ឯកឧត្តមឧបនាយករដ្ឋមន្ត្រី សាយ សំអាល់ ៖ យើងទាំងអស់គ្នា ត្រូវចូលរួមកសាងសហសម័យកម្ពុជា និងអភិវឌ្ឍកម្ពុជាមាតុភូមិយើងឱ្យកាន់តែរីកចម្រើន
(ភ្នំពេញ)៖ ឯកឧត្តមឧបនាយករដ្ឋមន្ត្រី សាយ សំអាល់ រដ្ឋមន្រ្តីក្រសួងរៀបចំដែនដី នគរូបនីយកម្ម និងសំណង់ មានប្រសាសន៍ថា យើងទាំងអស់គ្នា ត្រូវចូលរួមកសាងសហសម័យកម្ពុជាជាមួយគ្នា ជាសម័យដែលសង្គមកម្ពុជាមានអរិយធម៌ វប្បធម៌ ទំនៀមទំលាប់ និងមានភាពជឿជាក់លើខ្លួនឯង ហើយយកឱកាសនេះរៀនស្គាល់ពីគេ និងប្រព័ន្ធនយោបាយរបស់ពិភពលោក និងចេះទាញប្រយោជន៍ពីនោះ ដើម្បីកសាងខ្លួននិងគ្រួសារ និងអភិវឌ្ឍកម្ពុជាមាតុភូមិយើងឱ្យកាន់តែរីកចម្រើន ។
នេះជាប្រសាសន៍លើកឡើងរបស់ឯកឧត្តមឧបនាយករដ្ឋមន្ត្រី សាយ សំអាល់ ក្នុងឱកាសជួបសំណេះសំណាលជាមួយនិស្សិតជ័យលាភីអាហារូបករណ៍រាជរដ្ឋាភិបាលជប៉ុន ឆ្នាំ២០២៥ នាទីស្តីការក្រសួង ។
ឯកឧត្តមឧបនាយករដ្ឋមន្ត្រី សាយ សំអាល់ បានចែករំលែកនូវបទពិសោធន៍ អំឡុងពេលបន្តការសិក្សានៅក្រៅប្រទេស និងក្នុងអាជីពជាអ្នកនយោបាយ ជាពិសេសគំនិត និងការដាក់ចេញនូវផែនការ ជាមួយការអនុវត្តជាជំហានៗ ដោយផ្តោតលើការបង្កើតបរិយាកាសគ្មានវិវាទ តាមរយៈការធ្វើគោលនយោបាយចុះបញ្ជីដីធ្លីបង្ហើយ ដោះស្រាយវិវាទដីធ្លី ផ្តល់សេវាគាប់ចិត្ត ដោះស្រាយបញ្ហាចម្រូងចម្រាសនៅតាមបុរី ការរក្សាអាយុជីវិតនិងគុណតម្លៃជាប្រវត្តិសាស្ត្ររបស់បឹងទន្លេសាប ព្រមទាំងការចូលរួមគិតគូរអំពីបញ្ហាពាក់ព័ន្ធនឹងតំបន់រមណីយដ្ឋានសៀមរាប-អង្គរ ដើម្បីរក្សាស្ថេរភាពសន្តិសុខនយោបាយ-សេដ្ឋកិច្ចក្នុងសង្គមកម្ពុជា ដោយជំហានបន្ទាប់ ក្រសួងកំពុងគិតគូរ និងធ្វើកិច្ចការរៀបចំដែនដី និងនគរូបនីយកម្ម ដែលប្រែក្លាយកម្ពុជាអោយទៅជាកម្ពុជាមាតុភូមិខ្ញុំ ។
ជាមួយគ្នានេះ ឯកឧត្តមឧបនាយករដ្ឋមន្ត្រី បានចូលរួមអបអរសាទរ និងកោតសរសើរជាមួយលទ្ធផលកើតចេញពីការខិតខំប្រឹងប្រែងរៀនសូត្ររបស់ជ័យលាភីអាហារូបករណ៍ទាំងអស់ ព្រមទាំងលើកទឹកចិត្តឱ្យប្អូនៗជ័យលាភីគ្រប់ៗរូប បន្តយកចិត្តទុកដាក់ឱ្យបានកាន់តែច្រើនទៀត អំឡុងពេលបន្តការសិក្សានៅក្រៅប្រទេស ។ ជាមួយគ្នានេះ ឯកឧត្តមបានគូសបញ្ជាក់ពីសារសំខាន់នៃការវិនិយោគលើធនធានមនុស្ស ហើយប្អូនៗគឺជាកោសិកាដ៍សំខាន់សម្រាប់ការកសាងពូនជ្រំសង្គមជាតិកម្ពុជាប្រកបដោយភាពរស់រវើក ស្របទៅតាមបំណងដ៍់ពិសិដ្ឋរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា។
ឯកឧត្តមឧបនាយករដ្ឋមន្ត្រីបានលើកឡើងពីភាពចាំបាច់ជាមូលដ្ឋានគ្រឹះនៃការទទួលស្គាល់នូវគុណតម្លៃ និងភាពកត្តញ្ញូក្នុងសង្គមគ្រួសារ ក៏ដូចជាសង្គមជាតិទាំងមូល ដែលប្អូនៗចាំបាច់ត្រូវយកចិត្តទុកដាក់ប្រតិបត្តិ ជាគំរូឱ្យបានទូលំទូលាយដល់កុមារៗជំនាន់ក្រោយ ដោយប្រកាន់ខ្ជាប់ជាឥរិយាបថបន្តជំនាន់ មានលំនាំត្រឹមត្រូវ ជាអាទិ៍៖ ការគោរព ផ្តល់តម្លៃ និងគិតគូរពីរៀមច្បង និងចាស់ព្រឹទ្ធាចារ្យ សន្តិភាពនិយម រួសរាយរាក់ទាក់ មានមនុស្សធម៌ យកចិត្តទុកដាក់លើអនាម័យក្នុងជីវភាពរស់នៅប្រចាំថ្ងៃ ចេះលើកទឹកចិត្តខ្លួនឯង និងព្រមសម្របទទួលយកការសម្រេចចិត្តមួយដែលមានការស្រុះស្រួល ជាប្រយោជន៍រួម ប្រកបដោយភាពនវានុវត្ត ដែលទាំងអស់នេះជាការបង្កើតទម្លាប់ ឥរិយាបថ និងចរិយាមាយាទថ្មី សម្រាប់ធនធានមនុស្សបន្តវេនក្នុងសង្គមកម្ពុជា ៕
ដោយ / គ្រី សម្បត្តិ
