ភ្នំពេញ៖ ព្រឹត្តិការណ៍ការប្រកួតកីឡាតេក្វាន់ដូជ្រើសរើសជើងឯក ស.ស.យ.ក លើកទី១ ដែលបានប្រព្រឹត្តិទៅរយៈពេល២ថ្ងៃ ក្រោមការរៀបចំរួមគ្នា ៣ស្ថាបប័ន .មានសមាគមន៍តេក្វាន់ដូរាជធានីភ្នំពេញ សម្ព័ន្ធកីឡាតេក្វាន់ដូនាគរាជ ខ្មែរ អាមេរិកកាំង និង សហភាពសហព័ន្ធយុវជនកម្ពុជារាជធានីភ្នំពេញ បានបញ្ចប់ដោយជោគជ័យ ខណៈការចូលរួមលើសការរំពឹងទុកមានកីឡាករកីឡាការិនីមានរហូតដល់១៣០០នាក់។
លោក ប៉ាល់ កេតឆែកូវ៉ា ប្រធានសម្ព័ន្ធកីឡាតេក្វាន់ដូនាគរាជ ខ្មែរ អាមេរិកកាំង បានថ្លែងថា នេះជាឆ្នាំដំបូងនៃកិច្ចសហការរួមគ្នា៣ស្ថានប័ន ក្នុងគោលដៅបំផុសចលនាតេក្វាន់ដូនៅក្នុងសាលារៀនរបស់រដ្ឋ ហើយឆ្នាំក្រោយៗទៀត ពួកយើងរំពឹងនឹងរៀបចំធំជាងឆ្នាំទី១នេះទៅទៀត ដើម្បីកៀគរថវិកាក្រុមហ៊ុនដៃគូ ទិញសម្ភារៈហ្វឹកហាត់តេក្វាន់ដូជូនកីឡាករកីឡាការិនីនៅតាមសាលារដ្ឋឱ្យទទួលបានឱកាសចូលរួមហ្វឹកហាត់។
អ្នកជំនាញតេក្វាន់ដូខ្សែក្រវាត់ខ្មៅ៩ដាន់រូបនេះ បានពន្យល់ទៀតថា ការបញ្ជ្រាបឱ្យនៅតាមសាលារបស់រដ្ឋបានហ្វឹកហាត់តេក្វាន់ដូ មិនមានន័យថា ឱ្យកូនសិស្សហាត់ហើយចេះវាយតប់គ្នានោះទេ ពោលសិស្សហាត់តេក្វាន់ដូ គឺទទួលបាននូវការអប់រំ ក្រមសីល៌ធម៌ និងវិន័យការរស់នៅល្អ។ទន្ទឹមជាមួយគ្នានេះ ប្រធានសម្ព័ន្ធកីឡាតេក្វាន់ដូនាគរាជ ខ្មែរ អាមេរិកកាំង ក៏បានថ្លែងអំណរគុណដល់ ឯកឧត្តម ជ័យ ចាប ប្រធានសមាគមន៍តេក្វាន់ដូរាជធានីភ្នំពេញ និង ឯកឧត្តម សាយ សំអាល់ ប្រធានសហភាពសហព័ន្ធយុវជនកម្ពុជារាជធានីភ្នំពេញ និងថ្លែងអំណរគុណយ៉ាងជ្រាលជ្រៅដល់សម្តេចតេជោ និងសម្តេចបវរធិបតី ហ៊ុន ម៉ាណែត ដែលលោកទាំងទ្វេរ បាននាំមកនូវសុខសន្តិភាពជូនប្រទេស កីឡារស់ក្នុងសន្តិភាព។
