ភ្នំពេញ៖ ព្រឹត្តិការណ៍ប្រកួតកីឡាវាយកូនបាល់ពានរង្វាន់SEARA OPEN ដែលចែកចេញជា២កម្រិត គឺ​កម្រិតអេ និងកម្រិតប៊ីដំណើរការប្រកួតរយៈពេល២ថ្ងៃ​នៅទីលានកីឡាវាយកូន​បាល់ស៊ីស៊ីខេមបូឌាខន​ទ្រី​ក្លិប និង ទីលានកីឡាវាយកូនបាល់ក្នុងពហុកីឡាដ្ឋានជាតិបានបញ្ចប់ ខែ ទី១ហើយ ដោយកម្រិតអេ កីឡាករ​ជម្រើសជាតិឈុតធំ ប៊ុន កេន្នីនៅតែបន្តរក្សាតំណែង ជើងឯក ដោយយកឈ្នះ កីឡាករ​ជម្រើស​ជាតិឈុតធំ ឡុង សំនៀង ខណៈ កម្រិតប៊ីកីឡាករ ចាន់ វាសនា ជាអ្នកគ្រងជើងឯក​ក្រោយ​យក​ឈ្នះ ញ៉ែម សុភ័ក្រា្ត ២សិតទល់០។

          លោក ឧកញ៉ា ទេព រិទ្ធីវិទ្ធ អគ្គលេខាធិការសហព័ន្ធកីឡាវាយកូនបាល់កម្ពុជា បានបញ្ជាក់ថា ការ​ប្រកួតកីឡាវាយកូនបាល់ពានរង្វាន់ SEARA OPEN ក្រោមការឧបត្ថម្ភ​ពីក្រុមហ៊ុនលក់​សម្ភារៈ​ហាត់​ប្រាណ SEARAប្រចាំកម្ពុជា សម្រាប់ ខែ ដំបូងនេះ យើងបានរៀបចំបែងចែកជា២កម្រិត គឺ កម្រិត​អេសម្រាប់​កីឡាករឆ្នើមៗដែលជាជម្រើសជាតិថ្នាល និងជម្រើសជាតិឈុតធំ រីឯកម្រិតប៊ី សម្រាប់​កីឡាករ​ថ្នាលរបស់សហព័ន្ធ និងថ្នាលមកពីបណ្តាខេត្តបូកបញ្ចូល​កីឡាករជើងចាស់ក្រៅអាជីព​ដែល​ស្នេហា​វិ​ស័យកីឡាវាយកូនបាល់។ លោក ឧកញ៉ា ពន្យល់ថា ការប្រកួតទាំងពីរកម្រិតនេះ យើងរៀប​ចំ​ឡើង ដើម្បីពង្រឹងអភិវឌ្ឍ​សមត្ថ​ភាព​កីឡាករជម្រើសជាតិឈុតធំ និងជម្រើសជាតិថ្នាលរបស់សហព័ន្ធ និងផ្តល់ឱកាសឲ្យ​យុវជន​ថ្នាល​មកពីបណ្តាខេត្តបានបញ្ចេញនូវសមត្ថភាព ពិសេស ចូលរួមបំផុសឲ្យ​វិស័យកីឡាវាយកូនបាល់​កាន់​តែមានសាលភាពនៅកម្ពុជា។

           កីឡាករជើងចាស់ក្រៅអាជីព ចាន់ វាសនា បន្ទាប់ពីក្រសោបបានតំណែងជើងឯក​ការប្រកួត​កីឡា​វាយកូនបាល់ពានរង្វាន់ SEARA OPEN កម្រិតប៊ី បានបង្ហាញអារម្មណ៍ថា ការឈ្នះជើង​ឯក​លើក​នេះ​​វាពិត​ជាលំបាក​សម្រាប់លោកព្រោះយុវជនថ្នាលមានកម្លាំងខ្លាំង។ ហើយលោក សង្ឈឹមជឿជាក់ថា ការចូលរួមចែករំលែកបទពិសោធន៍ពីសហគមក្រៅអាជីរបស់ពួកលោក និងជួយឲ្យយុវជនថ្នាលទទួលបានបទពិសោធន៍ក្លាយជាទន់សម្រាប់ក្នុងការពង្រឹមសត្ថភាពសម្រាប់ពេលអនាគត។

          ឆ្លងកាត់ការប្រកួតប្រជែងរយៈពេល២ថ្ងៃ កម្រិតអេ ចំណាត់លេខ១ប៊ុន កេន្នី និងចំណាត់​លេខ២បានទៅលើ កីឡាករ ឡុង សំនៀង។ ដោយឡែកកម្រិតប៊ី ប្រកួតវិញ្ញាសាឯកក្តជន​ចំណាត់​លេខ​១ ចាន់ វាសនា ចំណាត់ថ្នាក់លេខ២បានទៅលើកីឡាករ ញ៉ែម សុភ័ក្រា្តមកពីខេត្តសៀមរាប។ សម្រាប់​វិញ្ញាសាប្រកួតវាយគូរ កម្រិតប៊ី ចំណាត់ថ្នាក់លេខ១បានទៅលើកីឡាករ ចាន់ វាសនាចាប់​ដៃ​ជា​មួយ​កីឡាករ លី ហួត និងចំណាត់លេខ២បានទៅលើកីឡាករ ឡាច ប្រាថ្នាចាប់ដៃជាមួយកីឡាករ ថាច មាន៕