បរទេស៖ លោក ​Jimmy Carter​ អតីតប្រធានាធិបតីអាមេរិក និងជាម្ចាស់ជ័យលាភីណូបែលសន្តិភាព បានទទួលមរណៈភាព នៅអាយុ ១០០ឆ្នាំ កាលពីថ្ងៃអាទិត្យ។

លោក ​Jimmy Carter​ ដំបូងឡើយ គ្រាន់តែជាកសិករដាំសណ្តែកដី នៅរដ្ឋ ​Georgia​ ភាគខាងត្បូង មុនពេលដែលលោកបានប្រែក្លាយ ទៅជាអ្នកនយោបាយ និងក្លាយជាអភិបាលរដ្ឋ។ លោក Carter ដែលជាអ្នកប្រជាធិបតេយ្យ បានឈ្នះការបោះឆ្នោតប្រធានាធិបតី នៅឆ្នាំ១៩៧៦ និងបានបម្រើការជាប្រធានាធិបតីសហរដ្ឋអាមេរិកទី៣៩ ចន្លោះឆ្នាំ១៩៧៧ និង ឆ្នាំ១៩៨១។

លោក Carter បានទទួលរង្វាន់ណូបែលសន្តិភាព ក្នុងឆ្នាំ២០០២ សម្រាប់កិច្ចខិតខំប្រឹងប្រែងជាច្រើនឆ្នាំរបស់លោក ក្នុងការនាំយកដំណោះស្រាយ ដោយសន្តិវិធីចំពោះជម្លោះ ដែលមានទាំងបញ្ហានុយក្លេអ៊ែរកូរ៉េខាងជើង ព្រមទាំង ស្នាដៃផ្តល់ជំនួយមនុស្សធម៌របស់លោក។

អតីតប្រធានាធិបតីអាមេរិករូបនេះ បានទទួលការថែទាំសុខភាព នៅផ្ទះ ស្ថិតក្នុងរដ្ឋ ​Georgia​ ចាប់តាំងពីខែកុម្ភៈ ឆ្នាំ២០២៣។ លោកបានចំណាយពេល ដែលនៅសល់របស់លោក ជាមួយសមាជិកគ្រួសារ មុនពេលស្លាប់ នៅរសៀលថ្ងៃអាទិត្យ។

ប្រធានាធិបតីអាមេរិក ​Joe Biden​ បាននិយាយថា អាមេរិក និងពិភពលោក «បានបាត់បង់មេដឹកនាំ ដ៏គួរឱ្យកត់សម្គាល់» ។ លោក Biden បានបន្តថា លោក ខាតធើ គឺជាឧទាហរណ៍នៃ «ភាពសមរម្យសាមញ្ញ ហើយខ្ញុំគិតថា នោះជាអ្វីដែលពិភពលោកទាំងមូល សម្លឹងមើល ទៅសហរដ្ឋអាមេរិក»៕

ប្រភពពី NHK ប្រែសម្រួល៖ សារ៉ាត