រដ្ឋមន្ត្រីក្រសួងដែនដី៖ ចាប់ពីពេលនេះតទៅ ប្រជាពលរដ្ឋអាចទទួលសេវាផ្សេងៗតាមប្រព័ន្ធអនឡាញពីក្រសួង ដែលមានភាពងាយស្រួល លឿនរហ័ស និងជឿទុកចិត្តបាន
ភ្នំពេញ៖ ឯកឧត្តមឧបនាយករដ្ឋមន្ត្រី សាយ សំអាល់ រដ្ឋមន្រ្តីក្រសួងរៀបចំដែនដី នគរូបនីយកម្ម និងសំណង់ បានបញ្ជាក់ថា ក្រសួងបានដាក់ឱ្យដំណើរការនូវសេវាគាប់ចិត្តជូនដល់ប្រជាពលរដ្ឋ ។ដូច្នេះចាប់ពីពេលនេះតទៅ ប្រជាពលរដ្ឋអាចទទួលសេវាផ្សេងៗតាមតម្រូវការរបស់ខ្លួនតាមរយៈប្រព័ន្ធអនឡាញពីក្រសួងដែលមានភាពងាយស្រួល លឿនរហ័សនិងជឿទុកចិត្តបាន ។
ឯកឧត្តមឧបនាយករដ្ឋមន្ត្រី សាយ សំអាល់ បានបញ្ជាក់ចំណុចថ្មីសន្លាងនេះក្នុងសិក្ខាសាលាផ្សព្វផ្សាយសេវាអនឡាញរបស់ក្រសួងរៀបចំដែនដី នគរូបនីយកម្ម និងសំណង់ និងការរៀបចំឥណទានក្នុងវិស័យសំណង់និងអចលនទ្រព្យ កាលពីព្រឹកថ្ងៃទី ១៥ ខែមករា ឆ្នាំ២០២៥ នៅទីស្ដីការក្រសួង ។
ទាក់ទងនឹងសិក្ខាសាលានេះដែរ ឯកឧត្តមឧបនាយករដ្ឋមន្ត្រី សាយ សំអាល់ បានដៅចំណុចសំខាន់ថា ក្នុងគោលបំណងផ្សព្វផ្សាយពីសេវាសាធារណៈដែលបានដាក់ដំណើរការតាមប្រព័ន្ធអនឡាញជូនប្រតិបត្តិករ និងអ្នកប្រើប្រាស់ឱ្យបានដឹងកាន់តែទូលំទូលាយ និងការផ្ដល់អត្រាការប្រាក់តាមធនាគារ ។
ឯកឧត្តមឧបនាយករដ្ឋមន្ត្រី បានគូសរំលេចថា ក្នុងរយៈពេលមួយឆ្នាំកន្លះកន្លងមកនេះ ក្រសួងបានព្យាយាមបង្រួមបញ្ហាដែលមានភាពចម្រូងចម្រាស់នៅក្នុងសង្គមជាតិ ។ក្នុងនោះបានជំរុញការងារចុះបញ្ជីដីធ្លីឱ្យបានចប់សព្វគ្រប់ ដោយចុះបញ្ជីដីធ្លីបាន ៣ លាន ៧ សែនក្បាលដី ហើយប្រហែលជាដល់ពិធីបុណ្យចូលឆ្នាំថ្មីប្រពៃណីជាតិខាងមុខនេះនឹងអាចបញ្ចប់ទាំងស្រុងនូវការចុះបញ្ជីដីធ្លីនៅកម្ពុជា។
ចំណែកបញ្ហាវិវាទដីធ្លីគឺមានច្រើនករណីប៉ុន្តែរហូតមកទល់ពេលនេះក្រសួងបានដោះស្រាយករណីទាំងនោះអស់ជាច្រើននិងនៅសល់ត្រឹមក្រោម ១ ០០០ ករណីប៉ុណ្ណោះ។ រីឯការងារបឹងទន្លេសាប គឺយើងបានបន្តរក្សាអាយុជីវិតបឹងទន្លេសាបដោយមិនឱ្យមានការកាត់ឆ្វៀលដីបន្តទៀតនោះទេ ហើយរក្សាបាននូវគន្លងមួយថាកម្ពុជាមានលទ្ធភាពរក្សាបាននូវមរតកធនធានធម្មជាតិរបស់ខ្លួន ជាការទទួលខុសត្រូវរបស់អ្នកជំនាន់នេះសម្រាប់អ្នកជំនាន់ក្រោយៗទៀត។
