ឧត្តមសេនីយ៍ត្រី នៃ និយម អញ្ជើញពិនិត្យមើលតំណើរការសាងសង់អាគារស្នាក់នៅ ផ្ទះបាយ បន្ទប់ របស់កងទ័ព ជាអំណោយដ៏ថ្លៃថ្លារបស់មេបញ្ជាការកងទ័ពជើងគោក
ខេត្តកណ្តាល៖ ឯកឧត្តម ឧត្តមសេនីយ៍ត្រី នៃ និយម មេបញ្ជាការ នៅព្រឹកថ្ងៃទី០១ ខែធ្នូ ឆ្នាំ២០២០ នេះ បានញ្ជើញដឹកនាំមេបញ្ជាការរង នាយសេនាធិការ នាយទាហាន នាយទាហានរង ពលទាហាន នៃតំបន់ប្រតិបត្តិការសឹករងកណ្តាល ចុះពិនិត្យមើលដំណើរការកសាង អាគារស្នាក់នៅ ផ្ទះបាយ បន្ទប់ទឹក របស់កងទ័ព ដែលជាអំណោយដ៏ថ្លៃថ្លា របស់ឯកឧត្តម ឧត្តមសេនីយ៍ឯក ហ៊ុន ម៉ាណែត អគ្គមេបញ្ជាការរងកងយោធពលខេមរភូមិន្ទ មេបញ្ជាការកងទ័ពជើងគោក ផ្តល់ជូនដល់ទីបញ្ជាការ ។
នៅក្នុងឱកាសនេះ ឯកឧត្ដម មេបញ្ជាការ បានជំរុញឱ្យក្រុមវិស្វករបច្ចេកទេសសាងសង់អគារនេះ ត្រូវគោរពទៅតាមបទដ្ឋានបច្ចេកទេសប្លង់មេដែលបានឯកភាព សមស្របទៅតាមស្តង់បានកំណត់ របស់ឯកឧត្តម មេបញ្ជាការកងទ័ពជើងគោក។ ឯកឧត្តម បានជម្រុញ និងក្រើនរំលឹកទៅដល់ ក្រុមវិស្វករសាងសង់ ត្រូវគិតគូរពីសុវត្តិភាពខ្ពស់បំផុត ដល់ក្រុមជាងសាងសង់ សំណង់អាគារ ក្នុងពេលសាងសង់ មិនត្រូវឱ្យមានបញ្ហាកើតឡើងជាយថាហេតុណាមួយឡើយ។
បន្ទាប់មក ឯកឧត្តម មេបញ្ជាការ បានអញ្ជើញសំណេះសំណាល និងចែកអំណោយ ដល់ក្រុមវិស្វករសាងសង់ ក្រុមជាង ជាបុគ្គលិក កម្មករ ដែលទទួលបានម៉ៅការសាងសង់ និងស្នាក់នៅក្នុងទីបញ្ជាការតំបន់ប្រតិបត្តិការសឹករងកណ្តាល ។ ក្នុងឱកាសនេះ ឯកឧត្តម មេបញ្ជាការ បានជំរុញឱ្យក្រុមវិស្វករ រួមនិងបុគ្គលិកកម្មករ ត្រូវយកចិត្តទុកដាក់ខ្ពស់ចំពោះការហូបចុកស្នាក់ គឺត្រូវមានអនាម័យស្អាតជានិច្ច។ ជាមួយនិងស្ថានការណ៍វិវត្តន៍ថ្មី នៃជំងឺកូវីដ១៩ ដែលប្រមុខដឹកនាំសម្តេច តេជោ ហ៊ុន សែន នាយករដ្ឋមន្រ្តី ក៏ដូចជាក្រសួងសុខាភិបាល បានបញ្ចាក់ថា រហូតទល់និងពេលនេះ កម្ពុជា បាននិងកំពុង ធ្វើយុទ្ធនាការយ៉ាងម៉ឺងម៉ាត់ទៅលើ «ព្រឹត្តិការណ៍សហគមន៍២៨វិច្ឆិកា» ។ ជាមួយគ្នានេះ ឯកឧត្តម ក៏បានអំពាវនាវ អនុវត្តតាមវិធានការរបស់ក្រសួងសុខាភិបាល ក្នុងការថែរក្សា អនាម័យ លាងសំអាតដៃ ឲ្យបានស្អាតជាប្រចាំ ដោយសាប៊ូ ឬ អាល់កុល ពាក់ម៉ាស់ឲ្យបានត្រឹមត្រូវ គ្រប់ពេលវេលា នៅពេលធ្វើដំណើរចេញទៅក្រៅផ្ទះ ទីសាធារណៈ ត្រូវរក្សាគម្លាតសុវត្ថិភាពសង្គម។
គួរបញ្ជាក់ថា អំណោយដែល ឯកឧត្តម ឧត្តមសេនីយ៍ត្រី នៃ និយម មេបញ្ជាការ រួមជាមួយនិងមេបញ្ជាការរង នាយសេនាធិការ នៃតំបន់ប្រតិបត្តិការសឹករងកណ្តាលបានចែកជូននាពេលនេះរួមមាន មី ចំនួន ៣៥កេស និង ត្រីខ ២យួរ ចែកជូនដល់បុគ្គលិក កម្មករ កម្មាការនី ដែលកំពុងស្នាក់នៅសាងសង់អាគារនេះផងដែរ៕
