ។ពេលគាត់រៀនចប់រយៈពេល៤ឆ្នាំ ឬ៥ឆ្នាំបើគាត់ចេញ​ទៅ​ធ្វើការប្រាក់​ខែគាត់បានក្រោម៥០០ដុល្លារគាត់អត់មានបង់ត្រឡប់មកវិញទេ ប៉ុន្តែ​បើគាត់មានប្រាក់ខែលើសពី ៥០០ដុល្លារ គាត់អាចបង់២០ភាគរយនៃប្រាក់ខែ​របស់គាត់ត្រឡប់មកវិញដើម្បីឱ្យបានគ្រប់ដែលគាត់បានខ្ចីរយៈពេល៤ឆ្នាំ ។ អត់មានការប្រាក់អ្វីទាំងអស់ ក្រសួងធ្វើបែបនេះដើម្បីជួយលើកទឹកចិត្ត​ដល់និស្សិត​ខ្មែរយើងចាប់អារម្មណ៍ពីបច្ចេកវិទ្យាឌីជីថល និងចូលរួមអភិវឌ្ឍន៍ អេអាយ​នៅកម្ពុជា”។

គួរបញ្ជាក់ថាបញ្ញាសិប្បនិម្មិត-Artificial Intelligence អេអាយ(AI)គឺសំដៅលើ​ជ្រុងមួយ​នៃវិទ្យាសាស្រ្តកុំព្យូទ័រដោយផ្តោតទៅលើការបង្កើតសុសវែរ កម្មវិធី ឬ​ឧបករណ៍ឬធ្វើការជំនួសមនុស្សបាន ៕

ដោយ ៖ ម៉ាដេប៉ូ
រូបភាព ៖ សួងពិសិដ្ឋ