វេណេស៊ុយអេឡានាំគ្នាស៊ីញ៉េទាមទារដោះលែងជនជាតិខ្លួន ដែលលោក Trump បញ្ជូនទៅញាត់គុកអែលសាវ៉ាឌ័រ

ការ៉ាកាស់ ៖ ប្រជាពលរដ្ឋវេណេស៊ុយអេឡាទាំងក្មេងទាំងចាស់ បានប្រមូលផ្តុំគ្នាចុះហត្ថលេខាម្នាក់ម្តងៗលើញត្តិរបស់រដ្ឋាភិបាល ដែលទាមទារឱ្យដោះលែងជនរួមជាតិខ្លួនចំនួន ២៣៨នាក់ ដែលរដ្ឋបាលលោក ដូណាល់ ត្រាំ ចាប់បញ្ជូនទៅញាត់ពន្ធនាគារដ៏ឃោរឃៅមួយនៅប្រទេសអែលសាវ៉ាឌ័រ។

មេដឹកនាំអាមេរិក លោក ដូណាល់ ត្រាំ បានសម្រេចចុះហត្ថលេខាលើបទបញ្ជាប្រតិបត្តិមួយ ដោយប្រើប្រាស់ច្បាប់មានអាយុកាល ២២៧ឆ្នាំ ដើម្បីបណ្តេញជនអន្តោប្រវេសន៍វេណេស៊ុយអែលចំនួន ២៣៨នាក់ ចេញពីទឹកដីអាមេរិក ទៅញាត់គុកដ៏ធំនៅអែលសាវ៉ាឌ័រ ដោយចោទប្រកាន់ពួកគេថា ជាក្រុមក្មេងទំនើង ឬក្រុមសង្គមងងឹត «Tren de Aragua»។

ប្រជាជនវេណេស៊ុយអេឡាម្នាក់បាននិយាយរិះគន់ចំៗលើប្រធានាធិបតីអែលសាវ៉ាឌ័រ លោក Nayib Bukele ថា ខ្លួនស្ទើរតែមិនហ៊ានស្រម៉ៃថា ក្នុងនាមជាមេដឹកនាំមួយរូប អាចធ្វើទង្វើទទួលយកមនុស្ស ដែលមិនមែនជាប្រជាជនខ្លួន តាមរបៀបដ៏ឃោរឃៅបែបនេះ។ វាគឺជាការអាម៉ាស់មួយសម្រាប់ប្រជាជនប្រទេសរបស់គាត់ ដែលមានមេដឹកនាំជាមនុស្សប្រភេទនេះផងដែរ។

ជាមួយគ្នានេះ អភិបាលក្រុងការ៉ាកាស់ លោកស្រី Carmen Melendez បាននិយាយយ៉ាងដូច្នេះថា តាងនាមប្រធានាធិបតីវេណេស៊ុយអេឡា លោកស្រីនឹងបង្កើតយុទ្ធសាស្រ្តសម្របសម្រួលគ្រប់បែបយ៉ាង ដើម្បីនាំយកបងប្អូនជនរួមជាតិរបស់យើង វិលត្រលប់មកប្រទេសកំណើតរបស់យើងវិញឱ្យខានតែបាន។

បើតាមអង្គការសហប្រជាជាតិ ប្រជាជនវេណេស៊ុយអេឡាជិត ៨លាននាក់បានភៀសខ្លួនចេញពីប្រទេសកំណើតរបស់ខ្លួនក្នុងទសវត្សរ៍ចុងក្រោយនេះ ដោយសារតែវិបត្តិក្នុងស្រុក៕

ប្រភព ៖ AFP ប្រែសម្រួល ៖ ឈឹម ទីណា

ឈឹម​ ទីណា​
ឈឹម​ ទីណា​
តាមរយៈការចូលរួមនៅតាមស្ថាប័នធំៗជាច្រើន រួមមានទូរទស្សន៍ គេហទំព័រ និងបណ្តាញសង្គមនានា បូករួមនឹងជំនាញបន្ថែមក្នុងការសរសេរ កាត់ត និងអាន នឹងផ្ដល់ជូនទស្សនិកជននូវព័ត៌មានដ៏សម្បូរបែបប្រកបដោយទំនុកចិត្ត និងវិជ្ជាជីវៈ។
ads banner
ads banner
ads banner