កំពង់ធំ៖ ឯកឧត្តមកិត្តិសង្គហបណ្ឌិត ហ៊ីង ប៊ុនហៀង បានគូសបញ្ជាក់​ថា សន្តិភាព មានតម្លៃធំធេងមិនអាចកាត់ថ្លៃបាន។ ជាមរតកដ៏មហា​សាលរបស់សម្តេចតេជោ ហ៊ុន សែន អតីតប្រមុខរាជរដ្ឋាភិបាលកម្ពុជា បច្ចុប្បន្នជាប្រធានព្រឹទ្ធសភា ដែល​បានដាក់ចេញនយោបាយ ឈ្នះ ឈ្នះ ធ្វើឱ្យកម្ពុជាក្លាយពីប្រទេសមួយ ដែលមានតំបន់ត្រួតត្រាច្រើន មានតំបន់​ត្រួតត្រា​មួយ ។រដ្ឋធម្មនុញ្ញតែមួយ ។ព្រះមហាក្សត្រតែមួយ ។រាជរដ្ឋាភិបាលតែមួយ និងកងកម្លាំងប្រដាប់អាវុធតែមួយ ។

ឯកឧត្តម កិត្តិសង្គហបណ្ឌិត ហ៊ីង ប៊ុនហៀង នាយករងខុទ្ទកាល័យ​សម្តេចនាយករដ្ឋមន្ត្រី សមាជិកគណៈ​អចិន្ត្រៃយ៍គណៈ​កម្មាធិការ​កណ្តាលគណបក្សប្រជាជនកម្ពុជា និងជាប្រធានគណៈកម្មាធិការ​គណបក្ស ខុទ្ទកាល័យសម្តេចធិបតី ហ៊ុន ម៉ាណែត បានថ្លែងដូចនេះ ក្នុងឱកាសអញ្ជើញជួបសំណេះសំណាល ជាមួយមន្ត្រីគណបក្ស​ស្រុកប្រាសាទបល្ល័ង្ក ខេត្តកំពង់ធំកាលពីព្រឹកថ្ងៃទី៨ ខែមីនា ឆ្នាំ២០២៥ ។

ឯកឧត្តមបានបន្តដោយរំលឹកថា សន្តិភាពនៅកម្ពុជា រកបានមក​ដោយលំបាក ។សម្តេចតេជោ ហ៊ុន សែន រួមនិង​ឥស្សរ​ជន​ជា​ថ្នាក់ដឹកនាំនៅក្នុងជួរកងយោធពលខេមរភូមិន្ទជាច្រើនទៀត បានធ្វើពលកម្មប្តូរជីវិត ចូលទៅតំបន់ខ្មែរក្រហម ដើម្បី​ស្វែង​រកការចចារ ផ្សះផ្សារ បង្រួបបង្រួម ស្វែងរកសន្តិភាព តាមរយៈ​នយោបាយឈ្នះ ឈ្នះ ហើយឥឡូវនេះ សន្តិភាព បានកើតមាន​ពេញលេញទូទាំងផ្ទៃប្រទេស ។ប្រជាពលរដ្ឋធ្វើដំណើរទៅគ្រប់ទីកន្លែងដោយគ្មានការភ័យខ្លាច រួមនិង​សង្គមជាតិ មានការអភិវឌ្ឍ លើគ្រប់វិស័យ។ ដូច្នេះ អ្នកណាដែលមាន​ចេតនា ចង់បំផ្លាញសុខសន្តិភាព ស្ថិរភាពសង្គម គឺមិនអនុញ្ញាតដាច់​ខាត ។

