(ភ្នំពេញ)៖ តាមរយៈការផ្តល់ឱកាសដល់ប្រជាជនកម្ពុជា អាចរកចំណូលតាមរយៈបង្កើតមាតិកានៅក្នុងបណ្តាញសង្គមតិកតុក (Tik Tok) ពីក្រុមហ៊ុន អ្នកបង្កើតមាតិកាត្រូវខិតខំរៀនសូត្រ ដើម្បីធ្វើយ៉ាងណា ឱ្យមាតិកានោះផ្តល់ផលប្រយោជន៍ទៅដល់មនុស្សជាតិ សេដ្ឋកិច្ច សង្គម ក៏ដូចជាបរិស្ថាន ដើម្បីឈានទៅរកប្រាក់ចំណូលបាន ។

នេះជាប្រសាសន៍ ឯកឧត្តម ជា វ៉ាន់ដេត រដ្ឋមន្រ្តីក្រសួងប្រៃសណីយ៍ និងទូរគមនាគមន៍ នៅព្រឹកថ្ងៃទី១៩ ខែមីនា ឆ្នាំ២០២៥ ក្នុងសិក្ខាសាលាស្ដីអំពី សុវត្ថិភាពលើប្រព័ន្ធអនឡាញ និង គោលការណ៍ណែនាំរបស់ក្រុមហ៊ុន TikTok ត្រូវបានរៀបចំដោយក្រសួងប្រៃសណីយ៍ សហការជាមួយក្រុមហ៊ុន TikTok ក្នុងគោលបំណងចែករំលែកព័ត៌មាន ឱកាសរកប្រាក់ចំណូលសម្រាប់អ្នកផលិតមាតិកា ឧត្តមានុវត្តន៍ នៃការការពារសុវត្ថិភាពលើប្រព័ន្ធអនឡាញ គោលការណ៍ណែនាំសហគមន៍ និងការប្រើប្រាស់បណ្តាញសង្គម Tik Tok ប្រកបដោយប្រសិទ្ធភាព ដែលមានការចូលរួមពី ក្រសួង ស្ថាប័ន អ្នកសារព័ត៌មាន និងអ្នកផលិតមាតិកា ។

ឯកឧត្តម រដ្ឋមន្រ្តី បានបញ្ជាក់បន្ថែមថា អ្នកបង្កើតមាតិកាជាច្រើននៅកម្ពុជា បានស្នើទៅសម្តេចនាយករដ្ឋមន្រ្តី ដើម្បីឱ្យក្រុមហ៊ុន TikTok ហ្វេសប៊ុក និងបណ្តាញសង្គមផ្សេងទៀតផ្តល់ឱកាសក្នុងការរកចំណូលបានពីការបង្កើតមាតិកាផ្សព្វផ្សាយនៅលើបណ្តាញសង្គមទាំងនោះផងដែរ។ ក្រសួងប្រៃសណីយ៍ និងទូរគមនគមន៍ ដែលកំពុងធ្វើការងារនេះ ហើយនាពេលខាងមុខ ក្រសួងនឹងបន្តខិតខំសម្របសម្រួលបន្ថែមទៀត ដើម្បីឱ្យអ្នកបង្កើតមាតិកានៅបណ្តាញសង្គមហ្វេសប៊ុកនៅកម្ពុជាអាចរកចំណូលបាន ។

ឯកឧត្តម រដ្ឋមន្រ្តី ជា វ៉ាន់ដេត បានបញ្ជាក់បន្ថែមថា បើគិតត្រឹមឆ្នាំ២០២៥នេះ ថ្នាល TikTok មានអ្នកប្រើប្រាស់ប្រមាណ ១.៩៣ពាន់លាននាក់ នៅទូទាំងពិភពលោក និងប្រមាណ ១៦៥លាននាក់ នៅអាស៊ីអាគ្នេយ៍ ដោយក្នុងនោះ នៅកម្ពុជាយើងមានអ្នកប្រើប្រាស់ប្រមាណ ១០លាននាក់។

ក្រុមហ៊ុន TikTok គឺជាក្រុមហ៊ុនបណ្តាញសង្គមដ៏ល្បីនៅលើពិភពលោកមួយ ដែលកំពុងមានប្រជាប្រិយភាព ក្នុងចំណោមអ្នកប្រើប្រាស់ ក្នុងការផលិតទម្រង់មាតិកាជាវីដេអូខ្លីៗ (Short Form Video) តាមរយៈកម្មវិធីទូរសព្ទ ហើយចែករំលែកគ្នា ទៅកាន់អ្នកមើលជាច្រើន។

កាលពីកន្លងទៅ អ្នកផលិតមាតិកានៅកម្ពុជាមិនអាចរកប្រាក់ពីកម្មវិធី TikTok បានទេ ដោយសារតែក្រុមហ៊ុននេះអនុញ្ញាតការរកលុយនៅតែប្រទេសធំៗមួយចំនួន។

នៅឆ្នាំ២០២៥នេះ ក្រុមហ៊ុន TikTok បានពង្រីកកម្មវិធីរកប្រាក់សម្រាប់អ្នកប្រើប្រាស់កម្ពុជាផងដែរ ដោយយោងទៅលើការកើនឡើងនៃអ្នកប្រើប្រាស់ និងលទ្ធភាពដែលក្រុមហ៊ុនទទួលបានសក្ដានុពលផ្នែកពាណិជ្ជកម្មលើអនឡាញជាដើ។

លោកស្រី Chanida Klyphun ប្រធានផ្នែកគោលនយោបាយសាធារណៈ របស់ក្រុមហ៊ុន TikTok ប្រចាំអាស៊ីអាគ្នេយ៍ បានគូសបញ្ជាក់ថា ក្នុងមួយនាទីមានវីដេអូប្រមាណជា១០ម៉ឺនវីដេអូ បានបង្ហោះនៅលើបណ្តាញសង្គម Tik Tok ដែលសំបូរបែប ។

លោកស្រីបន្ថែមថា ដើម្បីតាមដាននូវវីដេអូ ដែលបង្ហោះថាជាវីដេអូដែលត្រូវបានទៅតាមលក្ខន្តិក និងច្បាប់ដែលបានកំណត់នោះក្រុមហ៊ុនត្រូវប្រើប្រាស់នូវបច្ចេកវិទ្យាAI ក្នុងការតាមដាននូវរាល់វីដេអូទាំងនោះ ដើម្បីចប់កំណត់ទៅតាមមុខសញ្ញានេះ បាន មិនប៉ះពាល់ទៅដល់អ្នកទស្សនា ដែលមានជាវីដេអូរន្ធត់ ហឹង្សារ ដែលធ្វើឱ្យប៉ះពាល់អារម្មណ៍អ្នកមើល ពិសេសកុមារផងដែរ ៕

ដោយ ៖ ង៉ាន់ ទិត្យ
រូបភាព ៖ រិន រចនា