(ភ្នំពេញ)៖ សម្តេចនាយករដ្ឋមន្ត្រី ហ៊ុន ម៉ាណែត បានផ្ដាំទៅ​អ្នកនយោបាយទាំងអស់ ទាំងខ្មែរ និងថៃ សូមកុំយករឿង​នយោ​បាយ ទៅលូកលាន់ លើកិច្ចការងារបច្ចេកទេសរបស់​រាជរដ្ឋាភិបាល ដែលកំពុងអនុវត្តការងារទាំងអស់ គឺលើគោល​ការ បច្ចេកទេស ផែនទី និងច្បាប់អន្តរជាតិ ពាក់ព័ន្ធនឹងរឿង​ព្រំដែន ។ សម្ដេចបវរធិបតី ក៏បានប្រកាសដែរថា កម្ពុជា រក្សា​ជំហរដោះស្រាយ បញ្ហាព្រំដែនតាមសន្ដិវិធី ប៉ុន្ដែកម្ពុជា ក៏រក្សា​សិទ្ធិ ការពារអធិបតេយ្យភាព និងបូរណភាពទឹកដីរបស់ខ្លួន មិ​ន​ខ្លាច នឹងប្រើកម្លាំង ប្រសិនបើមានអ្នកចូល មកឈ្លានពាន ។

សម្ដេចមហាបវរធិបតីនាយករដ្ឋមន្ត្រី កម្ពុជា ថ្លែងដូច្នេះ នៅ​ក្នុង​ពិធីប្រគល់សញ្ញាបត្រ ជូនដល់និស្សិត សាកលវិទ្យាល័យ អាស៊ី អឺរ៉ុប នៅព្រឹកថ្ងៃទី១៩ ខែកុម្ភៈ ឆ្នាំ២០២៥ នៅមជ្ឈ​មណ្ឌល​សន្និបាតកោះពេជ្រ ។

សម្តេចបវរធិបតី បានថ្លែងផ្តាំដល់អ្នកនយោបាយខ្មែរ និងថៃ អ្នកជាតិនិយម កុំទាញយករឿងនយោបាយ មកបូកឡូក​ជាមួយបច្ចេកទេសព្រំដែន និងច្បាប់អន្តរជាតិ ពីព្រោះអ្នក មិនមែនជាអ្នកជំនាញព្រំដែនទេ ទុកឲ្យអ្នកជំនាញព្រំដែន គេធ្វើការ។

សម្តេចបវរធិបតី ហ៊ុន ម៉ាណែត បានថ្លែងដូច្នេះថា ថ្មីៗនេះ ចលនាជំរុញស្មារតីជាតិនិយម នៅក្រៅប្រទេស កំពុងរុញ​ចលនាជាច្រើន ពាក់ព័ន្ធនឹងបញ្ហាព្រំដែនកម្ពុជា និងប្រទេស​ជិតខាង ដូចជា៖ ករណី CLV បញ្ហាកោះគត់ ហើយមកដល់​ពេលនេះ យកបញ្ហាប្រាសាទតាមាន់ ។

សម្ដេចបវរធិបតី បានបញ្ជាក់ថា រឿងព្រំដែន អ្នកណាក៏គិត​រឿង​ព្រំដែនដែរ ក្នុងនោះរាជរដ្ឋាភិបាល គឺជាអ្នកគិត និង​ទទួល​ខុសត្រូវធំបំផុតចំពោះមុខ ប្រជាពលរដ្ឋ ហើយ​ការងារ​នេះ ផ្អែកទៅលើការ ដោះស្រាយស្របទៅតាមច្បាប់ និង​មូលដ្ឋាន បច្ចេកទេសច្បាស់លាស់ ។

សម្តេចនាយករដ្ឋមន្ត្រី បានបញ្ជាក់ថា ពេលមានបញ្ហារឿង​ព្រំដែន​កន្លងទៅ មិនដែលឃើញមុខអ្នកជាតិនិយម​ទាំង​នោះ​ទេ មានតែមុខត្រកូល ហ៊ុន ទេ ដែលទៅដល់ព្រំដែនកន្លែង​គ្រោះថ្នាក់ទាំងនោះ ៕

អត្ថបទ ៖ វណ្ណលុក
រូបភាព ៖ វ៉េង លីមហួត និង សួង ពិសិដ្ឋ