បរទេស ៖ នាយករដ្ឋមន្ត្រីថៃបានទាមទារឲ្យមានការពន្យល់ជាបន្ទាន់ ទាក់ទងនឹងការពន្យារពេលផ្ញើសារ SMS រម្លឹកជូនដល់ប្រជាពលរដ្ឋ ក្រោយកើតមានគ្រោះរញ្ជួយដី នេះបើតាមការចុះផ្សាយរបស់កាសែត The Nation នៅថ្ងៃសៅរ៍នេះ។

លោកស្រី Paetongtarn Shinawatra បានចោទសួរអំពីការឆ្លើយតបជារួម នៃរចនាសម្ព័ន្ធសំខាន់ៗ ក្នុងការផ្ញើសារនេះ។ លោកស្រីបានថ្លែងដូច្នេះ នៅក្នុងកិច្ចប្រជុំកម្រិតខ្ពស់ នៅថ្ងៃសៅរ៍នេះ។

លោកស្រីបានកោះប្រជុំនេះឡើង ដើម្បីដោះស្រាយផលវិបាក នៃព្រឹត្តិការណ៍រញ្ជួយដី ដែលមានប្រភពមកពីប្រទេសមីយ៉ាន់ម៉ា និងប៉ះពាល់ដល់តំបន់ជាច្រើនរបស់ប្រទេសថៃ ក្នុងនោះ លោកស្រី Patongtarn បានសម្តែងការព្រួយបារម្ភយ៉ាងខ្លាំង ចំពោះភាពយឺតយ៉ាវនៃប្រព័ន្ធទំនាក់ទំនងសង្គ្រោះបន្ទាន់។

បើតាម AFP ចំនួនសាកសពស្លាប់នៅប្រទេសថៃ ត្រូវបានរកឃើញ១០នាក់ ខណៈប្រមាណ១០០នាក់ទៀត មិនទាន់រកឃើញ ភាគច្រើនក្នុងអគារដែលបាក់រលំ គិតត្រឹមថ្ងៃត្រង់នេះ៕

ប្រភពពី The Nation ប្រែសម្រួល៖ សារ៉ាត