បាងកក៖ បើតាមអនុប្រធានសមាគម «កាហ្វេពិសេសថៃ» ឬ Specialty Coffee Association បាននិយាយថា ប្រជាជនថៃមិនសូវទៅរកហាងកាហ្វេ ដែលមានតម្លៃលើស ពី១០០បាត ឬ ២.៩០ដុល្លារ ក្នុងមួយកែវ ព្រោះតែការធ្លាក់ចុះនៃសេដ្ឋកិច្ច នៅតែបន្តញាំញី នេះបើតាមការចេញផ្សាយ របស់កាសែត The Nation កាលពីថ្ងៃពុធ។

លោក Korn Sanguankeaw បានបន្តទៀតថា ហាងកាហ្វេមួយពែង តម្លៃក្រោម ១០០បាត មានកំណើនគួរឱ្យកត់សម្គាល់ ពោលគឺចន្លោះពី ៦០ ទៅ ១០០%។ លោកបានកត់សម្គាល់ពីការធ្លាក់ចុះ នៃការដឹកជញ្ជូនកាហ្វេ តាមរយៈ Grab ផងដែរ។ លោកបានបន្ថែមថា ពលរដ្ឋថៃ បច្ចុប្បន្ននេះ ចូលចិត្តកាហ្វេតម្លៃ ចន្លោះពី ១.៧០ដុល្លារ ទៅ ២.៣០ដុល្លារ ហើយទាល់ក្នុងឱកាសពិសេស ទើបពួកគេជ្រើសរើសយកកាហ្វេ ដែលមានតម្លៃថ្លៃជាងនេះ ដូចជា ពេលដែលត្រូវផ្តល់ការលើកទឹកចិត្តដល់ខ្លួនឯង ក្នុងឱកាស ដែលកម្រណាមួយ ជាដើម។

លោក Korn បានបន្តទៀតថា ដូចទៅនឹង គ្រាប់កាកាវ ដែរ តម្លៃគ្រាប់កាហ្វេពិភពលោក បានកើនឡើង ៧៤.៣% ធៀបនឹងឆ្នាំមុន ដោយសារការឡើងកំដៅផែនដី ជាមួយនឹងការធ្លាក់ចុះនៃផលិតភាពដំណាំកាហ្វេ ដែលនាំឲ្យស្ថានភាព កាន់តែអាក្រក់ទៅៗ ខណៈពន្ធនាំចូលនៅថៃ មាន៩០%លើគ្រាប់កាហ្វេ, ពន្ធលើតម្លៃបន្ថែម ៧ភាគរយទៀត។ លោកបានបន្ថែមថា គ្រាប់កាហ្វេដែលដាំដុះ នៅប្រទេសថៃ មិនទាន់គ្រប់គ្រាន់ ដោះស្រាយគម្លាតទីផ្សារ បាននោះទេ។

ទោះបីជាយ៉ាងណាក៏ដោយ អនុប្រធានសមាគម «កាហ្វេពិសេសថៃ» រូបនេះបានបញ្ជាក់ថា វិស័យហាងលក់ភេសជ្ជៈ ទាំងមូល មិនធ្លាក់ចុះឡើយ បើទោះបីជាអតិថិជនបន្ថយការចំណាយក៏ដោយ ព្រោះ អ្នកទទួលទាន ងាកទៅរកភេសជ្ជៈ ផ្សេងៗទៀត ដូចជា Smoothie ឬ សូកូឡាឌូបៃ ជាដើម នេះបើតាម The Nation ដដែល។

កាសែត Bangkok Post បានចេញផ្សាយ ថ្មីនេះថា បំណុលគ្រួសារថៃ បានឈានជិតដល់កម្រិតបំបែកកំណត់ត្រា ជាមួយនឹងការកើនឡើងប្រាក់កម្ចីខ្លាំង ដែលមានលើសពី ៥០០ពាន់លានដុល្លារអាមេរិក អូសទាញសេដ្ឋកិច្ចឲ្យធ្លាក់ចុះ៕

ប្រភពពី The Nation ប្រែសម្រួល៖ សារ៉ាត