លោកជំទាវ ពុំ ចន្ទីនី ៖ បន្តយកចិត្តទុកដាក់បញ្ជ្រាបសកម្មភាពផ្សព្វផ្សាយពីមីន និងសំណល់ជាតិផ្ទុះពីសង្រ្គាម
(បាត់ដំបង)៖ លោកជំទាវ ពុំ ចន្ទីនី អគ្គលេខាធិការកាកបាទក្រហមកម្ពុជា បានអំពាវនាវសមាជិក សមាជិកាគណៈកម្មាធិការសាខាកាកបាទក្រហមកម្ពុជា ទាំង២៥ រាជធានី-ខេត្ត ក្រុមប្រតិបត្តិសាខា អនុសាខា និងអ្នកស្ម័គ្រចិត្ត ឱ្យបន្តយកចិត្តទុកដាក់ ដោយបញ្ជ្រាបសកម្មភាពផ្សព្វផ្សាយពីមីន និងសំណល់ជាតិផ្ទុះពីសង្រ្គាម នៅក្នុងគ្រប់សកម្មភាពរបស់សាខា និងបងប្អូនប្រជាពលរដ្ឋទាំងអស់ ដើម្បីកាត់ការរងគ្រោះ និងគ្រោះថ្នាក់ដោយសារមីន ។
ការលើកឡើងរបស់លោកជំទាវ ពុំ ចន្ទីនី ក្នុងឱកាសយុទ្ធនាការអប់រំផ្សព្វផ្សាយលើកកម្ពស់យល់ដឹងពីមីន និងសំណល់ជាតិផ្ទុះពីសង្រ្គាមក្រោមមូលបទ “រួមគ្នាលុបបំបាត់គ្រោះថ្នាក់ដោយសារមីន និងគ្រាប់មិនទាន់ផ្ទុះ ដើម្បីសហគមន៍មានសុវត្ថិភាព” នៅខេត្តបាត់ដំបង នាថ្ងៃទី២០ ខែកុម្ភៈ ឆ្នាំ២០២៥ ។
ជាមួយនេះ លោកជំទាវ ក៏បានកោតសរសើរចំពោះការខិតខំប្រឹងប្រែងរបស់គណៈកម្មាធិការសាខា ក្រុមប្រតិបត្តិសាខា-អនុសាខា ដែលបានខិតខំប្រឹងប្រែងលើកកម្ពស់ភាពមនុស្សធម៌ កាន់តែទូលំទូលាយ សកម្ម ភាពនៅមូលដ្ឋាន និងបានជួយបងប្អូនប្រជាពលរដ្ឋបានទាន់ពេលវេលា ។ ក្រោយសង្គ្រាមស៊ីវិលជាប្រវត្តិសាស្ត្របានបញ្ចប់ កាកបាទក្រហមកម្ពុជា បានចូលរួមជួយធ្វើសកម្មភាពអប់រំផ្សព្វផ្សាយលើកកម្ពស់យល់ដឹងពីមីន និងសំណល់ជាតិផ្ទុះពីសង្រ្គាមតាំងពីឆ្នាំ១៩៩៣មក ។ បច្ចុប្បន្ននេះ កាកបាទក្រហមកម្ពុជា អបរំផ្សព្វផ្សាយការយល់ដឹងអំពីការរងគ្រោះថ្នាក់ដោយសារមីន និងសំណល់ជាតិផ្ទុះពីសង្រ្គាម ជូនប្រជាពលរដ្ឋប្រមាណ ២,២១១,៣៧០នាក់ ។
តាមរបាយការណ៍របស់អាជ្ញាធរមីនកម្ពុជា បានបង្ហាញថា ចំនួនជនរងគ្រោះ បានថយចុះពី ៤,៣២០នាក់ ក្នុងឆ្នាំ១៩៩៦ មកត្រឹម ៤៩នាក់ ក្នុងឆ្នាំ២០២៤ កន្លងទៅ ។
