បរទេស៖ ប្រទេសវៀតណាមបានអះអាង កាលពីចុងសប្តាហ៍ថា ខ្លួននឹងសាងសង់ផ្លូវរថភ្លើងល្បឿនលឿន តម្លៃ៦៧ពាន់លានដុល្លារ ពីទីក្រុងហាណូយ ទៅទីក្រុងហូជីមិញ ដែលត្រូវបានគេរំពឹងថា នឹងជំរុញកំណើន និងលើកកម្ពស់កេរ្តិ៍ឈ្មោះរបស់ខ្លួន ក្នុងចំណោមវិនិយោគិនបរទេស។

ផ្លូវដែក ដែលនឹងលាតសន្ធឹងជាង១,៥០០គីឡូម៉ែត្រ ពីរដ្ឋធានី នៅភាគខាងជើង ទៅកាន់មជ្ឈមណ្ឌលពាណិជ្ជកម្ម របស់ប្រទេស នៅភាគខាងត្បូង នឹងកាត់បន្ថយពេលវេលាធ្វើដំណើរបច្ចុប្បន្ន តាមរថភ្លើងធម្មតា ពី៣០ ម៉ោង ទៅប្រហែល ៥ម៉ោង។

សេចក្តីថ្លែងការណ៍មួយ នៅលើគេហទំព័ររបស់សភាវៀតណាម កាលពីថ្ងៃសៅរ៍ បាននិយាយថា «សភាជាតិបានបោះឆ្នោតអនុម័ត … ដំណោះស្រាយស្តីពីគោលនយោបាយវិនិយោគ សម្រាប់គម្រោងផ្លូវដែកល្បឿនលឿន នៅលើអ័ក្សខាងជើង-ខាងត្បូង» ។

ហេដ្ឋារចនាសម្ព័ន្ធដឹកជញ្ជូនរបស់វៀតណាមត្រូវបានចាត់ទុកថា មានភាពទន់ខ្សោយ ដោយបណ្តាញផ្លូវថ្នល់កំពុងតស៊ូឲ្យទាន់តាមតម្រូវការ ហើយប្រព័ន្ធផ្លូវដែក មិនទាន់មានការអភិវឌ្ឍន៍។ ដង់ស៊ីតេផ្លូវល្បឿនលឿនរបស់ខ្លួន គឺជាផ្នែកមួយទាបបំផុត នៅក្នុងតំបន់ បើទោះបីជាវៀតណាមកំពុងតែជំរុញពង្រីកផ្នែកនេះ ក៏ដោយ ខណៈពេលដែលតម្លៃដឹកជញ្ជូនតាមផ្លូវគោក គឺស្ថិតក្នុងចំណោមតម្លៃខ្ពស់បំផុត។

ប្រទេសនេះគឺជាទិសដៅ ដែលពេញនិយមកាន់តែខ្លាំងឡើង សម្រាប់ធុរកិច្ចបរទេស ​ប៉ុន្តែ ហេដ្ឋារចនាសម្ព័ន្ធ ដែលមានគុណភាពទាប ត្រូវបានគេមើលឃើញថា រារាំងការវិនិយោគ ដែលកំពុងកើនឡើង។

លោក Dan Martin ទីប្រឹក្សាធុរកិច្ចអន្តរជាតិ នៃក្រុមហ៊ុន Dezan Shira & Associates បាននិយាយថា គម្រោងនេះនឹង “ពង្រឹងសេដ្ឋកិច្ចវៀតណាម”។ លោក Martin បានប្រាប់ AFP ថា «នឹងធ្វើឱ្យកាន់តែងាយស្រួល ក្នុងការឈានទៅដល់មជ្ឈមណ្ឌលផលិតកម្ម តាមរយៈការពន្លឿនការដឹកជញ្ជូនទំនិញ ជំរុញការផលិត កាត់បន្ថយពេលវេលា និងពង្រឹងតួនាទីរបស់វៀតណាម ក្នុងខ្សែសង្វាក់ផ្គត់ផ្គង់សកល»៕

ប្រភពពី AFP ប្រែសម្រួល៖ សារ៉ាត