បរទេស ៖ លោក Elon Musk បានវាយប្រហារ ដោយពាក្យសម្តីលើលោក Volodymyr Zelensky កាលពីថ្ងៃព្រហស្បតិ៍ ដោយនិយាយថា ប្រជាជនអ៊ុយក្រែន «មើលងាយ» ប្រធានាធិបតី Trump ហើយថា មេដឹកនាំសហរដ្ឋអាមេរិករូបនេះ ត្រឹមត្រូវ ក្នុងការចាកចេញពី Zelensky ទៅរកការចរចាជាមួយរុស្ស៊ី ក្នុងគោលបំណងបញ្ចប់សង្រ្គាមអ៊ុយក្រែន។

ការអត្ថាធិប្បាយ របស់មហាសេដ្ឋីបច្ចេកវិទ្យា ដែលកំពុងដឹកនាំការផ្លាស់ប្តូររដ្ឋាភិបាលដ៏ធំ បានកើតឡើង នៅពេលដែលសេតវិមានបានប្រាប់ Zelensky ឱ្យបញ្ឈប់ «ការប្រមាថ» ប្រឆាំងនឹង Trump និងចុះហត្ថលេខាលើកិច្ចព្រមព្រៀងរ៉ែ ជាមួយទីក្រុងវ៉ាស៊ីនតោន។

មេធំក្រុមហ៊ុន SpaceX និង Tesla លោក Musk បានចាប់ផ្តើមប្រឆាំងនឹង Zelensky នៅលើបណ្តាញសង្គម X របស់លោក ដោយចោទប្រកាន់ ដោយគ្មានភស្តុតាងនៃការដំណើរការ «ម៉ាស៊ីនពុករលួយដ៏ធំសម្បើម ដែលផ្តល់អាហារដល់សាកសពទាហានអ៊ុយក្រែន»។

លោក Musk បានសរសេរថា « Zelensky ដឹងថា គាត់នឹងចាញ់ ភ្លូកទឹកភ្លូកដី ទោះបីជាបានកាន់កាប់ប្រព័ន្ធផ្សព្វផ្សាយអ៊ុយក្រែនទាំងអស់ក៏ដោយ ដូច្នេះ គាត់បានលុបចោលការបោះឆ្នោត។ តាមពិត គាត់ត្រូវបានគេមើលងាយដោយប្រជាជនអ៊ុយក្រែន» ។

លោក Musk បាននិយាយទៀតថា «ប្រធានាធិបតី Trump មានការយល់ចិត្តច្រើន។ គាត់ពិតជាយកចិត្តទុកដាក់»៕

ប្រភពពី AFP ប្រែសម្រួល៖ សារ៉ាត