ជើងឯកកីឡាបឋមសិក្សាឆ្នាំ២០២៥ របស់ខេត្តកណ្តាល ចាប់ផ្តើមដំណើរការប្រកួតផ្លូវការ
(កណ្តាល)៖ ការប្រកួតកីឡាសិស្សបឋមសិក្សាជ្រើសរើសជើងឯកប្រចាំឆ្នាំ២០២៥ របស់ខេត្តកណ្តាល បានចាប់ផ្តើមការប្រកួតផ្លូវការហើយ នាព្រឹកថ្ងៃទី១១ ខែ មីនា ឆ្នាំ២០២៥ ដោយប្រភេទកីឡាបាល់ទះដំណើរការប្រកួតមុនគេ នៅក្នុងវិទ្យាល័យហ៊ុន សែន សេរីភាព ក្រុងតាខ្មៅ ខេត្ត កណ្តាល។
លោក ពៅវណ្ណា ប្រធានការិយាល័យកីឡានៃមន្ទីរអប់រំយុវជននិងកីឡាខេត្តកណ្តាល បានបញ្ជាក់ឱ្យដឹងថា ការប្រកួតសិស្សបឋមសិក្សាជ្រើសរើសជើងឯកខេត្ត កណ្តាល ក្នុងឆ្នាំ២០២៥នេះ ចាប់ផ្តើមការប្រកួតចាប់ពីថ្ងៃទី១១ ដល់ថ្ងៃទី១៧ ខែមីនា ឆ្នាំ២០២៥ និងមានសិស្សានុសិស្សជាកីឡាករកីឡាការិនីចូលរួមប្រកួតចំនួន៥៧៤នាក់ ក្នុងនោះកីឡាការិនីចំនួន ២១៥នាក់ ដោយធ្វើការប្រកួតលើ៥ប្រភេទកីឡា មានដូចជា បាល់ទាត់ បាល់បោះ បាល់ទះ ប៊ូលនិងប៉េតង់ និងកីឡាអត្តពលិកកម្ម ខណៈការប្រកួតដំណើរការចំនួន៣ទីតាំងធំៗ នៅវិទ្យាល័យហ៊ុន សែន សេរីភាព វិទ្យាល័យហ៊ុន សែន តាខ្មៅ និងក្នុងកីឡដ្ឋានបាល់ទាត់ក្រុងតាខ្មៅ។
ប្រធានការិយាល័យកីឡារូបនេះ បានគូសបញ្ជាក់ថា ការប្រកួតជ្រើសរើសជើងឯកសិស្សបឋមសិក្សារយៈពេល៧ថ្ងៃនេះ ប្រើប្រាស់ថវិកាផ្ទាល់របស់មន្ទីអប់រំយុវជននិងកីឡាខេត្តកណ្តាល ដើម្បីចម្រាញ់ជ្រើសរើសកីឡាករកីឡាការិនីសិស្សបឋមសិក្សាឆ្នើមតាមប្រភេទកីឡានីមួយៗមកហ្វឹកហាត់តំណាងខេត្តកណ្តាលត្រៀមចូលរួមប្រកួតប្រជែង ការប្រកួតកីឡាជ្រើសរើសជើងឯកទូទាំងប្រទេសប្រចាំឆ្នាំ២០២៥ ដែលរៀបចំដោយក្រសួងអប់រំយុវជននិងកីឡា នៅរាជធានីភ្នំពេញ នាពេលខាងមុខឆាប់ៗនេះ ។
លោក ពៅ វណ្ណា បានថ្លែងអំណរគុណ អ្នកឧកញ៉ា សំអាង វឌ្ឍនៈ ដែលបានឧបត្ថម្ភ សម្លៀកបំពាក់ ថវិកា រួមនិងភេសជ្ជៈមួយចំនួន សម្រាប់ចូលរួមគាំទ្រដល់ការប្រកួត។ នេះជាសកម្មភាពមួយដែលរួមចំណែកក្នុងការអភិវឌ្ឍនិងលើកកម្ពស់ជួយដល់វិស័យកីឡាក្នុងខេត្តឱ្យកាន់តែរីកចម្រើនទៅមុខផងដែរ។
សូមបញ្ជាក់ថា ការប្រកួតកីឡាសិស្សបឋមសិក្សាជ្រើសរើសជើងឯកទូទាំងប្រទេស ប្រចាំ ឆ្នាំ២០២៤ កន្លងទៅ ខេត្តកណ្តាល ដណ្តើមបានចំណាត់លេខ២ ឈ្នះមេដាយសរុបចំនួន ១៦គ្រឿង ក្នុងនោះមេដាយមាស ៥ ប្រាក់ ៣ និងសំរឹទ្ធិ ៨គ្រឿង ។ខណៈការរំពឹងទុកសម្រាប់ការប្រជែងក្នុងឆ្នាំ២០២៥នេះ នឹងរក្សាការពារបានដំណែងឈរនៅលខ២ដដែល ៕
រូបភាព ៖ ជីម ភារ៉ា
អត្ថបទ ៖ ជាវ ចន្ធូ
