សម្តេចតេជោ ហ៊ុន សែន លើកមូលហេតុ មិនផ្តល់ផ្កាយមាស៥ ជូន សម្តេច ស ខេង ព្រោះសម្ដេច ជាស៊ីវិល មិនមែនយោធា
(ភ្នំពេញ)៖ សម្ដេចតេជោ ហ៊ុន សែន ប្រមុខរដ្ឋស្ដីទី លើកមូលហេតុតបនឹងសំណួរថា ហេតុអ្វីមិនផ្តល់ ផ្កាយមាស៥ ជូនសម្តេចក្រឡាហោម ស ខេង គឺដោយសារតែសម្តេចក្រឡាហោម ជាស៊ីវិល ដូច្នេះមិនពាក់ឋានន្តរស័ក្តិ ដូចជាយោធានោះទេ ។
សម្ដេចអគ្គមហាសេនាបតីតេជោ នាយឧត្តមសេនីយ៍ ផុតលេខផ្កាយមាស៥ ហ៊ុន សែន ថ្លែងបែបនេះ ក្នុងឱកាសអញ្ជើញជាអធិបតី ក្នុងពិធីបំពាក់ឋានន្តរសក្តិ ថ្នាក់នាយឧត្តមសេនីយ៍ផុតលេខផ្កាយមាស៥ នៃកងយោធពលខេមរភូមិន្ទ ជូនសម្ដេចពិជ័យសេនា ទៀ បាញ់ និងសម្ដេចកិត្តិសង្គហបណ្ឌិត ម៉ែន សំអន នៅទីស្ដីការគណៈរដ្ឋមន្រ្តី នាព្រឹកថ្ងៃទី២១ ខែមីនា ឆ្នាំ២០២៥ ។
សម្ដេចតេជោ ហ៊ុន សែន បានបញ្ជាក់ថា មានសារមួយ ចូលមកបញ្ចេញមតិថា បាត់សម្ដេច ស ខេង ហើយសម្ដេច ក៏បានចូលទៅឆ្លើយតបថា សម្ដេច ស ខេង ជាស៊ីវិល គាត់មិនពាក់ឋានន្តរស័ក្តិ ដូចជាទាហាននោះទេ ។
សម្ដេចតេជោ ហ៊ុន សែន បានថ្លែងថា សម្ដេចក្រឡាហោម ស ខេង នៅក្នុងអំឡុងឆ្នាំ ១៩៩៧-១៩៩៨ ពេលនោះ សម្ដេចក្រឡាហោម បាននិយាយថា បើសិនជាសម្ដេចពាក់ស័ក្ដិ ក៏ពាក់ស័ក្ដិត្រឹមស័ក្ដិ៥ដែរ មិនពាក់ធំជាងនឹងនោះទេ ព្រោះថា ពេលនោះ កំពុងតែអតិផរណាស័ក្ដិ ។
សម្ដេចតេជោ បញ្ជាក់ផងដែរថា សូមកុំមកព្យាយាម បំបែកផ្ទៃក្នុង គណបក្សប្រជាជនកម្ពុជា ហើយអ្នកត្រូវចាំ អ្នកកាន់តែបំបែកផ្ទៃក្នុង គណបក្សប្រជាជនកម្ពុជា គឺអ្នកទេដែលបែកបាក់ផ្ទៃក្នុងខ្លួនឯង ដូច្នេះសូមកុំបំបែកគណបក្សប្រជាជនកម្ពុជាឲ្យសោះ។ អ្នកដែលធ្លាក់បំបែកបំបាក់ គណបក្សប្រជាជនកម្ពុជា ទាំងប៉ុន្មាន គឺបែកបាក់ខ្លួនឯងទាំងអស់ ។
សម្ដេចតេជោ ហ៊ុន សែន បានបន្ថែមថា ខ្ញុំហ៊ាននិយាយ ខ្ញុំហ៊ានធ្វើ ។ បក្សប្រឆាំងចំនួនប៉ុន្មានហើយ ដែលចង់បំបែក គណបក្សប្រជាជន ប៉ុន្ដែទីចុងបំផុត លទ្ធផល គឺបែកខ្លួនឯងទាំងអស់ ។ សម្ដេចបានសង្កត់ធ្ងន់ថា ខ្ញុំនឹងបន្ដធ្វើកិច្ចការងារនេះ ដោយមិនទុកឲ្យអ្នកឯង រួចខ្លួននោះទេ ៕
អត្ថបទ ៖ វណ្ណលុក
រូបភាព ៖ វេង លីមហួត ,សួង ពិសិដ្ឋ