ក្រៅពីការអប់រំផ្សព្វផ្សាយអំពីមីន និងសំណល់ជាតិផ្ទុះពីសង្គ្រាម កាកបាទក្រហមកម្ពុជា បានចូលរួមរំលែកទុក្ខដល់អ្នករងគ្រោះ របួស ពិការ និងគ្រួសារសពស្លាប់ដោយសារមីន ព្រមទាំងផ្តល់ជំនួយសង្រ្គោះបន្ទាន់ ដល់គ្រួសាររងគ្រោះ នៅតាមបណ្តាសហគមន៍ ឬនៅតាមមន្ទីរពេទ្យដោយផ្ទាល់ និងបានទទួលនូវសេវាថែទាំសុខភាព ផ្លូវកាយ និងផ្លូវចិត្ត ព្រមទាំងសម្របសម្រួលដើម្បីទទួលបានសេវាស្តារលទ្ធភាពពលកម្មកាយសម្បទា។
ចាប់តាំងពីឆ្នាំ២០០៥ ដល់ឆ្នាំ២០២៤ កាកបាទក្រហមកម្ពុជា បានផ្ដល់ប្រាក់កម្ចីគ្មានការប្រាក់ជូនប្រជាពលរដ្ឋនៅតំបន់ជនបទ ដែលប្រឈមនឹងគ្រោះថ្នាក់ដោយសារមីន/យុទ្ធភ័ណ្ឌមិនទាន់ផ្ទុះ នៅក្នុងខេត្តគោលដៅចំនួន៧មានដូចជា ៖ ខេត្តកណ្ដាល ពោធិ៍សាត់ បាត់ដំបង ប៉ៃលិន បន្ទាយមានជ័យ ឧត្តរមានជ័យ និងព្រះវិហារ សរុប ៩,០៤០គ្រួសារ ក្នុងនោះ គ្រួសារអតីតយុទ្ធជនពិការ ៣,២១១គ្រួសារ ដើម្បីលើកកម្ពស់ជីវភាពប្រជាពលរដ្ឋ ប្រកបរបរកសិកម្ម ឬធ្វើអាជីវកម្មខ្នាតតូចផ្សេងៗ រកប្រាក់ចំណូល កែលម្អជីវភាពរស់នៅ បង្កើនភាពធន់សហគមន៍ និងកាត់បន្ថយហានិភ័យគ្រោះមហន្តរាយ។
គួររំលឹកផងដែរថា ៖ ក្នុងឆ្នាំ២០២៤ សម្ដេចកិត្តិព្រឹទ្ឋបណ្ឌិត សម្រេចផ្តល់ថវិកាប្រាក់កម្ចីខ្នាតតូចគ្មានការប្រាក់ ជូនគ្រួសាររងគ្រោះដោយសារគ្រាប់មីន គ្រួសារយោធិនពិការ គ្រួសារអតីតយុទ្ធជន និងគ្រួសារយុទ្ធជន ៣៥៥គ្រួសារ ក្នុងនោះបានផ្តល់ចំនួន ១០០គ្រួសារ ជូនប្រជាពលរដ្ឋនៅភូមិប៊ុនរ៉ានីសែនជ័យដំណាក់ត្រយឹង ឃុំព្រងិល ស្រុកក្រវាញ ខេត្តពោធិ៍សាត់។ ព្រមជាមួយនោះ ដើម្បីឧបត្ថម្ភ គាំទ្រគម្រោង សម្តេចអគ្គមហាសេនាធិបតីតេជោ សម្រាប់កម្មវិធីសកម្មភាពមីន ក្នុងឆ្នាំ២០២៣កាកបាទក្រហមកម្ពុជា បានផ្ដល់ថវិកា ២លានដុល្លារអាម៉េរិក ជូនអាជ្ញាធរមីនកម្ពុជា ៕
ដោយ / គ្រី សម្បត្តិ
