ពលរដ្ឋខ្មែរ ដែលបានទៅធ្វើការនៅក្រៅប្រទេស ពេលវិលមកវិញត្រូវតែធ្វើចត្តាឡីស័ក១៤ថ្ងៃ
បងប្អូនពលរដ្ឋខ្មែរ ដែលបានទៅធ្វើការនៅក្រៅប្រទេស ក្នុងពេលដែលកំពុងជួបបញ្ហាវិបត្តិជម្ងឺកូវិដ១៩ បានវិលត្រឡប់ចូលមកប្រទេសវិញ មានចំនួន ១៤៤នាក់ ស្រី ៧១នាក់និងកុមារតូចៗ ដែលបានធ្វើ ចត្តាឡីស័ក នៅខេត្តបន្ទាយមានជ័យ ហើយត្រូវបានក្រុមការងារទទួលពលករចំណាកស្រុកខេត្តសៀមរាប ដែលដឹកនាំដោយលោកជំទាវ យូ សុភា អភិបាលរងខេត្តសៀមរាប ទៅទទួលយកមកកាន់មណ្ឌលចត្តាឡីស័កនៅសាលាបឋមសិក្សាអនុវត្តគរុកោសល្យខេត្ត បានមកដល់នៅវេលាម៉ោង ២១ និង០០នាទី នារាត្រីថ្ងៃទី ២៣ ខែ ធ្នូ ឆ្នាំ២០២០ តាមក្បួនរថយន្តកងពលតូចដឹកជញ្ជូនលេខ៩០ នៃកងយោធពលខេមរភូមិន៍ មកដល់ប្រកបដោយសុវត្ថិភាព ។
តាមការបញ្ជាក់របស់លោកជំទាវ យូ សុភា បានឲ្យដឹងថា បងប្អូនពលរដ្ឋខ្មែរ មកពីក្រៅប្រទេសទាំង១៤៤នាក់នេះ ត្រូវបានចូលទៅមណ្ឌលចត្តាឡីស័កខេត្តបន្ទាយមានជ័យ នៅថ្ងៃទី១៩ ខែធ្នូនេះ តែដោយការយកចិត្តទុកដាក់ខ្ពស់របស់ប្រមុខរាជរដ្ឋាភិបាល ក៏ដូចឯកឧត្តម ទៀ សីហា អភិបាលខេត្ត ចំពោះប្រជាពលរដ្ឋរបស់ខ្លួន រដ្ឋបាលខេត្តបានឲ្យក្រុមការងារគ្រប់គ្រងទទួលពលករចំណាកស្រុកមកពីក្រៅប្រទេស ដែលកំពុងធ្វើការចត្តាឡីស័កនៅខេត្តបន្ទាយ មានជ័យ ដែលមានលំនៅដ្ឋាននៅខេត្តសៀមរាប យកមកឲ្យធ្វើចត្តាឡីស័កនៅខេត្តរបស់ខ្លួន ក្នុងការជួយសម្រួលនូវ ទីកន្លែងមណ្ឌលចត្តាឡីស័កខេត្តបន្ទាយមានជ័យផងដែរ ។
ក្នុងពេលក្រុមគ្រូពេទ្យជួរមុខ បានធ្វើការកត់ត្រាតាមដានពីពង្សាវត្តារបស់បងប្អូនពលករ បងប្អូនបានធ្វើការ បញ្ជាក់ជូនដល់ក្រុមគ្រូពេទ្យឲ្យបានដឹងថា ក្នុងពេលចូលធ្វើចត្តាឡីស័កនៅមណ្ឌលខេត្តបន្ទាយមានជ័យ ក្រុមគ្រូពេទ្យ ក៏បានធ្វើការយកសំណាក មួយលើកមកហើយ តែចំពោះលទ្ធផលនៅពុំទាន់បានដឹងផងដែរ ។ ក្នុងពេលមកដល់ក្រុមគ្រូពេទ្យក៏បានធ្វើការវាស់កម្តៅ ព្រមទាំងផ្តល់នូវអាហារកញ្ចប់ ដែលរៀបចំឡើងដោយ រដ្ឋបាលខេត្តសៀមរាបផងដែរ ៕ម៉ី សុខារិទ្ធ ភ្នាក់ងារខេត្តសៀមរា