អភិបាលខេត្តបន្ទាយមានជ័យ ជំរុញឱ្យសមត្ថកិច្ចបង្កើនលើការអង្កេតមុខសញ្ញានិងទប់ស្កាត់ការជួញដូរមនុស្ស ខណៈប្រារព្ធទិវាជាតិប្រឆាំងការជួញដូរមនុស្ស
បន្ទាយមានជ័យ៖ ក្នុងទិវាជាតិប្រឆាំងការជួញដូរមនុស្ស ១២ធ្នូ ឆ្នាំ២០២៤ ខួបលើកទី១៨ ក្រោមប្រធានបទ៖” កម្ពុជាប្រឆាំងដាច់ខាតអំពើជួញដូរមនុស្សគ្រប់ទម្រង់ និងគ្រប់មធ្យោបាយក្នុងសម័យឌីជីថល” កាលពីព្រឹកថ្ងៃទី២៤ ខែធ្នូ ឆ្នាំ២០២៤ នៅសាលាខេត្តបន្ទាយមានជ័យ ឯកឧត្តម អ៊ុំ រាត្រី អភិបាលខេត្ត ជំរុញឱ្យកម្លាំងសមត្ថកិច្ចនៅតាមព្រំដែនបង្កើនលើការអង្កេតមុខសញ្ញាមេខ្យល់ ក៏ដូចជាទប់ស្កាត់នូវការជួញដូរមនុស្ស ។
ក្នុងឋានៈជាប្រធានគណៈកម្មាធិការខេត្តប្រយុទ្ធប្រឆាំងអំពើជួញដូរមនុស្សផង ឯកឧត្តម អ៊ុំ រាត្រី បានប្រាប់អ្នកចូលរួមមានសមាសភាពចម្រុះថា ទិវានេះបានបង្ហាញនូវការរួបរួមសាមគ្គីពីគ្រប់តួអង្គពាក់ព័ន្ធ ក្នុងឆន្ទៈតែមួយហើយមាន ភារកិច្ចប្រយុទ្ធប្រឆាំងអំពើជួញដូរ មនុស្សគ្រប់ទម្រង់និងគ្រប់មធ្យោបាយក្នុងសម័យឌីជីថល ។
លោកបានបន្ថែមថា រឿង ចាំបាច់មិនអាចខ្វះបាន ការផ្សព្វផ្សាយការយល់ដឹងអំពីស្ថានភាពនិងទម្រង់ផ្សេងៗនៃបទល្មើស ជួញដូរមនុស្សនិងអំពើពាក់ព័ន្ធដទៃទៀត កលល្បិចជនល្មើស ព្រមជាមួយនឹងវិធីសាស្ត្របង្ការឱ្យទូលំទូលាយទៅដល់ប្រជាពលរដ្ឋ ដើម្បីទប់ស្កាត់និងការពារខ្លួន និងការពារសហគមន៍ឱ្យរួចផុតពីភាពរងគ្រោះទាំងអស់នេះ ។
ជារឿយៗខេត្តបន្ទាយមានជ័យដែលមានព្រំដែនជាប់ជាមួយប្រទេសថៃ តែងតែកើតឡើងជាញឹកញាប់នូវសកម្មភាពនាំពលករឆ្លងដែនដោយខុសច្បាប់ និងអំពើបោកប្រាស់ពីពលករដែលស្វែងរកការងារធ្វើ ។
ឯកឧត្តម អ៊ុំ រាត្រី បានអំពាវនាវដល់ថ្នាក់ដឹកនាំ មន្ត្រីរាជការគ្រប់លំដាប់ថ្នាក់ កម្លាំង សមត្ថកិច្ច អាជ្ញាធរគ្រប់មូលដ្ឋាន ត្រូវបន្តបំពេញភារកិច្ចតាមតួនាទី ខិតខំតាមដានបាតុភាពនិងបទល្មើសផ្សេងៗឱ្យបានជាប្រចាំ។ពិសេសសមត្ថកិច្ចនៅតាមបណ្តាអង្គភាពត្រួតពិនិត្យច្រកទ្វារព្រំដែន កម្លាំងឈរជើងតាមខ្សែបន្ទាត់ព្រំដែន ត្រូវបង្កើនការទទួលខុសត្រូវ ដោយយកចិត្តទុកដាក់ គ្រប់គ្រងព្រំដែន និងលំហូរឆ្លងកាត់ព្រំដែនគ្រប់ទីតាំងឱ្យបានគត់ម៉ត់ ដើម្បីទប់ស្កាត់មូលហេតុ រួមផ្សំ ដែលនាំឱ្យមានអំពើជួញដូរមនុស្សនិងការរំលោភបំពានផ្សេងៗ.
តាមរបាយការណ៍របស់លោកស្រី រស់ សុផានី អភិបាលរងខេត្ត និងជាប្រធានលេខាធិការដ្ឋានគ.ខ.ប.ជ បានបង្ហាញលទ្ធផលនៃការអនុវត្តការងារប្រយុទ្ធប្រឆាំងអំពើជួញដូរ មនុស្សថ្នាក់ខេត្តក្នុងឆ្នាំ ២០២៤។លោកស្រីបញ្ជាក់ថា គិតត្រឹមខែតុលាកន្លងទៅគណៈកម្មាធិការប្រយុទ្ធប្រឆាំងអំពើជួញដូរមនុស្សថ្នាក់ ខេត្ត បានប្រតិបត្តិការតាមយុទ្ធសាស្ត្រ ទាំងបួន នៃផែនការសកម្មភាពជាតិប្រយុទ្ធប្រឆាំងអំពើជួញដូរមនុស្ស ៥ឆ្នាំ ២០២៤-២០២៨ រួមមាន៖ការអប់រំ ,ការផ្សព្វផ្សាយដោយផ្ទាល់ និងតាមបណ្ដាញសង្គម និងកម្មវិធីនានា មានទាំងយុទ្ធនាការ តាមរយៈកិច្ចប្រជុំ និងវេទិកាផ្សព្វផ្សាយសាធារណៈ ការអនុវត្តគោលនយោបាយ ភូមិ ឃុំសុវត្ថិភាព។
លោកស្រីបន្តថា ក្នុងរយៈពេល ១០ខែនៃឆ្នាំនេះសមត្ថកិច្ចនគរបាលយុត្តិធម៌ បានបង្ក្រាបបទ ល្មើសពាក់ព័ន្ធនឹងច្បាប់ស្តីពីការបង្ក្រាបអំពើជួញដូរមនុស្ស និងអំពើធ្វើអាជីវកម្មផ្លូវភេទបានចំនួន៤៤ករណីធៀបនឹងឆ្នាំ២០២៣កើនឡើង១៨ករណី ស្មើ៤១ភាគរយ ដោយបានឃាត់ខ្លួនជនសង្ស័យចំនួន ៤៨ នាក់ (ស្រីមួយនាក់, អនីតិជន៣នាក់)។ដោយឡែកស្ថាប័នតុលាការ និងអយ្យការអមសាលាដំបូងខេត្ត បានចំណាត់ការលើរឿងក្តីពាក់ព័ន្ធ នឹងច្បាប់ស្តីពីការបង្ក្រាបអំពើជួញដូរមនុស្ស និងអំពើធ្វើអាជីវកម្មផ្លូវភេទយ៉ាងសកម្ម និងបានពន្លឿនទៅតាមនីតិវិធីផងដែរ ៕
ដោយ៖ គៀន ច័ន្ទហ៊ីន
