បរទេស៖ នៅថ្ងៃពុធនេះ ក្រោយដឹងថាបានឈ្នះការបោះឆ្នោត ក្លាយជាប្រធានាធិបតីអាមេរិក លោក Donald Trump បានប្រកាសជ័យជម្នះ នៅក្នុងការបោះឆ្នោតនេះ ដោយបានថ្លែងកោតសរសើរ លោក Elon Musk ដែលបានជួយគាំទ្រដល់រូបលោក និងថែមទាំងព្រលយពាក្យថា « Elon Musk ជាតារាថ្មី» នេះបើតាម CNBC។

លោក Trump បានប្រាប់អ្នកគាំទ្រ នៅឯរដ្ឋ Florida ជាកន្លែងដែលរូបលោក ត្រូវបានអមដោយសមាជិកគ្រួសារថា «ខ្ញុំចង់អរគុណប្រជាជនអាមេរិកសម្រាប់កិត្តិយសដ៏អស្ចារ្យ ..យើងនឹងជួយប្រទេសរបស់យើង ឱ្យប្រសើរឡើងវិញ យើងនឹងកែលម្អអ្វីៗទាំងអស់ អំពីប្រទេសរបស់យើង»។ លោកបានថ្លែងថា «យើងបានបង្កើតប្រវត្តិសាស្ត្រនេះនឹងក្លាយជាយុគសម័យមាស របស់អាមេរិក»។

ឆ្លៀតពេលនោះ លោក Trump ថែមទាំងកោតបានសរសើរ នាយកប្រតិបត្តិក្រុមហ៊ុន Tesla លោក Elon Musk សម្រាប់ការគាំទ្រលោក នៅក្នុងយុទ្ធនាការ កន្លងមក។ លោកថា «យើងមានតារាថ្មី ផ្កាយមួយបានកើត នោះ គឺ Elon» ដែលគេស្គាល់ថា ជាបុរសមានបំផុត នៅលើពិភពលោក។

លោក Musk ត្រូវបានរាយការណ៍ បានបរិច្ចាគប្រាក់យ៉ាងតិច ១១៨លានដុល្លារ ដល់កិច្ចការឃោសនា គាំទ្រ លោក Trump និងថែមទាំងបានចូលរួមយុទ្ធនាការ ជាបន្តបន្ទាប់។ លោក Musk ថែមទាំងមានយុទ្ធនាការផ្តល់ប្រាក់ចំនួន ១ លានដុល្លារ ជារៀងរាល់ថ្ងៃ រហូតដល់ថ្ងៃបោះឆ្នោត ទៀតផង នេះបើតាម CNN៕

ប្រភពពី CNBC ប្រែសម្រួល៖ សារ៉ាត