(ភ្នំពេញ)៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា អនុប្រធានគណបក្សប្រជាជនកម្ពុជា និងជាប្រធានមហាសន្និបាតសន្និសីទអន្តរជាតិ នៃបណ្តាគណបក្សនយោបាយនៅអាស៊ី (ICAPP) លើកទី១២ អញ្ជើញជាអធិបតី និងថ្លែងសុន្ទរកថាគន្លឹះ ក្នុងពិធីបើកមហាសន្និបាត ICAPP លើកទី១២ ក្រោមប្រធានបទ «ការស្វែងរកសន្តិភាព និងការផ្សះផ្សា» នាព្រឹកថ្ងៃទី២២ ខែវិច្ឆិកា ឆ្នាំ២០២៤ ដោយមានការអញ្ជើញចូលរួមពីសំណាក់សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា ប្រធានគណបក្សប្រជាជនកម្ពុជា និងជាប្រធានកិត្តិយស ICAPP គណៈប្រតិភូជាន់ខ្ពស់ ICAPP តំណាងគណបក្សនយោបាយ ៥២ប្រទេស ព្រមទាំងភ្ញៀវកិត្តិយសជាតិ និងអន្តរជាតិជាច្រើនរូប ។

សូមជម្រាបថា ប្រទេសកម្ពុជា បានទទួលរៀបចំ ធ្វើជាម្ចាស់ផ្ទះ នៃចំមហាសន្និបាតសន្និសីទអន្តរជាតិ នៃបណ្ដាញគណបក្សនយោបាយនៅអាស៊ីលើកទី១២ និងកិច្ចប្រជុំពាក់ព័ន្ធ ចាប់ពីថ្ងៃទី២១ដល់ថ្ងៃទី២៤ ខែវិច្ឆិកា ឆ្នាំ២០២៤ នៅរាជធានីភ្នំពេញ ។

គណៈប្រតិភូដែលចូលរួមមានចំនួន ២៦៣រូប ក្នុងនោះ ប្រតិភូអន្តរជាតិមានចំនួន ៩៩រូប និងប្រតិភូកម្ពុជាចំនួន ៦៤រូប (គណៈប្រតិភូគណបក្សប្រជាជនកម្ពុជា មានចំនួន ៤៦រូប និងគណៈប្រតិភូគណបក្សហ៊្វុនស៊ិច មានចំនួន ១៨រូប ។

គណបក្សដែលចូលរួមមានចំនួន ៦២ គណបក្សនយោបាយ ក្នុងនោះ គណបក្សនយោបាយចំនួន ៥១ មកពីអាស៊ី , គណបក្សនយោបាយចំនួន ៤ មកពីអាហ្វ្រិក និងគណបក្សនយោបាយចំនួន ៧ មកពីអាមេរិកឡាទីន , ក្រុមគណបក្សនយោបាយ នៅអឺរ៉ុប គឺតំណាងដោយអ្នកប្រជាធិបតេយ្យនិយមកណ្តាល ( CDI ) ។

មហាសន្និបាតអន្តរជាតិ នៃបណ្តាគណបក្សនយោបាយ នៅអាស៊ី (ICAPP) គឺជាស្ថាប័ន នយោបាយដ៏សំខាន់មួយ នៅលើពិភពលោក ត្រូវបានបង្កើតឡើងក្នុងប្រទេស ហ្វីលីពីន កាលពីឆ្នាំ២០០០ ។ បច្ចុប្បន្ន ICAPP មានគណបក្សនយោបាយលើសពី ៣៥០ នៅក្នុងតំបន់អាស៊ី ជាសមាជិក ។

គណបក្សប្រជាជនកម្ពុជា គឺជាគណបក្សមួយ នៅក្នុងគ្រួសារ ICAPP ដែលទទួលធ្វើជាម្ចាស់ផ្ទះ មហាសន្និបាត ICAPP ចំនួន ២លើក ក្នុងនោះកម្ពុជា បានទទួលធ្វើជាម្ចាស់ផ្ទះរៀបចំមហាសន្និបាត ICAPP លើកទី៦ កាលពីឆ្នាំ២០១០ ក្រោមប្រធានបទ «ស្វែងរកអនាគត កាន់តែប្រសើរ និងមហាសន្និបាត ICAPP លើកទី១២ នាឆ្នាំ២០២៤ ក្រោមប្រធានបទ «ការស្វែងរកសន្តិភាពនិងការផ្សះផ្សា» ៕

អត្ថបទ ៖ វណ្ណលុក
រូបភាព ៖ វ៉េង លីមហួត និង សួង ពិសិដ្ឋ