(កណ្ដាល) ៖ អនុវិទ្យាល័យហ៊ុនសែនអង្គស្នួល ដែលទើបបានបង្កើតឡើងដ៏ថ្មីស្រឡាងស្ថិតនៅក្នុងភូមិអង្គស្នួលទី១ ឃុំពើក ស្រុកអង្គស្នួល ខេត្តកណ្តាល ជាអំណោយដ៏ថ្លៃថ្លារបស់សម្ដេចអគ្គមហាសេនាបតីតេជោ ហ៊ុន សែន និងសម្ដេចកិត្តិព្រឹទ្ធបណ្ឌិត ប៊ុន រ៉ានី បានប្រារព្ធពិធីសម្ពោធដាក់ឲ្យដំណើរការ នាថ្ងៃទី២ ខែវិច្ឆិកា ឆ្នាំ២០២៤ ក្រោមអធិបតីភាព ឯកឧត្តម ភឺន ផល្លា ជំនួយការផ្ទាល់សម្ដេចអគ្គមហាសេនាបតីតេជោហ៊ុនសែន និងលោកជំទាវ សាយ សោភា តំណាងដ៏ខ្ពង់ខ្ពស់សម្តេចតេជោ ហ៊ុន សែន។

ឯកឧត្តម គួច ចំរើន អភិបាលនៃគណៈអភិបាលខេត្តកណ្តាល បានសម្តែងនូវការសាទរចំពោះសមិទ្ធិផលថ្មីបន្ថែមមួយនេះ ដែលជាឧត្តមប្រយោជន៍សម្រាប់ប្រជាពលរដ្ឋក្នុងមូលដ្ឋាន បានបញ្ជូនកូនចៅមកបន្តការសិក្សារៀនសូត្រឱ្យក្លាយទៅជាធនធានដ៏សម្បូរបែបរបស់ប្រទេសជាតិនាពេលខាងមុខ។

ឯកឧត្តម ភឺន ផល្លា បង្ហាញនូវក្តីសោមនស្សរីករាយក្រៃលែងដែលបានបំពេញការងារយ៉ាងយកចិត្តទុកដាក់ជូនប្រមុខរាជរដ្ឋាភិបាល នៅក្នុងមូលដ្ឋានស្រុកកំណើតរបស់ខ្លួន ពិសេសអគារសិក្សាជាសមិទ្ធិផលថ្មី ដែលជាអំណោយដ៏ថ្លៃថ្លារបស់សម្តេចទាំងទ្វេរ បានបង្ហាញរូបរាងយ៉ាងត្រដែតត្រដឹមនឹងសម្ពោធដាក់ឱ្យប្រើប្រាស់ជាផ្លូវការនាពេលនេះ។

គួរបញ្ជាក់ថា អនុវិទ្យាល័យ ហ៊ុន សែន អង្គស្នួល ស្ថិតនៅលើទីតាំងស្រះរំចេក ដែលមានទំហំផ្ទៃដី ៤៤៥១ ម៉ែត្រការេ ក្រោមការដឹកនាំជ្រោមជ្រែងកសាងដោយ ឯកឧត្តម ភឺន ផល្លានិងលោកជំទាវ សាយ សុភា បានចាប់ផ្តើមដំណើការសាងសង់ពីថ្ងៃទី២៤ ខែកុម្ភៈ ឆ្នាំ២០២៣ រហូតដល់ថ្ងៃទី ២៨ ខែមិថុនា ឆ្នាំ២០២៤ ជាទម្រង់អគារសិក្សា១ខ្នង ដែលមានកម្ពស់៣ជាន់ ស្មើនិង១៨ បន្ទប់ និងបានប្តូរឈ្មោះពីអនុវិទ្យាល័យ អង្គស្នួល មក អនុវិទ្យាល័យ ហ៊ុន សែន អង្គស្នួល។

អគារសិកស្សាថ្មីនេះមាន ២បន្ទប់ប្រើប្រាស់ជាទីចាត់ការ សាលប្រជុំ ៣បន្ទប់ បន្ទប់មុខវិជ្ជាពិសោធន៍ ១បន្ទប់ សម្រាប់បណ្ណាល័យ និងបន្ទប់នៅសល់ គឺសម្រាប់ថ្នាក់រៀនសិស្សនុសិស្សដែលសរុបទាំងការកសាងហេដ្ឋារចនាសម្ព័ន្ធផងនោះ មានទំហំទឹកប្រាក់ចំនួន ៥៥៨៩០៨.៥០ដុល្លារ ៕

ដោយ ៖ ង៉ាន់ ទិត្យ
រូបភាព ៖ រិន រចនា