ឯកឧត្តមបន្តថា ចំពោះបញ្ហាវិវាទដីធ្លីរវាងអាជ្ញាធរជាតិអប្សរា និងប្រជាពលរដ្ឋនៅក្នុងតំបន់រមណីយដ្ឋានអង្គរ ខេត្តសៀមរាបក៏ត្រូវបានដោះស្រាយសម្របសម្រួលនិងរក្សាបាននូវសម្បត្តិបេតិកភណ្ឌរបស់ដូនតាខ្មែរនិងធានាបាននូវជីវភាពរបស់ប្រជាពលរដ្ឋដែលរស់នៅជុំវិញតំបន់អង្គរ។ ដោយឡែកបញ្ហាវិវាទនៅក្នុងបុរីក៏ត្រូវបានដោះស្រាយសម្របសម្រួល ដោយបច្ចុប្បន្ននៅសល់ត្រឹមតែប្រមាណជាង ២០គម្រោងទៀតប៉ុណ្ណោះ។ ក្រៅពីនេះក្រសួងក៏បានដាក់ឱ្យដំណើរការនូវសេវាគាប់ចិត្តជូនដល់ប្រជាពលរដ្ឋដែលអាចប្រើប្រាស់រាល់សេវារបស់ក្រសួងបានតាមរយៈប្រព័ន្ធអនឡាញមានភាពងាយស្រួល លឿនរហ័សនិងអាចជឿទុកចិត្តបានផងដែរ។
ទន្ទឹមនេះ ឯកឧត្តមឧបនាយករដ្ឋមន្រ្តី សាយ សំអាល់ បានបញ្ជាក់ថាលទ្ធផលការងារទាំង ៦ ចំណុចដែលក្រសួងបានអនុវត្តមកនេះអាចនិយាយបានថាក្រសួងបានបង្កើតនូវបរិយាកាសគ្មានវិវាទជូនសង្គមជាតិកម្ពុជាហើយនេះគឺជាគម្រូសម្រាប់ពិភពលោកសម្រាប់ប្រទេសដែលធ្លាប់ញាំញីដោយសង្គ្រាមខ្ទេចខ្ទី អាចស្រោចស្រង់ខ្លួនត្រឡប់មកវិញបានហើយកសាងនិងអភិវឌ្ឍន៍ខ្លួនបានមកដល់បច្ចុប្បន្នដែលមិនងាយនឹងមានប្រទេសណាអាចធ្វើបានបែបនេះទេ។
ឯកឧត្តមឧបនាយករដ្ឋមន្រ្តី បន្ថែមថា ការបង្កើតសេវាសាធារណៈអនឡាញរបស់ក្រសួងរៀបចំដែនដី នគរូបនីយកម្ម និងសំណង់ គឺជាការផ្ដើមចេញនូវការធ្វើបរិវត្តកម្មឌីជីថលក្នុងរបៀបរបបការងារក្នុងការផ្ដល់នូវទិន្នន័យ ដើម្បីប្រែក្លាយផ្នត់គំនិតនិងរបៀបរបបការងារ មានន័យថាចាប់ពីពេលនេះតទៅ រាល់ទិន្នន័យគឺស្ថិតនៅក្នុងដៃយើងទាំងអស់ ហើយរាល់ការសម្រេចចិត្តគឺបានជាក់លាក់ត្រឹមត្រូវ និងមិនអាចមានភាពសៅហ្មងនោះឡើយ ៕
ដោយ៖គ្រី សម្បត្តិ
