វត្តសំពៅផល មានអាយុកាលជាង ១០០ឆ្នាំ ជាសម្បត្តិបេតិកភ័ណ្ឌជាតិ
(ខេត្តបន្ទាយមានជ័យ)៖ វត្តរតននិមិត្តសំពៅផល ឋិតនៅ ភូមិព្រែកសំរោង ឃុំរហាត់ទឹក ស្រុកមង្គលបូរី ខេត្តបន្ទាយមានជ័យ មានអាយុកាលជាង ១០០ឆ្នាំដែលជាសម្បត្តិបេតិកភ័ណ្ឌជាតិ ហើយត្រូវបានធ្វើពិធីសម្ពោធឆ្លងព្រះវិហារថ្មី កាលពីថ្ងៃទី ៣ ខែមេសា ឆ្នាំ២០២៥ នេះ ។
ឯកឧត្តម កែ គឹមយ៉ាន អ្នកតំណាងរាស្ត្រមណ្ឌលខេត្ត បន្ទាយមានជ័យ និងជាឧត្តមប្រឹក្សាផ្ទាល់ព្រះមហាក្សត្រ បានរំលឹកពីវត្តរតននិមិត្តសំពៅផល ឋិតនៅ ភូមិព្រែកសំរោង ឃុំរហាត់ទឹក ស្រុកមង្គលបូរី ខេត្តបន្ទាយមានជ័យ គឺមានអាយុកាល១៥៩ឆ្នាំមកហើយដែលចាត់ចូលជាសម្បត្តិបេតិកភ័ណ្ឌជាតិ ។ វត្តអារាមមួយនេះសាងឡើងក្រោយសម័យអណានិគមនិយមបារាំង។ ឆ្លងកាត់របបប៉ុលពត មកដល់ថ្ងៃរំដោះ១៩៧៩ រហូតមកទល់ឆ្នាំ២០២៥ សមទ្ធិផលវត្តមួយនេះត្រូវបានកសាងអភិវឌ្ឍឡើងជាបណ្ដើរៗ ជាក់ស្ដែង ព្រះវិហារថ្មី ដែលបានសម្ពោធពេលនេះក្រោមការឧបត្ថម្ភពីពុទ្ធបរិស័ទនិងក្រុមការងារ ចុះមូលដ្ឋាន ។
ឯកឧត្តម កែ គឹមយ៉ាន បានបញ្ជាក់ថា ទូទាំងខេត្តមានវត្តចំនួន ២៥៥វត្ត និងវត្តអារាមចំណាស់ ឬបុរាណដែលមានអាយុកាល គិតចាប់ពី ១០០ឆ្នាំឡើងសរុប ៨២វត្តបានចាត់ចូលជាសម្បត្តិ បេតិកភ័ណ្ឌវប្បធម៌ជាតិ ។ ដូច្នេះចូរពុទ្ធបរិស័ទ ក៏ដូចប្រជាពលរដ្ឋខ្មែរ បន្តឧបត្ថម្ភគាំទ្រជួយថែរក្សាមរតក៌ពុទ្ធសាសានាឬវប្បធម៌ខ្មែរឲ្យឋិតឋេរគង់វង្យតរៀងទៅ ដ្បិតវប្បធម៌និងសាសនារលត់ នោះជាតិបាត់បង់ ។ ហើយមួយវិញទៀត ពុទ្ធសាសនាបានបណ្ដុះបណ្ដាលមូលធនមនុស្សនិងបានរួមចំណែក នាំមកនូវសុខសន្តិភាពផងដែរ ។
លោក រ័ត្ន ដាស៊ីណង់ បានឲ្យដឹងថា វត្តរតននិមិត្តសំពៅផល ស្ថិតក្នុងភូមិព្រែកសំរោង ឃុំរហាត់ទឹក ស្រុកមង្គលបូរី ខេត្តបន្ទាយមានជ័យ ផ្តើមកសាងនៅអំឡុងឆ្នាំ១៨៦៦ ក្រោមការដឹកនាំកសាង ។ទន្ទឹមនឹងនេះព្រះវិហារថ្មី ដែលមានបណ្តោយប្រវែង ២២ម៉ែត្រ ទទឹងប្រវែង ១២,៤៥ម៉ែត្រ មានរចនាបទខ្មែរសុទ្ធសាធ បានផ្តើមកសាងនៅថ្ងៃទី២៥ ខែកញ្ញា ឆ្នាំ២០២២ បញ្ចប់ ការសាងសង់ជាស្ថាពរនៅដើមឆ្នាំ២០២៥ ដោយចំណាយថវិកាសរុប ៣២៨.៤៤១ដុល្លារ ហើយសមិទ្ធផលទាំងអស់នេះ នឹងសម្ពោធដាក់ឱ្យប្រើប្រាស់នាពេលនេះ តទៅ ៕
ដោយ ៖ គៀន ច័ន្ទហ៊ីន
