រដ្ឋមន្ត្រីក្រសួងសុខាភិបាល និង រដ្ឋមន្ត្រីក្រសួងការងារ អញ្ជើញពិនិត្យប្រសិទ្ធភាពការបម្រើសេវាសុខាភិបាល នៅមន្ទីរពេទ្យព្រះអង្គឌួង

(ភ្នំពេញ)៖ ឯកឧត្តមសាស្ត្រាចារ្យ ឈាង រ៉ា រដ្ឋមន្ត្រីក្រសួងសុខាភិបាល និង ឯកឧត្តម ហេង សួរ រដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈ នាព្រឹកថ្ងៃពុធ ទី១៩ ខែមីនា ឆ្នាំ២០២៥ បានអញ្ជើញពិនិត្យស្ថានភាពផ្ទាល់ការបម្រើសេវាសុខាភិបាល និងការប្រើប្រាស់សេវាមូលនិធិសម៌ និង ប.ស.ស របស់ប្រជាពលរដ្ឋ ដែលមកទទួលសេវានៅមន្ទីរពេទ្យព្រះអង្គឌួង ។

ការមកទទួលសេវារបស់បងប្អូនប្រជាពលរដ្ឋ និងការបម្រើសេវាសុខាភិបាលរបស់ក្រុមគ្រូពេទ្យ ជាពិសេសការបម្រើសេវាផ្នែក ប.ស.ស. និងមូលនិធិសមធម៌សុខាភិបាលជូនដល់ប្រជាពលរដ្ឋ កាន់តែមានការកើនឡើង និងមានភាពមមាញឹកជាបន្តបន្ទាប់ ពីមួយថ្ងៃទៅមួយថ្ងៃ។ ការកើនឡើងនៃការមកទទួលបម្រើសេវានាពេលនេះ បង្ហាញពីការជឿទុកចិត្ត និងភាពរីកចម្រើនលើសេវាសាធារណៈ ។

ទន្ទឹមនឹងការរីកចម្រើន ក្នុងនាមថ្នាក់ដឹកនាំក្រសួងសុខាភិបាល ក៏ដូចជាក្រសួងការងារ និងបណ្ដុះបណ្ដាលវិជ្ជាជីវៈ បានណែនាំ និងបន្តជំរុញឱ្យថ្នាក់ដឹកនាំមន្ទីរពេទ្យ និងផ្នែក ប.ស.ស. កាន់តែបន្តយកចិត្តទុកដាក់ខ្ពស់បន្ថែមទៀត ដោយស្របតាមការអនុវត្តន័ នៃវិធានការគន្លឹះក្នុងវិស័យសុខាភិបាល ក្នុងគោលដៅលើកកម្ពស់គុណភាពសេវាសុខាភិបាល ឈានឆ្ពោះទៅសម្រេចបានការគ្របដណ្តប់សុខភាពជាសកល។

ឯកឧត្តម ឈាង រ៉ា និងឯកឧត្តម ហេង សួរ បានសំដែងនូវការកោតសរសើរដល់ក្រុមការងារទាំងអស់ ទាំងមន្ទីរពេទ្យ និងប.ស.ស. អំពីការខិតខំបម្រើសេវាជូនប្រជាពលរដ្ឋ ដែលប្រៀបបានដូចជាកូន ជាចៅ និងក្រុមគ្រួសារផ្ទាល់ ដោយបានបង្ហាញពីភាពកក់ក្តៅ រួសរាយរាក់ទាក់ និងក្នុងឥរិយាបទល្អ សំដៅគុណភាព ប្រសិទ្ធិភាព និងស័ក្តិសិទ្ធភាព។

ក្នុងនោះដែរ ឯកឧត្តមសាស្រ្តាចារ្យរដ្ឋមន្រ្តី ផ្តល់ជាអនុសាសន៍គន្លឹះៗ ក្នុងការរៀបចំឱ្យមានភាពកាន់តែល្អប្រសើរបន្ថែមទៀត ដោយត្រូវចុះពិនិត្យ និងជួយសម្រួលឱ្យបានញឹកញាប់ដល់បងប្អូនដែលរង់ចាំ មិនត្រូវមើលរំលងករណីតម្រូវការជួយបន្ទាន់ ករណីចាស់ជរា ពិការភាព ករណីផ្ទៃពោះ ជាដើម និងបន្តរក្សាប្រសិទ្ធភាពនៃការបម្រើសេវាឱ្យនៅតែមានគុណភាព ជាមួយនឹងការបង្កើតយន្តការរៀបចំផែនការរយៈពេលខ្លី និងរយៈពេលវែង ដោយពិនត្យយ៉ាងល្អឹតល្អន់បំផុត៕

ដោយ ៖ ហេង សម្បត្តិ

ហេង សម្បត្តិ
ហេង សម្បត្តិ
ជាការីថត ជាអ្នកយកព័ត៌មាន ក៏ជាអ្នកជំនាញកាត់តវីដេអូ ប្រចាំស្ថានីយវិទ្យុ និងទូរទស្សន៍អប្សរាផងដែរ។ តាមរយៈបទពិសោធន៍ជាច្រើនឆ្នាំលើវិស័យព័ត៌មាន នឹងនាំមកជូនទស្សនិកជននូវព័ត៌មានសម្បូរបែប ប្រកបដោយវិជ្ជាជីវៈ។
ads banner
ads banner
ads banner