ត្រីមាសទី១ ឆ្នាំ២០២៥ ទំហំពាណិជ្ជកម្មកម្ពុជា ចិន សម្រេចបានជាង៤ពាន់លានដុល្លារ
ភ្នំពេញ៖ ត្រីមាសទី១ ឆ្នាំ២០២៥ នេះទំហំពាណិជ្ជកម្មទ្វេភាគីកម្ពុជា ចិន សម្រេចបានក្នុងទំហំទឹកប្រាក់ជាង៤ពាន់លានដុល្លារ ពោលកើនឡើងជាង២៦% បើធៀបនឹងឆ្នាំ២០២៤។ ក្នុងត្រីមាសទី១ដដែល កម្ពុជា ទទួលបានគម្រោងវិនិយោគចំនួន១៧២ ជាមួយទុនវិនិយោគប្រមាណ២,៥ពាន់លានដុល្លារអាម៉េរិក ដែលភាគច្រើនជាការវិនិយោគរបស់ចិន។
តាមទិន្នន័យរបស់អគ្គនាយកដ្ឋានគយ និងរដ្ឋាករកម្ពុជា(GDCE) ឱ្យដឹងថា ក្នុងត្រីមាសទី១ ឆ្នាំ២០២៥ ការនាំចូល នាំចេញទំនិញរវាងប្រទេសកម្ពុជា និងចិន មានទឹកប្រាក់សរុប ៤ ០៦៨,៦ លានដុល្លារ កើនឡើង ២៦,៧ ភាគរយបើធៀបនឹងឆ្នាំ ២០២៤ ដែលមានចំនួន ៣ ២១០,២៣ លានដុល្លារ។
ចំនួនទឹកប្រាក់នៃពាណិជ្ជកម្មទ្វេភាគីរវាងកម្ពុជា-ចិន បានគ្របដណ្តប់ជិត៣០ភាគរយនៃទំហំពាណិជ្ជកម្មអន្តរជាតិរបស់កម្ពុជាក្នុងត្រីមាសទី ១ ឆ្នាំ២០២៥ ដែលមានទឹកប្រាក់ ១៤ ៤៤៩,១៦លានដុល្លារ។ក្នុងចំនួននេះ គឺទំនិញកម្ពុជានាំទៅប្រទេសចិន ៣៤៨,១៩ លានដុល្លារ ថយចុះ ៤,៩ ភាគរយ ចំណែកទំនិញចិននាំចូល ៣ ៧២០,៤១ លានដុល្លារ កើន ៣០,៨ ភាគរយ។
នៅថ្ងៃទី១៧ ខែមេសា នេះឯកឧត្តម ស៊ី ជីនពីង ប្រធានាធិបតីនៃសាធារណរដ្ឋប្រជាមានិតចិនចាប់ផ្តើមបំពេញទស្សនកិច្ចផ្លូវរដ្ឋនៅកម្ពុជារយៈពេលពីរថ្ងៃចាប់ពីថ្ងៃទី១៧ ដល់ទី១៨ ខែមេសា ។តាមរយៈនៃដំណើរទស្សនកិច្ចនេះ រំពឹងទំហំ
ពាណិជ្ជកម្ម កម្ពុជា ចិន នឹងបានជំរុញ និងពង្រីកបន្ថែមទៀត៕
ដោយ៖វណ្ណ លុក