លោក សំ សុខយី អគ្គលេខាធិការ សមាគមន៍តេក្វាន់ដូ រាជធានីភ្នំពេញ ថ្លែងគូសបញ្ជាក់ថា ព្រឹត្តិការណ៍ការប្រកួតតេក្វាន់ដូនេះ ពិតជាបានផ្តល់អត្ថប្រយោជន៍ខ្លាំងណាស់ចំពោះសិស្សនៅតាមសាលារដ្ឋ ។ទី១ចំនេញទៅលើការអប់រំដល់សិស្ស និងទី២ ជាការចូលរួមបណ្តុះបណ្តាលតេក្វាន់ដូនេះដល់ថ្នាលនិស្ស័យតេក្វាន់ដូឆ្ពោះទៅមានសក្កានុពលចូលរួមការប្រកួតថ្នាក់ជាតិនិងអន្តរជាតិ ជាពិសេសឆ្ពោះទៅកីឡាយុវជនអាស៊ីលើកទី៥ ដែលកម្ពុជាទទួលធ្វើជាម្ចាស់ផ្ទះឆ្នាំ២០២៩។
លោក បែ មករា តំណាង ឯកឧត្តម ឧបនាយករដ្ឋមន្រ្តី សាយ សំអាល់ ប្រធានសហភាពសហព័ន្ធយុវជនកម្ពុជា បានកោតសសើរនិងវាយតម្លៃខ្ពស់ ចំពោះសមាគមន៍តេក្វាន់ដូរាជធានីភ្នំពេញ និង សម្ព័ន្ធកីឡាតេក្វាន់ដូនាគរាជ ខ្មែរ អាមេរិកកាំង បានខិតខំរៀបចំកម្មវិធីប្រកួតនេះឡើង ជាការផ្តល់ឱកាសឱ្យក្មួយៗកីឡាករកីឡាការិនីដែលជាទំពាំងស្នងឬស្សីជំនាន់ក្រោយបានចូលរួមប្រកួតប្រជែងក្នុងការបណ្តុះមនៈសិកា និងឆន្ទៈលើកស្ទួយវិស័យកីឡានៅកម្ពុជាឱ្យកាន់តែមានភាពរីកចម្រើនបន្ថែមទៀត។ ការប្រកួតនេះ គឺជាយានចម្លងមួយដ៏មានសក្កានុពលក្នុងការចូលរួមរុញច្រានដល់កីឡាករកីឡាការិនីរបស់យើងឱ្យបន្តខិតខំហ្វឹកហាត់ពង្រឹងសមត្ថភាព និងកាយសម្បទាប្រាជ្ញាស្មារតី និងភាពអង់អាចក្លាហានដើម្បីឈានទៅចាប់យកអាជីពជាកីឡាករកីឡាការិនីជម្រើសជាតិឬក្លាយជាគ្រូបង្វឹក នាថ្ងៃអនាគត។
គួរឱ្យដឹងដែរថា ព្រឹត្តិការណ៍ការប្រកួតកីឡាតេក្វាន់ដូជ្រើសរើសជើងឯក ស.ស.យ.ក លើកទី១នេះ បានរៀបចំឡើង ដើម្បីអបអរសាទរទិវាជ័យជម្នះ៧មករា ១៩៧៩ និង៧មករា ២០២៥ ខួបអនុស្សារវីយ៍លើកទី៤៦ឆ្នាំ នៃការទទួលបានជោគជ័យទាំងស្រុងការផ្តួលរំលំរបបកម្ពុជាប្រជាធិបតយ្យកាន់អំណោយដោយប៉ុលពត។ការប្រកួតនេះ បានស្តែងចេញបង្ហាញឱ្យយុវជនជំនាន់ក្រោយចងចាំថា អ្វីៗទាំងអស់ផ្តើមចេញពីថ្ងៃជ័យជម្នះ៧មករា ១៩៧៩ និងក្រោមមាគាដឹកនាំដ៏ត្រឹមត្រូវរបស់សម្តេចតេជោ ហ៊ុន សែន អតីតនាយករដ្ឋមន្រ្តីនៃព្រះរាជាណាចក្រកម្ពុជា ធ្វើឱ្យស្រុកទេសទទួលបាននូវសុខសន្តិភាព និងមានការអភិវឌ្ឍគ្រប់វិស័យ ក្នុងនោះក៏មានវិស័យកីឡាផងដែរ៕

ថតដោយ ៖ មឿង គឹមរ៉ុង
អត្ថបទ ៖ ជាវ ចន្ធូ