តបតាមការអញ្ជើញរបស់លោក​ Kitsuki Fumio អគ្គលេខាធិការរបស់អង្គការ​OISCA International កាលរសៀលថ្ងៃទី២៧ ខែកុម្ភៈ ឆ្នាំ២០២៥ ឯកឧត្តម ទុយ រី ឯកអគ្គរាជទូតកម្ពុជា ប្រចាំប្រទេសជប៉ុន អមដោយលោក​ សុខ​ ធា​ អគ្គទីប្រឹក្សាស្ថានទូត​ បានចូលរួមវេទិកា OISCA International ទីក្រុងតូក្យូលើកទី៤៦ ដែលរៀបចំដោយអង្គការសម្រាប់ភាពរីកចម្រើនផ្នែកស្មារតី និងវប្បធម៌ឧស្សាហកម្ម (Organization for Industrial Spiritual and Cultural (OISCA) International នៅសភាជប៉ុន។

វេទិកានេះ ត្រូវបានរៀបចំឡើងដើម្បីស្វែងយល់ពីវឌ្ឍនភាពអនុវត្តន៍គម្រោងរបស់អង្គការ OISCA International ដែលបាននឹងកំពុងប្រតិបត្តិការក្នុងប្រទេសចំនួន​៤១ ដូចជា ការបង្កើនសមត្ថភាពដល់យុវជន​/ក្មេង ការអប់រំនិងបង្កើនការយល់ដឹងពីបរិស្ថាន​ ការអភិវឌ្ឍជនបទ​ ការអភិរក្ស​ និងការស្ថារឡើងវិញធនធានព្រៃឈើ និងសមុទ្រ​ និងផ្លាស់ប្តូរយោបល់ក្នុងចំណោមអ្នកចូលរួមទាំងអស់ ដើម្បីបង្កើនកិច្ចសហប្រតិបត្តិការ​ រួមទាំង​ រៀបចំសំណើក្នុងការអនុវត្តគម្រោងបន្តទៀត។ ក្នុងវេទិកានេះ មានការចូលរួមពីសមាជិកសភា ឯកអគ្គរាជ/រដ្ឋទូត តំណាងក្រសួងការបរទេសជប៉ុន ភារធារីនិង តំណាងស្ថានទូតបរទេសប្រចាំប្រទេសជប៉ុន និងក្រុមហ៊ុនឯកជនជប៉ុន​។

ថ្លែងក្នុងវេទិកានោះ ឯកឧត្តមឯកអគ្គរាជទូត បានថ្លែងអំណរគុណដល់អង្គការ OISCA International ចំពោះការគាំទ្រការអនុវត្តគម្រោងនៅកម្ពុជាកន្លងមក តាមរយ:ការបង្កើតសាខារបស់អង្គការ OISCA កម្ពុជា​ ក្នុងឆ្នាំ២០០២​ ដូចជា​ ការពង្រឹងសមត្ថភាព និងសកម្មភាពមួយចំនួនពាក់ព័ន្ធនឹងការអភិវឌ្ឍកសិកម្ម និងការអភិរក្សបរិស្ថាន​ និងបានលើកទឹកចិត្តដល់អង្គការនេះបន្តការអនុវត្តគម្រោង​ និងកម្មវិធីនៅក្នុងប្រទេសកម្ពុជា​ ដើម្បីចូលរួមចំណែកជាមួយរាជរដ្ឋាភិបាលកម្ពុជា ក្នុងការអភិវឌ្ឍសេដ្ឋកិច្ច សង្គមបន្ថែមទៀត៕
ដោយ៖ពលជ័យ
រូបភាព៖ស្ថានទូតកម្ពុជាប្រចាំប្រទេសជប៉ុន