ឯកឧត្តមកិត្តិសង្គហបណ្ឌិត ហ៊ីង ប៊ុនហៀង បានលើកឡើងពី​សភាព​ការណ៍ក្រៅប្រទេស ដែលកំពុងខ្វះសន្តិភាព រួមមាន÷ ជម្លោះរវាងរុស្សី និងអ៊ុយក្រែន សង្រ្គាមរវាងអ៊ីស្រាអែល និងក្រុមហាម៉ាស  បានធ្វើឱ្យ​មនុស្សស្លាប់ របួសច្រើនរាប់មិនអស់ ជាពិសេស កុមារ ខ្វះ ស្បៀង​អាហារ ថ្នាំសង្កូវ គ្មានទីជំរក បញ្ហានៅស៊េរី រួមនិងវិបត្តិសមុទ្រចិនខាង​ត្បូងកោះតៃវ៉ាន់ ដែលកំពុងផុយស្រួយ និងជម្លោះបងប្អូនកូរ៉េទាំង២ ដែលកំពុងមានការឡើងកម្ដៅ ។

ឯកឧត្តម កិត្តិសង្គហបណ្ឌិត ហ៊ីង ប៊ុនហៀង បានបន្ថែមថា ក្រោម​ការដឹកនាំដ៏វាងវៃរបស់ គណបក្សប្រជាជនកម្ពុជា សម្តេចតេជោ ហ៊ុន សែន ជាប្រធាន និងរាជរដ្ឋាភិបាលកម្ពុជា ក្នុងនីតិកាលទី៧ ដែល​មានសម្តេចបវរធិបតី ហ៊ុន ម៉ាណែត ជាប្រមុខ បាននិងកំពុងការ​សម្រេចសមិទ្ធផលជាតិធំៗជាបន្តបន្ទាប់ ស្របតាមយុទ្ធសាស្ត្របញ្ច​កោណដំណាក់កាលទី១។

ឯកឧត្តម បានពន្យល់ដល់មន្ត្រីគណបក្ស និងប្រជាជនទាំងអស់ឱ្យ​ចេះពិចារណាបែងចែក ឱ្យបានច្បាស់លាស់ នូវ​ព័ត៌មានបំផ្លើសការពិត ។ព័ត៌មានដែលមានលក្ខណៈញុះញង់ ហើយត្រូវមានការប្រុង​ប្រយ័ត្នខ្ពស់ កុំចាញ់ល្បិចកល​នក្រុមជ្រុលនិយមមួយក្តាប់តូច ដែលមានបំណងតែម៉្យាង គឺចង់ផ្ដួលរំលំរាជរដ្ឋាភិបាល ស្រប​ច្បាប់តែប៉ុណ្ណោះ ។

ក្នុក្នុងឱកាសនោះ ឯកឧត្តម កិត្តិសង្គហបណ្ឌិត ហ៊ីង ប៊ុនហៀង បាននាំយកអំណោយដ៏ថ្លៃថ្លារបស់ សម្តេចតេជោ សម្តេចកិត្តិព្រឹទ្ធ​បណ្ឌិត សម្តេចធិបតី និងលោកជំទាវបណ្ឌិត ឧបត្ថម្ភដល់គណបក្ស ស្រុកប្រាសាទបល្ល័ង្ក ថវិកា ៤លានរៀល  និងវិទ្យុទាក់ទង ចំនួន ១០គ្រឿង, ឧបត្ថម្ភដល់នគរបាលស្រុក ថវិកា ២លានរៀល  និងវិទ្យុទាក់ទង ១០គ្រឿង, កងរាជអាវុធហត្ថស្រុក ថវិកា ២លានរៀល  និងវិទ្យុទាក់ទង ១០គ្រឿង និងបានឧបត្ថម្ភផ្នែក​សឹករង​ស្រុក ថវិកា ១លានរៀល និងវិទ្យុទាក់ទង ១០គ្រឿង ព្រមទាំងបានឧបត្ថម្ភ នូវ កៅអីសិស្សចំនួន ៥៧០កៅអី និងកំព្យូទ័រ ៥គ្រឿង ដល់សាលារៀននៅទូទាំងស្រុកប្រាសាទបល្ល័ង្ក ផងដែរ ៕
ដោយ៖ វណ្ណលុក