ប្រធានមន្ទីរសុខាភិបាលរាជធានីភ្នំពេញ អំពាវនាវដល់ អាជ្ញាធរដែនដី ត្រូវចាត់ការបិទទីតាំងអាជីវកម្មសុខាភិបាលភ្លាមៗ នៅពេលដឹងថា បើកដោយគ្មានច្បាប់អនុញ្ញាតិ
(ភ្នំពេញ)៖ លោក ងី មានហេង នាយកមន្ទីរសុខាភិបាលរាជធានីភ្នំពេញបានអំពាវនាវដល់មន្ត្រីស្រុកប្រតិបត្តិ អាជ្ញាធរសង្កាត់ ខណ្ឌ ព្រមទាំង បុគ្គលិកសុខាភិបាលគ្រប់ជាន់ថ្នាក់, អាជ្ញាធរដែនដីខណ្ឌ,សង្កាត់ទាំង១០៥ មិនត្រូវខ្លាចរឿងបិទទីតាំងអាជីវកម្មសុខាភិបាលណាដែលខុសច្បាប់ ព្រោះយើងមានច្បាប់ក្នុងដៃ និងមានការណែនាំពីថ្នាក់ដឹកនាំរួចហើយ ។
ក្នុងពិធីផ្សព្វផ្សាយការពង្រឹងនិយ័តកម្មសុខាភិបាល នារសៀលថ្ងៃទី១៨ធ្នូ ឆ្នាំ២០២៤នេះ លោក ងី មានហេង បានឲ្យដឹងថា ស្ថិតិសេវាសុខាភិបាលឯកជន ក្នុងខែវិច្ឆិកា ឆ្នាំ២០២៤ ក្នុងរាជធានីភ្នំពេញ ខ្នាតតូចមាន មានចំនួនសរុប ៣.៨៤៧ ទីតាំង,ស្ថិតិឱសថស្ថានឯកជនក្នុងខែវិច្ឆិកា មានចំនួន ១៨០៣កន្លែង, អាគារលក់ឱសថបូរាណមាន ៩២ទីតាំង ។
ឯកឧត្តម អ៊ឹមរ៉ន ហាស្សាន់ អភិបាលរង តំណាងឯកឧត្តម ឃួង ស្រេង អភិបាលនៃ គណៈអភិបាលរាជធានីភ្នំពេញដែលបានអញ្ជើញជាអធិបតីនាពេលនោះ មានប្រសាសន៍ថា អ្នកគ្មានវិជ្ជាជីវៈសុខាភិបាល មិនអាចផ្តល់សេវាសុខាភិបាលបានទេ បើប្រព្រឹត្តនោះជាអំពើខុសច្បាប់ ។
ឯកឧត្តមបន្តថា កន្លងមកយើងបានទប់ស្កាត់សេវាសុខាភិបាលឯកជនខុសច្បាប់ជាហូរហែរ ដូចជាបន្ទប់ពិគ្រោះព្យាបាលជំងឺខុសច្បាប់ មជ្ឈមណ្ឌលកែសម្ផស្សខុសច្បាប់ជាដើម។
ឯកឧត្តមអភិបាលរងរាជធានីភ្នំពេញបានក្រើនរំលឹកដល់អស់លោក លោកស្រីអភិបាលរងខណ្ឌទាំង១៤សង្កាត់ទាំង១០៥និងថ្នាក់ដឹកនាំមន្ទីរសុខាភិបាលព្រមទាំងបុគ្គលិក សុខាភិបាលគ្រប់ជាន់ថ្នាក់ត្រូវត្រួតពិនិត្យឡើងវិញមូលដ្ឋានសុខាភិបាលឯកជនទាំងអស់ដែលបានចែងក្នុងការណែនាំនិងផ្សព្វផ្សាយស្តីពីការពង្រឹងនិយ័តកម្មសុខាភិបាលឯកជននៅរាជធានីភ្នំពេញ ៕
ដោយ ៖ ហេង សម្បត្តិ+ថេត វិចិត្រ
