កំពត៖កាលពីរសៀលថ្ងៃទី១១ និងព្រឹកថ្ងៃទី១២ ខែឧសភា ឆ្នាំ២០២៥នេះ  ឯកឧត្តម តាក ហាប់ ប្រធានក្រុមប្រឹក្សាខេត្ត និងលោកជំទាវ និងឯកឧត្តម ម៉ៅ ធនិន អភិបាលខេត្តកំពត និងលោកជំទាវ ព្រមទាំងមន្រ្តីនៃមន្ទីរ អង្គភាព ជុំវិញខេត្ត លោកគ្រូ​អ្នកគ្រូ សិស្សានុសិស្ស និងប្រជាពលរដ្ឋ យ៉ាងច្រើនកុះករ ចូលរួមប្រារព្ធ​ពិធីបុណ្យវិសាខបូជានៅ​បរិវេណ​ប្រាសាទ​ដើមពោធិ៍ក្រុងកំពត ។ក្នុងព្រឹត្តិការណ៍នេះ ក៏មានការដង្ហែចេញពីប្រាសាទដើមពោធិ៍ ប្រទក្សិណជុំវិញ​រង្វង់មូលទុរេន រួច​ចូលមក​ប្រាសាទដើមពោធិ៍វិញ និងមានពិធីបាត្រព្រះ​សង្ឃ​ចំនួន៥៦៩អង្គផងដែរ។

មានប្រសាសន៍ក្នុងឱកាសនេះ ឯកឧត្តមអភិបាលខេត្ត ម៉ៅ ធនិន រំលឹកថា វិស័យព្រះពុទ្ធសាសនា ត្រូវបានស្ដារឡើងវិញ ក្រោយថ្ងៃរំដោះ ៧មករា ១៩៧៩ ។រហូតមកដល់បច្ចុប្បន្ន រាជរដ្ឋាភិបាលកម្ពុជា បានយកចិត្តទុកដាក់ និងលើកកម្ពស់​អភិវឌ្ឍន៍ឱ្យកាន់តែប្រសើរ ក្នុងនោះសមិទ្ធផលនានាមានដូចជា វត្តអារាម សាលាពុទ្ធិកសិក្សាគ្រប់កម្រិត មជ្ឈមណ្ឌល​វិបស្សនា​អប់រំផ្លូវចិត្តជាដើម បានលេចចេញជារូបរាងជាបន្តបន្ទាប់។

សូមជម្រាបថា បុណ្យវិសាខបូជាធ្វើឡើងដើម្បីគោរពដឹងគុណ  រំឭកនឹកដល់​ព្រឹត្តិការណ៍ធំៗបី នៃសម័យពុទ្ធកាល​ គឺជា​ថ្ងៃដែលព្រះអង្គទ្រង់បានប្រសូត ,បានត្រាស់ដឹង និងជាថ្ងៃចូលបរិនិព្វានផងដែរ។ បុណ្យវិសាខបូជា ក៏ត្រូវបាន​អង្គការសហប្រជាជាតិទទួលស្គាល់ជាពិធីបុណ្យសាសនាអន្តរជាតិ ដែល​គេអាចប្រារព្ធធ្វើបាននៅជុំវិញពិភពលោក៕
ដោយ៖ សិលា សារិន