បញ្ជាការដ្ឋានកងរាជអាវុធហត្ថខេត្ត បើកវគ្គបំប៉នសណ្តាប់ធ្នាប់ជួរទ័ពប្រចាំឆ្នាំ២០២៥
បន្ទាយមានជ័យ៖វគ្គបំប៉នសណ្តាប់ធ្នាប់ជួរទ័ពប្រចាំឆ្នាំ២០២៥បានប្រារព្ធបើកកាលពីព្រឹកថ្ងៃទី៣ ខែមីនា ឆ្នាំ២០២៥ នៅបញ្ជាការដ្ឋានកងរាជអាវុធហត្ថខេត្តបន្ទាយមានជ័យក្រោមអធិបតីភាពឧត្តមសេនីយ៍ត្រី ស៊ុន សម្បត្តិ មេបញ្ជាការរងកងរាជអាវុធហត្ថខេត្តបន្ទាយមានជ័យ ទទួលការងារកសាងកម្លាំង តំណាងលោកឧត្តមសេនីយ៍ត្រី បោន ប៊ិន មេបញ្ជាការកងអាវុធហត្ថខេត្តបន្ទាយមានជ័យ។
អនុសេនីយ៍ឯក កែម ចាន់រស្មី ជាយោធាចារ្យក្នុងវគ្គហ្វឺកហ្វឺនបានឱ្យដឹងថា វគ្គនេះមានរយៈពេល៤៧ថ្ងៃ ចាប់ថ្ងៃទី៣ ខែមីនា ដល់ថ្ងៃទី១៦ ខែឧសភា ឆ្នាំ២០២៥ (មិនបូកបញ្ចូលថ្ងៃសៅរ៍ ថ្ងៃអាទិត្យ និងថ្ងៃបុណ្យ)ស្មើ២៨២ម៉ោងដោយមានសិក្ខាកាមចំនួន៨១នាក់ និងយោធាចារ្យចំនួន៤នាក់។ខ្លឹមសារមេរៀនមានចំនួនបី រួមមាន៖ ១.សណ្តាប់ធ្នាប់ជួរទ័ព, ២.ឈរកាយវិការប្រុង និង ជូនពរស្រែកជ័យឃោស និង៣.ដើរព្យុហយាត្រានិង ស្តាំ ឆ្វេងគោរព។
ក្នុងឱកាសនេះឧត្តមសេនីយ៍ត្រី ស៊ុន សម្បត្តិ បានណែនាំទៅដល់សិក្ខាកាម ដែលជាកងកម្លាំងកងរាជអាវុធហត្ថ ត្រូវខិតខំប្រឹងប្រែងហ្វឹកហាត់ យកចិត្តទុកដាក់គោរពវិន័យ បទបញ្ជាផ្ទៃក្នុង របស់កងរាជអាវុធហត្ថ ពិសេសគឺត្រូវខិតខំយកចិត្តទុកដាក់ស្តាប់ការពន្យល់ របស់យោធាចារ្យ និងការបង្ហាត់ បង្ហាញគ្រប់ខ្លឹមសារមេរៀននីមួយៗឱ្យបានច្បាស់លាស់។ ពិភាក្សា ផ្លាស់ប្តូរយោបល់ ផ្តល់បទពិសោធន៍ ឱ្យគ្នាទៅវិញទៅមករវាងទ្រឹស្តី និងការអនុវត្តជាក់ស្តែង៕
ដោយ៖ឃិន គន្ធា
