(ភ្នំពេញ)៖ លោកជំទាវ ពុំ ចន្ទីនី អគ្គលេខាធិការកាកបាទ​ក្រ​ហម​​​កម្ពុជា បានអញ្ជើញទទួលស្វាគមន៍ដំណើរទស្សនកិច្ច​របស់​គណៈប្រតិភូនិស្សិតគិលានុប្បដ្ឋាន និងឆ្មបសាលាពេទ្យកាក​បាទ​ក្រហមជប៉ុនចំនួន ២២រូប ដែលដឹកនាំដោយលោកស្រី Kentaro Nagazumi នាយកនាយកដ្ឋានអន្តរជាតិ នៃកាក​បាទក្រហមជប៉ុន នារសៀលថ្ងៃទី១៩ ខែមីនា ឆ្នាំ២០២៥ នៅ​ទីស្នាក់ការកណ្តាលកាកបាទក្រហមកម្ពុជា ។

លោកជំទាវ អគ្គលេខាធិការ បានសម្តែងក្តីសោមនស្សរីករាយ និង​ស្វាគមន៍ យ៉ាងកក់ក្តៅជាពិសេសបានពាំនាំ​នូវប្រសាសន៍ ផ្តាំផ្ញើសួរសុខទុក្ខពីសំណាក់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា ជូនចំពោះគណៈ​ប្រតិ​ភូកាកបាទក្រហមជប៉ុន ដែលបានអញ្ជើញមកទស្សនកិច្ច​សិក្សា​នៅទីស្នាក់ការកណ្តាលកាកបាទក្រហមកម្ពុជា ហើយដែលនេះ ជាលើកទី១៨ ចាប់តាំងពីឆ្នាំ២០០៦រៀងមក។

លោកជំទាវ បានជម្រាបជូនគណៈប្រតិភូអំពីសកម្មភាព​សំ​ខាន់ៗ​របស់កាកបាទក្រហមកម្ពុជា ទៅតាមវិស័យអាទិភាព​ទាំង៤ ជាពិសេសផ្តោតលើការចូលរួមដើម្បីសហគមន៍​មាន​សុខភាពល្អ និងមានភាពធន់នឹងអាកាសធាតុ។ ទន្ទឹមនឹងនេះ លោកជំទាវ ក៏បានគូសបញ្ជាក់ពីតួនាទីនិងភាពជាអ្នកដឹក​នាំ​របស់ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ក្នុងឋានៈ​ជាឥស្សរជនឆ្នើមថ្នាក់ជាតិនៃផែនការសកម្មភាពរួមអគ្គលេខាធិការអង្គការសហប្រជាជាតិ ដើម្បីសុខភាពស្ត្រីនិងកុមារ និងជា​ឥស្សរជនឆ្នើមថ្នាក់ជាតិនៃវេទិកាភាពជាអ្នកដឹកនាំតំបន់អាស៊ី-ប៉ាស៊ីហ្វិក ឆ្លើយតបមេរោគអេដស៍ជំងឺអេដស៍ និងការអភិវឌ្ឍ​នៅកម្ពុជា ផងដែរ។

ស្ថិតក្នុងឱកាសនោះដែរ យុវជនកាកបាទក្រហមកម្ពុជា ចំនួន ៣រូប ក៏បានឡើងធ្វើបទបង្ហាញសង្ខេបអំពីសកម្មភាព​មនុស្ស​ធម៌​របស់កាកបាទក្រហមកម្ពុជា ក្នុងការឆ្លើយតបគ្រោះ​មហន្ត​រាយ, ការអប់រំសុខភាពតាមសហគមន៍ និងវិជ្ជាសង្គ្រោះបឋម ជូនដល់គណៈប្រតិភូផងដែរ។

ជាកិច្ចឆ្លើយតប លោកស្រី Kentaro Nagazumi នាយក​នា​យក​ដ្ឋាន​អន្តរជាតិនៃកាកបាទក្រហមជប៉ុន បានថ្លែងអំណរ​គុណ​​ចំពោះលោកជំទាវអគ្គលេខាធិការ ដែលបានទទួល​ស្វា​គមន៍ យ៉ាងកក់ក្តៅ និងសង្ឃឹមជឿជាក់ថាចំណងសាមគ្គីភាព កិច្ចសហប្រតិបត្តិការរវាងកាកបាទក្រហមជប៉ុន និងកាកក​បា​ទ​ក្រហមកម្ពុជា កាន់តែរឹងមាំថែមទៀត។ ដោយឡែក និស្សិត​គិ​លានុប្ប​ដ្ឋាន និងឆ្មបសាលាពេទ្យកាកបាទក្រហមជប៉ុន ចំនួន ៥រូប ក៏បានឡើងធ្វើបទបង្ហាញអំពីមេរៀន និងបទពិសោធន៍​ដែល​បានអនុវត្តនាពេលកន្លងមកក្នុងពេលកំពុង​សិក្សានៅ​ក្នុង​សាលាពេទ្យកាកបាទក្រហមជប៉ុន ផងដែរ៕

ដោយ / គ្រី សម្បត្តិ