(ភ្នំពេញ)៖តំបន់អេកូទេសចរណ៍ ចាហ៊ូ(Jahoo)ស្ថិតនៅដែនជម្រកសត្វព្រៃកែវសីមា ខេត្តមណ្ឌលគិរី ត្រូវបានជ្រើសរើស ដើម្បីប្រកួតប្រជែង សម្រាប់ពានរង្វាន់និរន្តរភាព របស់មូលនិធិ EXO Foundationនៅក្នុងប្រភេទ “Planet – Non-Profit/Social Enterprise”។ នេះបើតាមការឱ្យដឹងពី ទីភ្នាក់ងារជំនួយអាមេរិក USAID ។

ទីភ្នាក់ងារជំនួយអាមេរិក USAIDបានឱ្យដឹងនៅថ្ងៃទី១២ ខែ វិច្ឆិកាថា ចាហ៊ូ គឺជាស្ថាប័នតែមួយគត់របស់កម្ពុជា ដែលត្រូវបានជ្រើសរើសសម្រាប់ការប្រកួតប្រជែនក្នុងប្រភេទ “Planet – Non-Profit/Social Enterprise” នេះ ដែលបង្ហាញពីការប្តេជ្ញាចិត្តខ្ពស់របស់ ចាហ៊ូ ចំពោះវិស័យទេសចរណ៍ប្រកបដោយនិរន្តរភាពទូទាំងអាស៊ី ។

ដើម្បីបោះឆ្នោតយើងអាច អនុវត្ត ២ ជំហានសាមញ្ញៗខាងក្រោម៖
១. សូមចុចតំណរ៖ https://bit.ly/vote-for-jahoo ។
២. ជ្រើសរើស “Jahoo” បន្ទាប់មកបញ្ជូនជាការស្រេច ។
អ្នកអាចធ្វើការបោះឆ្នោត រហូតដល់ថ្ងៃទី២៥ ខែវិច្ឆិកា សូមចូលរួមទាំងអស់គ្នា ដើម្បីគាំទ្រវិស័យទេសចរណ៍ ធម្មជាតិ ប្រកបដោយនិរន្តរភាពនៅកម្ពុជា ក៏ដូចជាជួយដល់ Jahoo នាំយកពានរង្វាន់នេះមកកម្ពុជា ។

គួរបញ្ជាក់ថា៖ អង្គការ WCS បានផ្តួចផ្តើមសម្របសម្រួលរៀបចំបង្កើតសហគមន៍អេកូទេសចរណ៍អណ្តូងក្រឡឹង ហៅថា «ចាហ៊ូ» Jahoo នៅឆ្នាំ២០១៣ ហើយចាប់ផ្តើមអនុវត្តគម្រោងនៅឆ្នាំ២០១៤ ដើម្បីទាក់ទាញភ្ញៀវជាតិនិងអន្តរជាតិមកទស្សនាកំសាន្តតាមរយៈការដើរក្នុងព្រៃ និងលើកកម្ពស់ការយល់ដឹងនៃការអភិរក្សព្រៃឈើនិងសត្វព្រៃ។

ក្នុងឆ្នាំ២០១៨ អង្គការ WCS បានសហការជាមួយអង្គការ WHI និងទទួលការគាំទ្រពី USAID ក្នុងឆ្នាំ ២០២២ តាមរយៈសកម្មភាព USAID មរតកបៃតងក្នុងការអនុវត្តសកម្មភាពគម្រោងសហគមន៍អេកូទេសចរណ៍ ចាហ៊ូ នៅភូមិអណ្តូងក្រឡឹងមួយនេះ។ ជាលទ្ធផលតំបន់សហគមន៍អេកូទេសចរណ៍ ចាហ៊ូ ទទួលបានភ្ញៀវទេសចរណ៍ជាតិ និង អន្តរជាតិសរុបប្រមាណ២ ៤៤៧នាក់ និងរកចំណូលសរុបបានប្រមាណ ១៦៩ ៥៩៤ ដុល្លារអាមេរិក គិតចាប់ពីឆ្នាំ២០១៥ ដល់ឆ្នាំ២០២៤នេះ៕

ដោយ៖ម៉ាដេប៉ូ