(ភ្នំពេញ)៖ ក្រសួងប្រៃសណីយ៍និងទូរគមនាគមន៍ និងក្រសួងការងារនិងបណ្តុះបណ្តាលវិជ្ជាជីវៈ នៅថ្ងៃទី១៥ ខែមករា ឆ្នាំ២០២៥ បានរៀបចំពិធីប្រគល់-ទទួលបញ្ចប់គម្រោងរៀបចំហេដ្ឋារចនាសម្ព័ន្ធអ៊ីនធឺណិត នៅក្នុងទីស្តីការក្រសួងការងារ និងបណ្តុះបណ្តាលវិជ្ជាជីវៈ ក្នុងកិច្ចសហប្រតិបត្តិការលើការងារបរិវត្តកម្មឌីជីថលដែលបានចុះអនុស្សរណៈនៃការយោគយល់គ្នាកន្លងមក។ ពិធីនេះមានការអញ្ជើញចូលរួមពី ឯកឧត្តម ហួត ស៊ីនាថ រដ្ឋលេខាធិការក្រសួងការងារ និងបណ្តុះបណ្តាលវិជ្ជាជីវៈ និង ឯកឧត្តម គិម ភិរុណ ជំនួយការក្រសួងប្រៃសណីយ៍និងទូរគមនាគមន៍ ។

ហេដ្ឋារចនាសម្ព័ន្ធអ៊ីនធឺណិតនេះនឹងចូលរួមបម្រើដល់ការងារបរិវត្តកម្មឌីជីថល និងធ្វើឱ្យមានភាពងាយស្រួលក្នុងការគ្រប់គ្រងការប្រើប្រាស់ អ៊ីនធឺណិតនៅក្នុងទីស្តីការក្រសួងការងារ និងបណ្តុះបណ្តាលវិជ្ជាជីវៈប្រកបដោយប្រសិទ្ធភាពនិងសុវត្ថិភាព ។

ឯកឧត្តម ហួត ស៊ីនាថ រដ្ឋលេខាធិការក្រសួងការងារ និងបណ្តុះបណ្តាលវិជ្ជាជីវៈ បានថ្លែងអំណរគុណដល់ថ្នាក់ ដឹកនាំក្រសួងប្រៃសណីយ៍និងទូរគមនាគមន៍ និងក្រុមការងារបច្ចេកទេសដែលបានខិតខំយកចិត្តទុកដាក់លើគម្រោងនេះរហូតសម្រេចបានជោគជ័យ ក្នុងការជំរុញដំណេីរការងារបរិវត្តកម្មឌីជីថលនៅក្នុងក្រសួងផងដែរ ៕

ដោយ ៖ ង៉ាន់ ទិត្យ